ເຈົ້າໜ້າທີ່ຈັບກຸມຜູ້ລົງມືກໍ່ເຫດຍິງຊາຍຊາວຈີນ ຢູ່ທາງແບ່ງຫຼັກຊາວ ມາດຳເນີນການສອບສວນ ຜູ້ກ່ຽວສາລະພາບກໍ່ເຫດຍ້ອນຄຽດແຄ້ນທີ່ຜູ້ໄດ້ຮັບບາດເຈັບເວົ້າໃຫ້ວ່າເປັນຄົນບໍ່ດີ ແລະ ພ້ອມທ້າທາຍໃຫ້ໄປຫາຢູ່ທາງແບ່ງຫຼັກຊາວ ແຂວງບໍລິຄຳໄຊ.
ເຈົ້າໜ້າທີ່ ປກສ ແຂວງບໍລິຄຳໄຊ ໃຫ້ຮູ້ວ່າ: ຕອນເຊົ້າ ວັນທີ 10 ກັນຍາ 2023 ມີເຫດຍິງກັນຢູ່ທາງເລກທີ 13 ໃຕ້ ເຂດບ້ານວຽງຄໍາ ເມືອງປາກກະດິງ ແຂວງບໍລິຄໍາໄຊ, ເຈົ້າໜ້າທີ່ໄດ້ທໍາການກວດກາຊັນນະສູດສະຖານທີ່ເກີດເຫດ ພົບເຫັນຄົນໄດ້ຮັບບາດເຈັບ 1 ຄົນຊື່ທ້າວ ອາຫຼົງ ອາຊີບກໍາມະກອນ ເຊື້ອຊາດ ແລະ ສັນຊາດຈີນ, ພັກເຊົາຢູ່ບ້ານນາພົງ ເມືອງປາກກະດິງ ແຂວງບໍລິຄໍາໄຊ, ຖືກປືນຍິງເຂົ້າບໍລິເວນຫົວ 1 ລູກ, ຕົກມາຮອດເວລາປະມານ 11:00 ໂມງ ຂອງວັນດຽວກັນ ກໍສາມາດຈັບຕົວຜູ້ກໍ່ເຫດໄດ້ ຊື່ທ້າວ ຈາວເຈຍເຫວ (ອາວີ) ອາຍຸ 35 ປີ ອາຊີບກໍາມະກອນ ເຊື້ອຊາດ ແລະ ສັນຊາດຈີນ ປັດຈຸບັນແມ່ນພັກເຊົາຢູ່ ບ້ານນາຄ່າ ເມືອງນາຊາຍທອງ ນະຄອນຫຼວງວຽງຈັນ ມາດໍາເນີນການສືບສວນ-ສອບສວນ.
ທ້າວ ຈາວ ເຈຍ ເຫວ ສາລະພາບຕໍ່ເຈົ້າໜ້າທີ່ວ່າ: ໃນທ້າຍເດືອນສິງຫາ 2023 ຜູ້ກ່ຽວກັບໝູ່ອີກ 2 ຄົນ ໄດ້ໄປນັ່ງດື່ມເບຍຢູ່ຮ້ານອາຫານແຫ່ງໜຶ່ງໃກ້ກັບຕະຫຼາດຊັງຈຽງ ເມືອງສີໂຄດຕະບອງ ນະຄອນຫຼວງວຽງຈັນ ໂດຍນັ່ງດື່ມຢູ່ ຂ້າງໂຕະຂອງທ້າວ ອາຫຼົງ ເຊິ່ງ ທ້າວ ອາຫຼົງ ໄດ້ເວົ້າໃຫ້ຜູ້ກ່ຽວວ່າ ເປັນຄົນບໍ່ດີ ເສບຢາບ້າ ພ້ອມທັງເວົ້າທ້າທາຍວ່າ ຖ້າມຶງເກັ່ງລົງໄປຫາຢູ່ທາງແບ່ງ ຫຼັກຊາວ ເມືອງປາກກະດິງໂລດ ດ້ວຍເຫດນີ້ ຈຶ່ງເຮັດໃຫ້ຜູ້ກ່ຽວມີຄວາມຄຽດແຄ້ນ.
ຮອດວັນທີ 9 ກັນຍາ 2023 ເວລາທ່ຽງຄືນ ທ້າວ ຈາວ ເຈຍ ເຫວ ໄດ້ເສບຢາບ້າ 2 ເມັດພ້ອມດື່ມເຫຼົ້າຂາວໝົດ ເຄິ່ງຕຸກນ້ອຍ ແລ້ວຄິດຮອດຄຳເວົ້າຂອງທ້າວ ອາຫຼົງ ທີ່ເວົ້າໃຫ້ໃນມື້ນັ້ນແລ້ວຄິດຄຽດແຄ້ນ ຈິ່ງເອົາປືນສັ້ນຢູ່ຫ້ອງນອນ ແລ້ວລັກເອົາລົດ ກະບະວີໂກ້ຂອງແມ່ຜູ້ກ່ຽວຂັບຂີ່ອອກໄປແຂວງບໍລິຄຳໄຊ, ຮອດບ້ານວຽງຄຳ ເມືອງປາກກະດິງ ໃນເວລາປະມານ 9 ໂມງວັນທີ 10 ກັນຍາ 2023 ໄດ້ຂີ່ລົດຊອກຫາທ້າວ ອາຫຼົງ ໄດ້ພົບເຫັນລົດຂອງທ້າວ ອາຫຼົງ ຈອດຢູ່ຕໍ່ໜ້າຮ້ານຂາຍເຄື່ອງ 4 ແຍກບ້ານວຽງຄໍາ ຈິ່ງໄດ້ຈັບເອົາປືນສັ້ນທີ່ກຽມມາ ຍ່າງໄປຫາທ້າວ ອາຫຼົງ ທີ່ກຳລັງກົ້ມເລືອກຊື້ເຄື່ອງຢູ່ໃນຮ້ານ ແລ້ວຍົກປືນຍິງໃສ່ຫົວ ທ້າວ ອາຫຼົງ ທັນທີ 1 ນັດ ໃນໄລຍະຫ່າງ 1 ແມັດ ເຫັນ ທ້າວ ອາຫຼົງ ລົ້ມລົງກັບທີ່ ຜູ້ກ່ຽວຈິ່ງຮີບເອົາຕົວຫຼົບໜີ ຂັບຂີ່ລົດຂຶ້ນມາວຽງຈັນ ແຕ່ຮອດຕໍ່ໜ້າຫ້ອງການ ປກສ ເມືອງປາກກະດິງ ກໍຖືກເຈົ້າໜ້າທີ່ຈັບຕົວໄດ້.
