ເຈົ້າຄອງນະຄອນເມືອງເດີນາ ປະເທດລິເບຍ, ເຊິ່ງໄດ້ຮັບຄວາມເສຍຫາຍຫຼາຍທີ່ສຸດຈາກໄພນໍ້າຖ້ວມໃນພາກຕາເວັນອອກສຽງເຫນືອ, ຄາດວ່າ ຈຳນວນຜູ້ເສຍຊີວິດຂອງເມືອງອາດຈະສູງເຖິງ 20,000 ຄົນ.
ອີງຕາມສຳນັກຂ່າວ Al Jazeera ລາຍງານວ່າ ປະຊາຊົນໃນເມືອງ ເດີນາ ຂອງລິເບຍ ຍັງພະຍາຍາມຊອກຫາຍາດພີ່ນ້ອງ ແລະຄົນຮັກທີ່ສູນຫາຍ ໃນເຫດການນໍ້າຖ້ວມຄັ້ງຮ້າຍແຮງ ທີ່ເລີ່ມຂຶ້ນໃນທ້າຍອາທິດຜ່ານມາ. ຂະນະດຽວກັນເຈົ້າໜ້າທີ່ກູ້ໄພກໍຮຽກຮ້ອງຂໍເອົາຖົງຫໍ່ສົບຕື່ມອີກຈາກລັດຖະບານ ຫຼັງຈາກໄດ້ພົບເຫັນສົບຫຼາຍພັນຄົນ ແລະ ສົບຫຼາຍສົບໄດ້ຖືກກະແສນ້ຳພັດລົງໄປໃນທະເລ.
ພົນໂທ ຕາເຮກ ອັນ-ຄາລາດ ໂຄສົກກະຊວງພາຍໃນລີເບຍ ກ່າວຕໍ່ອົງການຂ່າວ AFP ໃນວັນພຸດທີ 13 ກັນຍາ 2023 ຜ່ານມານີ້ວ່າວ່າ ມາຮອດປັດຈຸບັນ ໄດ້ພົບເຫັນຊາກສົບແລ້ວ 3,840 ຄົນທີ່ເມືອງເດີນາ ແຫ່ງດຽວ, ໃນນັ້ນ 3,190 ຄົນໄດ້ຖືກຝັງ ໃນນັ້ນມີຊາວຕ່າງປະເທດຢ່າງໜ້ອຍ 400 ຄົນ, ສ່ວນໃຫຍ່ແມ່ນຊາວຊູດານ ແລະ ຊາວເອຢິບ.
ຂະນະເຈົ້າຄອງນະຄອນເດີນາ ກ່າວຕໍ່ສະຖານີໂທລະພາບທ້ອງຖິ່ນວ່າ: ພວກເຂົາເຈົ້າຄາດຄະເນວ່າຈໍານວນຜູ້ເສຍຊີວິດໃນຕົວເມືອງສາມາດບັນລຸລະຫວ່າງ 18,000-20,000 ຄົນ ເມື່ອເບິ່ງຈໍານວນເມືອງທີ່ຖືກທໍາລາຍໂດຍໄພນໍ້າຖ້ວມ.
ທາງການລີເບຍ ໄດ້ປະເມີນວ່າ ຈຳນວນຜູ້ສູນຫາຍໃນໄພນໍ້າຖ້ວມ ຢູ່ທີ່ປະມານ 10,000 ຄົນ ຂະນະທີ່ ຫ້ອງການປະສານງານດ້ານມະນຸດສະທໍາຂອງອົງການສະຫະປະຊາຊາດ (OCHA) ກ່າວວ່າ ມີຜູ້ສູນຫາຍຢ່າງໜ້ອຍ 5,000 ຄົນ.
ທີ່ມາ: ໄທລັດ