ຊີ້ແຈງກໍລີນີມີບຸກຄົນທີ່ໂພດລົງສື່ສັງຄົມອ່ອນລາຍ ວ່າມີລົດຄາເປັນເວລາ 5 ວັນ ຢູ່ເສັ້ນທາງເລກທີ 13 ເໜືອ ແຕ່ເມືອງກາສີ ແຂວງວຽງຈັນ ຫາ ເມືອງພູຄູນ ແຂວງຫຼວງພະບາງ ແມ່ນບໍ່ມີຄວາມຈິງ.
ອີງຕາມການລາຍງານຂອງ ທ່ານ ພັທ ພູວັນນີ ຫຼິນວັນນະລາດ ຫົວໜ້າພະ ແນກຕໍາຫຼວດຈະລະຈອນ ຫ້ອງຕຳຫຼວດ ປກສ ແຂວງວຽງຈັນ ກ່າວວ່າ ໃນໄລຍະຜ່ານມາເຈົ້າໜ້າທີ່ພວກເຮົາໄດ້ລົງລະບາຍການສັນຈອນຢ່າງຕັ້ງໜ້າລົງຕິດຕາມກວດກາຕາມເສັ້ນທາງເລກທີ 13 ເໜືອ, ເຊິ່ງເປັນເສັ້ນທາງຍຸດທະສາດ ແລະ ເປັນເສັ້ນທາງເມືອງຕໍ່ເມືອງ, ແຂວງຕໍ່ແຂວງ, ນອກນັ້ນຍັງເປັນເສັ້ນທາງອອກສູ່ຕ່າງປະເທດ. ສະພາບການສັນຈອນໄປມາຂອງຍານພາຫະນະນັບມື້ເພີ່ມຂື້ນເປັນຈໍານວນຫຼວງຫຼາຍເຊັ່ນ: ລົດບັນທຸກສິນຄ້າຜ່ານແດນ ແລະ ລົດຂົນສົ່ງແຮ່ທາດຕ່າງໆ ເສັ້ນທາງຂອບເຂດເມືອງກາສີ ແຕ່ຊາຍແດນເມືອງວັງວຽງຫາເມືອງພູຄູນ ສະພາບເສັ້ນທາງແມ່ນມີການເປ່ເພຫຼາຍຈຸດ ເຊິ່ງເປັນບວກ, ເປັນຂຸມ ບວກກັບຊ່ວງລະດູຝົນເວລາຝົນຕົກນໍ້າໄດ້ໄຫຼເຊາະເຈື່ອນດິນລົງມາຖົມໃສ່ຄອງລະບາຍນໍ້າຕາມແຄມທາງເຮັດໃຫ້ນໍ້າໄດ້ໄຫຼໃສ່ເສັ້ນທາງ ແລະ ເຮັດໃຫ້ເສັ້ນທາງມີການເປ່ເພເປັນຈໍານວນຫຼາຍຈຸດ ແລະ ທາງເຈື່ອນເປັນບາງຈຸດ, ເສັ້ນທາງແຕ່ຊາຍແດນເມືອງ ວັງວຽງ ຮອດ ເມືອງ ກາສີ ແມ່ນເປັນບວກເປັນຂຸມຫຼາຍ ແຕ່ບໍ່ເຖິງຂັ້ນລົດຕິດ-ລົດຄາ ພໍໄປມາໄດ້ສະດວກ, ສ່ວນເສັ້ນທາງແຕ່ເມືອງກາສີຫາຊາຍແດນເມືອງພູຄູນ ສະພາບເສັ້ນທາງເປັນທາງພູດອຍສູງຊັນ, ທາງແຄບ, ທາງໂຄ້ງເປັນບວກ, ເປັນຂຸມ ບາງຈຸດຖືກນໍ້າເຊາະເຈື່ອນເປັນຂຸມເລິກເຮັດໃຫ້ລົດຂື້ນພູບໍ່ໄດ້ ເຊິ່ງເປັນຕົ້ນເຫດເຮັດໃຫ້ລົດຄາໄດ້ແກ່, ໄດ້ດຶງ, ລົດທີ່ສັນຈອນໄປມາໄດ້ຈອດລໍຈົນກວ່າລົດທີ່ຄາຂື້ນໄດ້ຈຶ່ງສາມາດໄປໄດ້ ສະເພາະລົດທີ່ຕໍ່າເປັນຕົ້ນແມ່ນປະເພດລົດເກງແມ່ນບໍ່ສາມາດໄປມາໄດ້, ສ່ວນຫຼາຍລົດຕໍ່າແມ່ນໄດ້ນໍາໃຊ້ເສັ້ນທາງກາສີ-ເມືອງນານ ສະເພາະລົດບັນທຸກໜັກແມ່ນທາງບໍລິສັດສ້ອມແປງທາງກາສີ-ເມືອງນານ ບໍ່ອະນຸຍາດໃຫ້ນໍາໃຊ້ເສັ້ນທາງດັ່ງກ່າວ. ໃນໄລຍະຜ່ານມາພວກເຮົາໄດ້ນໍາເອົາກໍາລັງລົງລະບາຍການສັນຈອນເປັນຈໍານວນ 06 ຄັ້ງ,ມີ 18 ແຮງງານ, ບາງຈຸດແມ່ນໃຊ້ເວລາຮອດ 02 ວັນ, ຈຸດທີ່ລົດຄາເຊັ່ນ: ຈຸດທີ 1 : ໂຄ້ງບ້ານ ນໍ້າແກ່ນ ຫຼັກກິໂລແມັດ 235, ຈຸດທີ 2 : ໂຄ້ງບ້ານ ຜາເຈົ້າ ຫຼັກກິໂລແມັດ 225, ຈຸດທີ 3 : ໂຄ້ງບ້ານ ແກ່ວກ້ວາງ ຫຼັກກິໂລແມັດ 238, ຈຸດທີ 4 : ໂຄ້ງບ້ານ ຫີນໂງ່ນ ຫຼັກກິໂລແມັດ 247.
ແຕ່ລະຈຸດທີ່ເຮັດໃຫ້ລົດຄາຍ້ອນວ່າສະພາບເສັ້ນທາງເປັນທາງໂຄ້ງ, ທາງແຄບ ແລະ ຂື້ນພູຊັນ, ຂຸມເລິກ ບວກກັບສະພາບອາກາດຝົນຕົກ ເຮັດໃຫ້ທາງມື່ນ ຈຶ່ງເຮັດໃຫ້ການສັນຈອນໄປມາຂອງຍານພາຫະນະພົບກັບຄວາມຫຍຸ້ງຍາກ ກ່ຽວກັບເຫດການລົດຕິດຢູ່ຫຼັກກິໂລແມັດ 238 ຂອບເຂດບ້ານ ແກ່ວກ້ວາງ ຂອງວັນທີ09/10/2023 ຕາມບຸກຄົນທີ່ໄດ້ຖ່າຍວີດີໂອແລ້ວໂພດລົງໂຊຊ່ຽວວ່າລົດຕິດຢູ່ເຂດດັ່ງກ່າວເປັນເວລາ 05 ມື້ ບໍ່ສາມາດສັນຈອນໄປມາໄດ້ ແມ່ນບໍ່ມີຄວາມຈິງ ຕາມທີ່ສື່ສັງຄົມອອນລາຍໄດ້ໂພດລົງໂຄສະນານັ້ນ ສ່ວນທີ່ວ່າລົດຕິດນັ້ນແມ່ນຕິດແທ້ ຜ່ານມາແມ່ນຕິດ 1-2 ຊົ່ວໂມງ ກໍ່ສາມາດສັນຈອນໄປມາໄດ້, ສ່ວນຕອນເຊົ້າຂອງວັນທີ 09 ແຕ່ເວລາ 06:00 – 11:00 ໂມງແມ່ນລົດໄດ້ຕິດເປັນຈໍານວນຫຼວງຫຼາຍເພາະມີລົດຄາ, ບວກໃສ່ສະພາບເສັ້ນທາງ, ທາງມື່ນຝົນໄດ້ຕົກຕອນເຊົ້າລົດບໍ່ສາມາດຂື້ນພູໄດ້ ຈາກນັ້ນຫ້ອງການ ຍທຂ ເມືອງກາສີ ຈຶ່ງໄດ້ນໍາເອົາກົນຈັກລົງໄປແກ້ໄຂ ແລ້ວກໍ່ສາມາດສັນຈອນໄປມາໄດ້ເປັນປົກກະຕິ.
ສ່ວນລົດທີ່ຕິດແມ່ນຕົກມາຮອດຕອນແລງເວລາປະມານ 17:00-18:00 ໂມງ ກໍ່ສາມາດສັນຈອນໄປມາໄດ້ເປັນປົກກະຕິ.