ທາງການຈີນອອກປະກາດເຕືອນໄພສີແດງ ທີ່ເປັນການເຕືອນໄພລະດັບສູງສຸດ ຈາກພາຍຸໄຕ້ຝຸ່ນຊາວລາ (Saola) ກຳລັງປົກຄຸມທາງຕາເວັນອອກສຽງໃຕ້ຂອງປະເທດຈີນ ແລະ ຂຶ້ນຝັ່ງຂອງມົນທົນກວາງຕຸ້ງ ແລະ ຮົງກົງ ໃນຕອນສວຍຂອງວັນທີ 31 ສິງຫາ ຫາ ຄືນວັນທີ 1 ກັນຍາ ອາດເປັນ 1 ໃນ 5 ຂອງພາຍຸໄຕ້ຝຸ່ນທີ່ແຮງທີ່ສຸດ.
ຜົນຂອງພາຍຸ ເຮັດໃຫ້ເມືອງເສິນເຈິ້ນໄດ້ສັ່ງຢຸດການຮຽນການສອນໃນສະຖານຮັບລ້ຽງເດັກ ໂຮງຮຽນອະນຸບານ ຊັ້ນປະຖົມ ແລະ ມັດຖະຍົມ ພ້ອມທັງລະງັບເສັ້ນທາງລົດໄຟສາຍຫຼັກ ທີ່ຈະເດີນທາງໄປມົນທົນກວາງຕຸ້ງ.
ທາງດ້ານກົມອຸຕຸວິທະຍາຮົງກົງ ປະກາດເຕືອນໄພ T3 ລະຫວ່າງ 15:00-17:00 ໂມງ ໃຫ້ປະຊາຊົນລະວັງລົມແຮງ ຄື້ນສູງ ໃຫ້ຢູ່ຫ່າງຈາກບໍລິເວນແຄມຝັ່ງທະເລ ແລະ ງົດກິດຈະກຳທາງນ້ຳ ພ້ອມຍົກເລີກຊັ້ນຮຽນອະນຸບານ ແລະ ໂຮງຮຽນເດັກພິການ ໂດຍຄາດວ່າພາຍຸໄຕ້ຝຸ່ນຊາວລາ ຈະເຂົ້າຮົງກົງຫຼາຍທີ່ສຸດໃນວັນທີ 1-2 ກັນຍາ ດ້ວຍຄວາມໄວ 210 ກມ/ຊົ່ວໂມງ ເປັນພາຍຸແຮງທີ່ສຸດ ທີ່ຮົງກົງນັບແຕ່ພາຍຸໄຕ້ຝຸ່ນມັງຄຸດໃນ 5 ປີກ່ອນ ເຊິ່ງເຮັດໃຫ້ສະພາບອາກາດມີຝົນຕົກໜັກຕໍ່ເນື່ອງ ແລະ ລົມແຮງຂຶ້ນ.
ແຫຼ່ງຂ່າວ Reuters