ໃນວັນທີ 16 ກັນຍາ 2023, ຫ້ອງການເມືອງນະຄອນລີອົງ, ປະເທດຝຣັ່ງ ໄດ້ຈັດງານບຸນມະໂຫລານແຫ່ທຸງຊາດບັນດາປະເທດຕ່າງໆໃນທົ່ວໂລກ ຄັ້ງທີ 19, ຊຶ່ງໄດ້ຈັດຂຶ້ນໃນເດືອນກັນຍາ ຂອງທຸກໆປີ ແລະ ໄດ້ເຊື້ອເຊີນບັນດາສະຖານທູດ, ສະຖານກົງສູນປະເທດຕ່າງໆທີ່ມີສຳນັກງານຕັ້ງຢູ່ປະເທດຝຣັ່ງ ແລະ ເຂດໃກ້ຄຽງ ເຂົ້າຮ່ວມສະເຫຼີມສະຫຼອງແຫ່ທຸງຊາດ ແລະ ຕັ້ງຜາມໄຊຂອງປະເທດຕົນ ເພື່ອວາງສະແດງສິນຄ້າຫັດຖະກໍາໃຫ້ຜູ້ເຂົ້າຮ່ວມໄດ້ຊົມ.
ຊຶ່ງໃນປີນີ້ມີບັນດາປະເທດຕ່າງໆເຂົ້າຮ່ວມທັງໝົດ 50 ປະເທດ ແລະ ມີຜູ້ເຂົ້າຊົມ ປະມານ 100.000 ກວ່າຄົນ, ໃນປີນີ້ ສະຖານທູດເອກອັກຄະລັດຖະທູດ ແຫ່ງ ສປປ ລາວ ທີ່ປະເທດສະວິດເຊີແລນ ຮ່ວມກັບຄະນະສະມາຄົມສຳພັນຄົນລາວ ພ້ອມດ້ວຍພີ່ນ້ອງຊາວລາວທີ່ດຳລົງຊີວິດທີ່ ນະຄອນລີອົງ ປະເທດຝຣັ່ງ ເຂົ້າຮ່ວມງານດັ່ງກ່າວ ຈຳນວນ 30 ຄົນ ໂດຍມີການຈັບປ້າຍທຸງຊາດກາວົງເດືອນ, ຜູ້ຍິງລາວນຸ່ງສິ້ນໄໝບ່ຽງແພ, ເກົ້າຜົມ, ນຸ່ງເຄື່ອງຊົນເຜົ່າຂອງພີ່ນ້ອງລູກຫຼານລາວທີ່ມີສີສັນ, ເຊິ່ງເປັນເອກະລັກວັດທະນະທຳຂອງລາວຍ່າງຕາມຖະໜົນ ປະມານ 3 ກິໂລແມັດ ໄປຫາສະໜາມຫຼວງອັງໂຕແນັງ ປົງເຊ ເມືອງສີອົງ ໄດ້ມີການວາງສະແດງຮູບພາບ, ສິນຄ້າ, ເຄື່ອງຫັດຖະກຳຊົນເຜົ່າຂອງລາວ ເຊັ່ນ: ແຜ່ນພັບກ່ຽວກັບການທ່ອງທ່ຽວລາວ, ສິ້ນ, ເສື້ອ, ຜ້າຕຸ້ມ, ກະຕ່າ, ຕິບເຂົ້າ, ກອງ ພ້ອມທັງໄດ້ຂື້ນຍ່າງເດີນແບບໃສ່ຊຸດຊົນເຜົ່າ ແລະ ສະແດງສີລະປະຟ້ອນດຽວດອກຈຳປາ ຢູ່ເທິງເວທີ ຊຶ່ງເປັນການໂຄສະນາ ເຜີຍແຜ່ໃຫ້ຜູ້ເຂົ້າຮ່ວມ ກໍຄື ຊາວໂລກໄດ້ຮັບຮູ້ ແລະ ເຂົ້າໃຈຮີດຄອງປະເພນີວັດທະນະທຳການນຸ່ງຖືຂອງລາວ ທັງເປັນການສ້າງບົດບາດ ແລະ ຍົກສູງຖານະຂອງ ສປປ ລາວ ໃຫ້ສູງເດັ່ນຂຶ້ນອີກບາດກ້າວໜຶ່ງໃນເວທີສາກົນ.
ການເຂົ້າຮ່ວມງານໃນຄັ້ງນີ້, ເຫັນວ່າໄດ້ຮັບຄວາມນິຍົມຊົມຊອບ ແລະ ຄວາມສົນໃຈຈາກຜູ້ເຂົ້າຮ່ວມຢ່າງຫຼວງຫຼາຍ.
ແຫຼ່ງຂ່າວຈາກ ກົມການຂ່າວ ກະຊວງການຕ່າງປະເທດ
