ໃນວັນທີ 4 ຕຸລາ 2023 ທີ່ຜ່ານມານີ້, ເຈົ້າໜ້າທີ່ກວດກາການຄ້າ ພະແນກອຸດສະຫະກຳ ແລະ ການຄ້າ ສົມທົບກັບ ຄະນະສະເພາະກິດ ແລະ ພະນັກງານຄຸ້ມຄອງຕະຫຼາດໜອງແມງດາ ແລະ ຕະຫຼາດວັງໄຮ ລົງຕິດຕາມ, ກວດກາ ສິນຄ້າປະເພດອາຫານແຊ່ແຂງ, ສິນຄ້າໝົດອາຍຸ ແລະ ສິນຄ້າບໍ່ຕິດສະຫຼາກເປັນພາສາລາວ ຢູ່ ຕະຫຼາດເທດສະບານ ແຂວງອຸດົມໄຊ ເຊິ່ງນຳໂດຍ ທ່ານ ພິໄລທອງ ຈິດມະນີ ຮອງຫົວໜ້າພະແນກ ອຸດສາຫະກຳ ແລະ ການຄ້າ ແຂວງອຸດົມໄຊ.

ການລົງກວດກາຂອງເຈົ້າໜ້າທີ່ ຄັ້ງນີ້ ແມ່ນໄດ້ແບ່ງເປັນ 2 ທີມ, ລົງກວດກາ 2 ຕະຫຼາດ ຄື: ຕະຫຼາດວັງໄຮ, ຕະຫຼາດໜອງແມງດາ ແລະ ກວດກາ ຢູ່ ບັນດາຫ້າງຮ້ານຂາຍອາຫານແຊ່ແຂງ, ຮ້ານຂາຍຍົກ-ຂາຍຍ່ອຍ, ຊຸບເປີມາກເກັດ ແລະ ມີນິມາກ ລວມທັງໝົດ 11 ຫົວໜ່ວຍ, 9 ຫ້າງຮ້ານ.

ຜົນການລົງກວດສາມາດກວດພົບອາຫານປະເພດຕ່າງໆທີ່ໝົດອາຍຸການບໍລິໂພກຫຼາຍລາຍການ ຄື: ຮ໋ອດດ໊ອກ 25 ຖົງ, ແຈ່ວສຸກກີ້ 4 ກ້ອງ, ກຸ້ງທະເລ 25 ຖົງ, ປາເມິກດອງ 1 ກ້ອງ, ສະລະເປົາກ້ອນໃຫຍ່ ສຳເລັດຮູບ 10 ຖົງ, ມັນຝຼັ່ງ ສຳເລັດຮູບ 4 ຖົງ, ປູອັດ 3 ຖົງ, ຊີ້ນໝູສະໄລ 20 ຖົງ, ຊີ້ນສົ້ມໝູ 17 ຖົງ, ນໍ້າປາແດກ ສຳເລັດຮູບ 30 ກ້ອງ, ນ້ຳຈີ້ມໄກ່ 53 ກ້ອງ, ປາເມິກໄຂ່ 3 ກັບ, ປີກໄກ່ 12 ກິໂລ, ແຈ່ວເສສວນ 25 ຖົງ, ແຈ່ວວາສະບິ 20 ກັບ ລວມມູນຄ່າ 12. 600,000ກີບ.

ອາຫານສ່ວນຫຼາຍແມ່ນບໍ່ມີສະຫຼາກກຳນົດສິນຄ້າ ຫຼື ສະຕິກເກີ້ເປັນພາສາລາວ ແລະ ບໍ່ຮູ້ແຫຼ່ງນໍາເຂົ້າ ແລະ ໝົດກຳນົດການບໍລິໂພກ ຕໍ່ກັບສະພາບການດັງກ່າວ ທາງເຈົ້າໜ້າທີ່ໄດ້ສ້າງບົດບັນທຶກກ່າວເຕືອນ, ຖ້າຫາກຍັງມີການລະເມີດຄັ້ງຕໍ່ໄປແມ່ນຈະໄດ້ປະຕິບັດຕາມລະບຽບກົດໝາຍ.