ກໍລະນີລົດເປັນເກຍກະປຸກ ຜູ້ຂັບຂີ່ກໍຈະບໍ່ຄ່ອຍມີບັນຫາຢູ່ແລ້ວ ເພາະວ່າຈະໃຊ້ຕີນຊ້າຍຢຽບຄາດ ສ່ວນຕີນຂວາກໍຈະໃຊ້ຢຽບເບກ ແລະ ຢຽບຄັນເລັ່ງສະລັບກັນໄປ, ແຕ່ສຳລັບລົດເກຍອໍໂຕ້ ມີພຽງ 2 ແປ້ນນັ້ນກໍຄືນ ຄັນເລັ່ງ ແລະ ເບກ ສະນັ້ນຈຶ່ງເຮັດໃຫ້ມີຄົນຈຳນວນຫຼາຍທີ່ໃຊ້ຕີນທັງສອງເບື້ອງກໍຄື ຕີນຊ້າຍຢຽບເບກ ຕີນຂວາຢຽບຄັນເລັ່ງ ເຊິ່ງອາດກໍ່ໃຫ້ເກີດອັນຕະລາຍຫຼາຍ.
ເພາະວ່າການໃຊ້ຕີນຂວາຢຽບຄັນເລັ່ງ ແລະ ຕີນຊ້າຍຢຽບເບກ ອາດເຮັດໃຫ້ຜູ້ຂັບຂີ່ມີໂອກາດທີ່ຈະຢຽບທັງສອງຢ່າງນັ້ນພ້ອມກັນ ຈຶ່ງຈະເຫັນໄດ້ວ່າລົດບາງຄັນນັ້ນມີໄຟເບກແຈ້ງຂຶ້ນຄ້າງໄວ້ຕະຫຼອດ ເຖິງວ່າລົດຍັງຈະແລ່ນປົກກະຕິ ໂດຍບໍ່ໄດ້ຜ່ອນຄວາມໄວລົງກໍຕາມ ເຊິ່ງກໍລະນີນີ້ເປັນອັນຕະລາຍຕໍ່ລົດທີ່ແລ່ນຕາມຫຼັງມາ ເນື່ອງຈາກຜູ້ຂັບຂີ່ຕາມຫຼັງມາຈະບໍ່ຮູ້ວ່າລົດນັ້ນ ຈະມີການເບກແທ້ໆຍາມໃດ.
ອີກຢ່າງໜຶ່ງທີ່ຕ້ອງລະວັງນັ້ນກໍແມ່ນ ຖ້າເກີດກໍລະນີສຸກເສີນທີ່ລົດຕ້ອງຢຸດກະທັນຫັນ ອາດເຮັດໃຫ້ຜູ້ທີ່ໃຊ້ສອງຕີນອາດຫຼົງຢຽບ 2 ແປ້ນພ້ອມກັນ ເຮັດໃຫ້ໃຊ້ໄລຍະເບກຫຼາຍກວ່າທີ່ຄວນຈະເປັນ ແລະ ອາດຈະພາໃຫ້ເກີດອຸບັດຕິເຫດຍ້ອນເບກບໍ່ທັນ.
ດັ່ງນັ້ນ ການຂັບລົດເກຍອໍໂຕ້ທີ່ປອດໄພ ຄວນໃຊ້ຕີນຂວາພຽງຢ່າງດຽວໃນການຢຽບເບກ ແລະ ຢຽບຄັນເລັ່ງ ແລະ ຊ່ວຍປ້ອງກັນການເກີດອຸບັດຕິເຫດທີ່ອາດເກີດຂຶ້ນໄດ້.
ຂໍ້ມູນຈາກ vox