ໃນພິທີສະເຫຼີມສະຫຼອງວັນແຫ່ງຊາດຕ້ານຢາເສບຕິດ ຄົບຮອບ 22 ປີ (12 ຕຸລາ 2001 – 12 ຕຸລາ 2023) ທີ່ແຂວງອຸດົມໄຊໄດ້ຈັດຂຶ້ນໃນວັນທີ 12 ຕຸລາ 2023 ນີ້ຢູ່ເຂດພື້ນທີ່ສະໜາມກິລາແຂວງ, ເປັນປະທານພິທີໂດຍພົຈວ ສີວອນ ໄຊຍະວົງ ກໍາມະການປະຈໍາພັກແຂວງ, ເລຂາຄະນະພັກ, ຫົວໜ້າກອງບັນຊາການ ປກສ ແຂວງອຸດົມໄຊ.
ພັອ ດວງຈັນ ໄຊວຸດ ຄະນະປະຈໍາພັກ, ຮອງກອງບັນຊາການ, ຄະນະກໍາມະການກວດກາ ແລະ ຄວບຄຸມຢາເສບຕິດ ປກສ ແຂວງອຸດົມໄຊ ລາຍງານໃຫ້ຮູ້ວ່າ: ຢາເສບຕິດທີ່ນຳມາຈູດທຳລາຍຄັ້ງນີ້ ແມ່ນຢາເສບຕິດທີ່ສານປະຊາຊົນໄດ້ຕັດສິນຄະດີຢ່າງເດັດຂາດ ໃນນັ້ນ ມີເຮໂລອິນ ຈໍານວນ29,03 ກິໂລກຣາມ, ຢາບ້າ ຈໍານວນ 2.608.991 ເມັດ ນໍ້າໜັກ 306,68 ກິໂລກຣາມ, ຢາບ້າເປັນແປ້ງຝຸ່ນສີແດງຍັງບໍ່ທັນໄດ້ອັດເປັນເມັດນໍ້າຫນັກ 9,08 ກິໂລກະລາມ, ຢາໄອ້ 3 ຫໍ່, ນ້ຳໜັກ 3 ກິໂລກຣາມ,ເຄຕາມິນ ນ້ຳໜັກ 13,9 ກຣາມ, ກັນຊາອັດແຫ້ງ 1 ແທ່ງ ນໍ້າໜັກ 1 ກິໂລກຣາມ, ແປ້ງຝຸ່ນ ຈໍານວນ 142,69 ກິໂລກຣາມ, ນໍ້າຢາເຄມີ 6 ແກ້ດ, ສີປະສົມອາຫານ 3 ເປົາ ແລະ ຖົງຢາງໃສ່ຢາບ້າ (ຖົງເປົ່າ) ຈໍານນວນ 5 ເປົ້າ ນ້າ ໜັກ 89,8 ກິໂລກຣາມ,ຢາຝິ່ນ ນໍ້າຫນັກ 11 ກິໂລກຣາມ ແລະ ເປືອກຫມາກຝິ່ນ ນໍ້າຫນັກ 17 ກິໂລກຣາມ, ພ້ອມນີ້ຍັງໄດ້ຍົກໃຫ້ຮູ້ເຖິງສະພາບການລະບາດຂອງຢາເສບຕິດທີ່ແຜ່ລາມຢ່າງກ້ວາງຂວາງ ຈາກຕົວເມືອງ ໄປສູ່ ຊົນນະບົດ ໃນລະດັບທີ່ແຕກຕ່າງກັນ ກາຍເປັນໄພອັນຕະລາຍຄຸກຄາມເຖິງຄວາມໝັ້ນຄົງຂອງຊາດ, ຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມປອດໄພຂອງສັງຄົມ ທັງເປັນອຸປະສັກກົດໜ່ວງຖ່ວງດຶງການສ້າງ ສາພັດທະນາປະເທດຊາດ ນຳເອົາຄວາມເສຍຫາຍມາສູ່ຄອບຄົວ, ຄົນຮຸ່ນສືບທອດ ແລະ ປະຊາຊົນລາວບັນດາເຜົ່າ.
ດັ່ງນັ້ນ ເພື່ອເຮັດໃຫ້ການຄວບຄຸມ, ສະກັດກັ້ນ ແລະ ຕ້ານ ບັນຫາຢາເສບຕິດ ໃຫ້ມີປະສິດທິພາບ ຄະນະພັກ, ອົງການປົກຄອງແຕ່ລະຂັ້ນ ແລະ ປະຊາຊົນບັນດາເຜົ່າ ຄວນເອົາໃຈໃສ່ບາງບັນຫາສຳຄັນ ເປັນຕົ້ນແມ່ນ: ວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ຕ້ອງຢູ່ໃຕ້ການຊີ້ນຳ-ນຳພາ ໂດຍກົງ, ຮອບດ້ານ ແລະ ເດັດຂາດ ຂອງພັກ ແລະ ຫຼັກການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຖືເອົາການຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນໜ້າທີ່ອັນຮີບດ່ວນ, ປະຈັນບານ ໃນສະເພາະໜ້າ ແລະ ຍາວນານ ຂອງກຳລັງປ້ອງກັນຄວາມສະຫງົບ ໂດຍປະສານສົມທົບກັບຂະແໜງການຕ່າງໆ ນັບທັງສູນກາງ ແລະ ທ້ອງຖິ່ນຕະຫຼອດຮອດຄອບຄົວ ແລະ ທຸກຊັ້ນຄົນໃນສັງຄົມ ບັນຫາສຳຄັນ ແມ່ນການເພີ່ມທະວີວຽກງານໂຄ ສະນາ, ປຸກລະດົມທຸກຊັ້ນຄົນໃນສັງຄົມ ໃຫ້ເປັນເຈົ້າການເຂົ້າຮ່ວມວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດຢ່າງແຂງແຮງ, ປະກອບອຸປະກອນເຕັກນິກ-ເຕັກໂນໂລຊີ ທີ່ທັນສະໄໝ ແລະ ຈຳເປັນເພື່ອຮັບໃຊ້ເຂົ້າໃນວຽກງານໃຫ້ມີປະສິດທິຜົນສູງ.
ໃນພິທີໄດ້ມອບໃບສົມມະນາຄຸນໃຫ້ແກ່ຫົວໜ່ວຍນັກທຸລະກິດທີ່ໃຫ້ການຊຸກຍູ້ອຸປະຖໍາທາງດ້ານວັດຖຸປັດໃຈເຂົ້າໃນວຽກງານປ້ອງກັນຄວາມສະຫງົບແຂວງຈໍານວນ 6 ຫົວໜ່ວຍທຸລະກິດ, ຈາກນັ້ນກໍ່ໄດ້ດໍາເນີນການຈູດທໍາລາຍຢາເສບຕິດຈໍານວນດັ່ງກ່າວຢ່າງເປັນທາງການໂດຍມີພາກສ່ວນຕ່າງໆເຂົ້າຮ່ວມ.
ແຫຼ່ງຂ່າວ ຂ່າວ ປກສ ແຂວງອຸດົມໄຊ