ຕຳຫຼວດບຸກທຳລາຍໂຮງງານຜະລິດຢາກັນຍຸງເຖື່ອນ ໃນປະເທດໄທ ແລະ ຮ້ານຄ້າສົ່ງທີ່ຂາຍສິນຄ້າປະເພດນີ້ ໂດຍພົບວ່າຖ້າຫາຍໃຈຄວັນເຂົ້າໄປໃນປະລິມານຫຼາຍອາດເຮັດໃຫ້ຊັກ ແລະ ໝົດສະຕິ.
ໃນວັນທີ 22 ກັນຍາ 2023 ທີ່ຜ່ານມາ ທາງເຈົ້າໜ້າທີ່ໄທໄດ້ບຸກທຳລາຍໂຮງງານຜະລິດຢາກກັນຍຸງເຖື່ອນໃນແຂວງສະມຸດສາຄອນ ແລະ ຮ້ານຄ້າສົ່ງໃນ 3 ແຂວງ ໂດຍຍຶດຂອງກາງທີ່ມີສານເຄມີອັນຕະລາຍ 227.000 ກ່ອງ ມູນຄ່າ 4.540.000 ບາດ ຫຼື 2,5 ຕື້ກີບ.
ທາງກົມອາຫານ ແລະ ຢາ ປະເທດໄທ ຫຼື ອຍ ກວດພົບຢາຈູດການຍຸງຈີນ ຍີ່ຫໍ້ Goldeer ແລະ Laojun ບໍ່ມີພາສາໄທໃນກ່ອງ ບໍ່ມີເລກຜະລິດຕະພັນ ວາງຈຳໜ່າຍໃນອອນລາຍ ແລະ ຕາມຮ້ານຄ້າຍ່ອຍ ທີ່ໜ້າກ່ອງເປັນຮູບເດັກນ້ອຍ ຈຶ່ງເຮັດໃຫ້ປະຊາຊົນເຂົ້າໃຈຜິດວ່າບໍ່ມີສານເຄມີອັນຕະລາຍ ແຖມຍັງລາຄາຖືກ ພຽງ 18-20 ບາດ ຫຼື ບໍ່ຮອດ 15.000 ກີບ ເຮັດໃຫ້ເປັນທີ່ນິຍົມຂອງປະຊາຊົນທົ່ວໄປ.
ເມື່ອ ອຍ ນຳມາກວດ ກໍພົບສານເຄມີໃນກຸ່ມ Pyrethriods, Meperfluthrin ແລະ Dimefluthrin ເປັນພິດຕໍ່ຄົນ ແລະ ສັດ ຖ້າດົມຄວັນມັນເຂົ້າໄປໃນປະລິມານຫຼາຍ ກໍຈະເຮັດໃຫ້ຮູ້ສຶກມຶນງົງ ເຈັບຫົວ ຫ້າມຊີ້ນກະຕຸກ ອ່ອນເພຍ ຊັກ ແລະ ໝົດສະຕິ.
ຈາກການສອບສວນກໍພົບວ່າ ເຈົ້າຂອງໂຮງງານສັ່ງຊື້ຢາຈູດກັນຍຸງຊະນິດຂົດສີດຳມາຈາກປະເທດຈີນ ນຳເຂົ້າມາເພື່ອອົບສານເຄມີທີ່ໃຊ້ໄລ່ຍຸງແທ້ ໂດຍສານເຄມີດັ່ງກ່າວ ກໍບໍ່ໄດ້ອະນຸຍາດໃຫ້ນຳເຂົ້າ ແລະ ຜະລິດເພື່ອຈຳໜ່າຍແຕ່ຢ່າງໃດ.
ທັ້ງນີ້ ປະເທດລາວເຮົາກໍມັກຈະນຳເຂົ້າສິນຄ້າມາຈາກປະເທດໄທເປັນສ່ວນໃຫຍ່ ຈຶ່ງຢາກໃຫ້ທຸກຄົນລະວັງສິນຄ້າປະເພດນີ້ ເພາະອາດມີສິນຄ້າປະເພດນີ້ນຳເຂົ້າມາພາຍໃນປະເທດລາວ.
ແຫຼ່ງຂ່າວ Thairath