ໃນວັນທີ 1 ກັນຍາ 2023 ທີ່ ກະຊວງການຕ່າງປະເທດ, ໄດ້ມີພິທີມອບ-ໂອນ ວຽກງານຂອງຄະນະກໍາມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ ຈາກກະຊວງແຮງງານ ແລະ ສະຫວັດດີການສັງຄົມ ໄປຂຶ້ນກັບ ກະຊວງການຕ່າງປະເທດ ຢ່າງເປັນທາງການ ໂດຍແມ່ນທ່ານ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ເປັນຜູ້ມອບ ແລະ ທ່ານ ຮອງນາຍົກລັດຖະມົນຕີ, ລັດຖະມົນຕີ ກະຊວງການຕ່າງປະເທດ ເປັນຜູ້ຮັບ, ໂດຍການເປັນກຽດເຂົ້າຮ່ວມເປັນສັກຂີພະຍານຂອງຄະນະນໍາຈາກກະຊວງ ຂະແໜງການຕ່າງໆທີ່ກ່ຽວຂ້ອງ.
ເນື້ອໃນຂອງການມອບ-ໂອນ ແມ່ນການມອບໃນເບື້ອງຕົ້ນດ້ານໂຄງປະກອບການຈັດຕັ້ງ, ການລາຍງານ ແລະ ການຄຸ້ມຄອງ-ບໍລິຫານຂອງຄະນະກໍາມະການຄຸ້ມຄອງແຫ່ງຊາດ ເພື່ອການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ (ຄຊກລ) ທຸກຂັ້ນນັບແຕ່ສູນກາງຮອດທ້ອງຖິ່ນ, ສ່ວນໂຄງການເກັບກູ້ລະເບີດແຫ່ງຊາດລາວ (ຄກລ) ແມ່ນສືບຕໍ່ຢູ່ພາຍໃຕ້ການຄຸ້ມຄອງຊີ້ນຳຂອງ ກະຊວງແຮງງານ ແລະ ສະຫວັດດີການສັງຄົມ.
ວຽກງານການແກ້ໄຂບັນຫາລະເບີດບໍ່ທັນແຕກ ແມ່ນໜຶ່ງໃນບຸລິມະສິດຂອງລັດຖະບານ ສປປ ລາວ ແລະ ໄດ້ຖືກກຳນົດເຂົ້າໃນວາລະແຫ່ງຊາດສະເໝີມາ; ຄວາມພະຍາຍາມຂອງລັດຖະບານ ສປປ ລາວ ໃນການແກ້ບັນຫາລະເບີດບໍ່ທັນແຕກ (ລບຕ) ໄດ້ລິເລີ່ມນັບແຕ່ຫຼັງປະເທດຊາດຖືກປົດປ່ອຍ. ຈົນມາຮອດປີ 2004 ລັດຖະບານ ຈຶ່ງໄດ້ສ້າງຕັ້ງ ຄະນະກຳມະການຄຸ້ມຄອງແຫ່ງຊາດ ວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ) ທີ່ປະກອບມີກະຊວງ, ຂະແໜງການກ່ຽວຂ້ອງ ເພື່ອເປັນກົນໄກສູນກາງໃນການຄຸ້ມຄອງ, ຊີ້ນຳວຽກງານດັ່ງກ່າວໃຫ້ເປັນໄປຕາມເປົ້າໝາຍ ໂດຍໄດ້ມີການປັບປຸງກົນໄກດັ່ງກ່າວຢ່າງເປັນປະຈຳຄື: ຜ່ານມາ ຄຊກລ ແມ່ນຂຶ້ນກັບກະຊວງແຮງງານ ແລະ ສະຫວັດດີການສັງຄົມ, ຫ້ອງການສຳນັກງານນາຍົກລັດຖະມົນຕີ ຊຶ່ງການປັບປຸງໂຄງຮ່າງການຈັດຕັ້ງຂອງວຽກງານ ລບຕ ດັ່ງກ່າວແມ່ນສິ່ງທີ່ຈຳເປັນ ທີ່ລັດຖະບານຕ້ອງໄດ້ທົບທວນການປະຕິບັດ ແລະ ປັບປຸງພັດທະນາໃຫ້ດີຂຶ້ນເລື້ອຍໆ ເພື່ອໃຫ້ແທດເໝາະກັບສະພາບການຕົວຈິງໃນແຕ່ລະໄລຍະ.
ແຫຼ່ງຂ່າວ ປະເທດລາວ