ຈີນຮ່າງກົດໝາຍວ່າດ້ວຍຫ້າມເຜີຍແຜ່ຄຳເວົ້າ ແລະ ຫ້າມໃສ່ເສື້ອຜ້າທີ່ຈະກະທົບຈິດວິນຍານຄວາມເປັນຈີນ ຖ້າຜູ້ໃດລະເມີດ ຈະຖືກຈຳຄຸກ 15 ມື້ ຫຼື ປັບໃໝ 5.000 ຢວນ.
ໃນເມື່ອບໍ່ດົນທີ່ຜ່ານມາ ຈີນຮ່າງກົດໝາຍຫ້າມການເວົ້າ ແລະ ການນຸ່ງຖືທີ່ຈະເປັນອັນຕະລາຍຕໍ່ຈິດວິນຍານຂອງຄາມເປັນຈີນ ຖ້າກົດໝາຍມີຜົນບັງຄັບໃຊ້ ຜູ້ທີ່ກະທຳຜິດຈະໄດ້ຮັບໂທດປັບໃໝ ຈົນເຖິງຈຳຄຸກ ໂດຍການຮ່າງກົດໝາຍດັ່ງກ່າວນັ້ນ ເປັນປະເດັນໃນສັງຄົມຈີນທີ່ເຫັນວ່າມັນຫຼາຍເກີນໄປ ແລະ ໄຮ້ສາລະ.
ຂະນະດຽວກັນ ຜູ້ຊ່ຽວຊານດ້ານກົດໝາຍກໍສະແດງຄວາມກັງວົນກ່ຽວກັບກົດໝາຍສະບັບນີ້ ເນື່ອງຈາກວ່າມັນບໍ່ຊັດເຈນ ແລະ ອາດເຮັດໃຫ້ພາກລັດໃຊ້ອຳນາດເກີນກວ່າເຫດ.
ທັ້ງນີ້ ທາງການຈີນໄດ້ເປີດເຜີຍແຜນປັບປຸງກົດໝາຍຄວາມໝັ້ນຄົງຂອງປະເທດ ນັບເປັນການປະຕິຮູບກົດໝາຍຄວາມໝັ້ນຄົງ ຄັ້ງທຳອິດໃນຮອບຫຼາຍທົດສະວັດ.
ເບື້ອງຕົ້ນ ມີລາຍງານວ່າ ຜູ້ທີ່ເວົ້າ ຫຼື ເຜີຍແຜ່ບົດຄວາມທີ່ທຳຮ້າຍຈິດໃຈຄົນຈີນ ແລະ ຜູ້ທີ່ນຸ່ງຖື ຫຼື ບັງຄັບໃຫ້ຜູ້ອື່ນນຸ່ງຖືເຄື່ອງນຸ່ງທີ່ກະທົບກະເທືອນຈິດວິນຍານຈີນ ອາດມີໂທດຈຳຄຸກເຖິງ 15 ມື້ ແລະ ປັບໃໝສູງສຸດ 5.000 ຢວນ ຫຼື ປະມານ 13 ລ້ານກີບ.
ນອກນີ້ ໃນຮ່າງກົດໝາຍຍັງລວມເຖິງ ການຫ້າມໝິ່ນ ໃສ່ຮ້າຍ ແລະ ລະເມີດຊື່ສຽງຂອງວິລະບູລຸດຜູ້ເສຍສະຫຼະຂອງຈີນອີກດ້ວຍ.
ແຫຼ່ງຂ່າວ BBC