ຈາກສະຖານະການທີ່ທະວີຄວາມຮຸນແຮງຂຶ້ນເລື່ອຍໆລະກວ່າງ ອິດສະຣາແອນ ແລະ ປາເລສໄຕ໌ (ກຸ່ມຮາມາສ) ໄດ້ຕໍ່ສູ້ກັນ ສົ່ງຜົນໃຫ້ປັດຈຸບັນ ມີລາຍງານຈຳນວນຄົນເສຍຊີວິດຫຼາຍກວ່າ 2.800 ຄົນ.
ໃນອິດສະລະເອວ ກໍມີລາຍງານຈຳນວນແຮງງານ ແລະ ນັກສຶກສາຕ່າງປະເທດທີ່ເດີນທາງເພື່ອໄປເຮັດວຽກ ແລະ ສຶກສາຢູ່ພາຍໃນປະເທດດັ່ງກ່າວດ້ວຍ ໃນນັ້ນກໍມີປະເທດໄທ ຫວຽດນາມ ແລະ ກຳປູເຈຍເປັນຕົ້ນ.
ໂດຍທາງການໄທລາຍງານວ່າ ມີຈຳນວນແຮງງານທີ່ໄປເຮັດວຽກຢູ່ນັ້ນຫຼາຍກວ່າ 100 ຄົນ ເຊິ່ງກໍມີການສົ່ງເຮືອບິນໄປຮັບປະຊາຊົນໄທໃນອິດສະຣາແອນກັບປະເທດແລ້ວຈຳນວນໜຶ່ງ ນອກນີ້ ໜຶ່ງໃນແຮງງານໄທ ກໍໄດ້ບອກວ່າ ມີແຮງງານໄທຈຳນວນຫຼາຍທີ່ເສຍຊີວິດຈາກເຫດການດັ່ງກ່າວ ໃນນັ້ນກໍມີອີກຫຼາຍປະເທດອ້ອມຂ້າງທີ່ໄປເຮັດວຽກຢູ່ອິດສະລະເອວ ປະກອບມີ ກຳປູເຈຍ ຫວຽດນາມ ແລະ ລາວ.
ຫຼ້າສຸດ ຜູ້ໃຊ້ບັນຊີຕິກຕັອກ Noy Srisomboun ໄດ້ກ່າວວ່າຕົນເປັນໜຶ່ງໃນນັກສຶກສາທີ່ເຄີຍໄປເຝິກງານຢູ່ອິດສະຣາແອນ ພ້ອມລະບຸວ່າ ປັດຈຸບັນມີນັກສຶກສາທີ່ໄປເຝິກງານຢູ່ປະເທດອິດສະຣາແອນ ມີປະມານ 140 ຄົນ ແລະ ຍັງຄົງຢູ່ໃນປະເທດນັ້ນ ແຕ່ສ່ວນຫຼາຍນັກສຶກສາແມ່ນຢູ່ທາງພາກໃຕ້ຂອງປະເທດ ຍັງຫ່າງໄກຈາກບໍລິເວນທີ່ມີສົງຄາມ ໃນຂະນະທີ່ສົງຄາມແມ່ນເກີດຂຶ້ນຢູ່ພາກກາງ, ຢ່າງໃດກໍຕາມ ມັນກໍຍັງມີຄວາມອັນຕະລາຍ ບໍ່ຮູ້ວ່າສົງຄາມມັນຈະກວມເອົາຫຼາຍເຂດພຽງໃດ.
ທັ້ງນີ້ ທາງການລາວກໍແຈ້ງວ່າ ໄດ້ຕິດຕາມສະຖານະການລະຫວ່າງ ອິດສະຣາແອນ ແລະ ປາເລສໄຕ໌ ຢ່າງໃກ້ຊິດ ແລະ ມີຄວາມເປັນຫ່ວງ ແຕ່ຍັງບໍ່ມີການລາຍງານຈຳນວນຕົວເລກແຮງງານ ຫຼື ນັກສຶກສາລາວ ທີ່ຢູ່ໃນປະເທດອິດສະລະເອວ.