ນັກໄວຣັສວິທະຍາຂອງຈີນ ພ້ອມຄະນະ ອອກລາຍງານເຕືອນໂລກໃຫ້ກຽມຮັບມືກັບເຊື້ອພະຍາດໂຄໂລນາສາຍພັນໃໝ່ ທີ່ອາດຈະລະບາດໃນອະນາຄົດ ທີ່ມັນຄ້າຍຄືກັບໂຄວິດ-19 ລະບາດ.
ໃນວັນທີ 26 ກັນຍາ 2023 ດຣ ສີ ເຈິ້ງລີ່ ຜູ້ອຳນວຍການສູນພະຍາດຕິດຕໍ່ ຂອງເມືອງອູ່ຮັ່ນ ປະເທດຈີນ ແລະ ຄະນະ ອອກມາເຕືອນປະຊາຊົນ ແລະ ນັກວິທະຍາສາດທົ່ວໂລກໃຫ້ກຽມພ້ອມ ເນື່ອງຈາກພົບເຊື້ອໄວຣັສໂຄໂລນາ ສາຍພັນໃໝ່ເຖິງ 20 ສາຍພັນ ທີ່ອາດແຜ່ລະບາດສູ່ຄົນອີກໃນອະນາຄົດ.
ດຣ ສີ ເຈິ້ງລີ່ ໄດ້ສຶກສາວິໄຈເຊື້ອໄວຣັສໃນເຈຍມາຫຼາຍສິບປີ ແລະ ຄະນະນັກວິທະຍາສາດ ທີ່ສະຖາບັນໄວຣັສອູ່ຮັ່ນ ໄດ້ເຜີຍແຜ່ບົດວິໄຈໃນວາລະສານທາງການແພດ Emerging Microbes & Infections ໃນເດືອນມິຖຸນາ 2023 ຈົນສ້າງຄວາມສົນໃຈໃຫ້ແກ່ສັງຄົມ ໂດຍມີເນື້ອໃນລະບຸວ່າ ພົບເຊື້ອໄວຣັສໂຄໂລນາ ທີ່ຄວາມສ່ຽງເຖິງ 40 ສາຍພັນ ແລະ ໃນນີ້ມີ 20 ສາຍພັນ ມີຄວາມສ່ຽງສູງ ທີ່ອາດຈະແຜ່ລະບາດສູ່ຄົນ.
ນອກນີ້ ຍັງພົບວ່າ ມີ 6 ສາຍພັນ ທີ່ຮູ້ແລ້ວວ່າ ເມື່ອຕິດຕໍ່ສູ່ຄົນແລ້ວ ຈະມີອາການບໍ່ສະບາຍ ແລະ ຍັງມີຫຼັກຖານວ່າໄວຣັສອີກ 3 ສາຍພັນ ໄດ້ເຮັດໃຫ້ສັດຫຼາຍຊະນິດບໍ່ສະບາຍ ຫຼື ຕິດເຊື້ອພະຍາດໄດ້.
ທັ້ງນີ້ ດຣ ສີ ເຈິ້ງລີ່ ແລະ ຄະນະວີໄຈ ໄດ້ເຕືອນໃຫ້ໂລກຕ້ອງກຽມພ້ອມຮັບມືກັບການລະບາດຄັ້ງໃຫຍ່ ທີ່ອາດຈະເປັນຄືກັບການລະບາດຂອງໂຄວິດ-19.
ແຫຼ່ງຂ່າວ NDTV