ໃນປີ 2024 ນີ້, ສປປ ລາວ ໄດ້ຮັບກຽດເປັນປະທານອາຊຽນ ໂດຍຈະໄດ້ເປັນເຈົ້າພາບຈັດກອງປະຊຸມສຳຄັນຕ່າງໆ, ລວມທັງ ກອງປະຊຸມ ລັດຖະມົນຕີທ່ອງທ່ຽວອາຊຽນ ຄັ້ງທີ 27, ກອງປະຊຸມ ປິ່ນອ້ອມ ແລະ ງານວາງສະແດງການທ່ອງທ່ຽວອາຊຽນ ເຊິ່ງຈະເປັນໂອກາດອັນດີ ໃຫ້ແກ່ບັນດາບໍລິສັດທ່ອງທ່ອງຂອງລາວ ສາມາດເຂົ້າເຖິງຕະຫລາດໂດຍກົງ, ຈະມີເງື່ອນໄຂສະດວກ, ການໃຊ້ຈ່າຍຈະບໍ່ແພງ ເພາະເຮົາບໍ່ໄດ້ເສຍຄ່າເດີນທາງ, ບໍ່ໄດ້ເສຍຄ່າປີຍົນເພາະຈັດຢູ່ບ້ານເຮົາ ເຮັດໃຫ້ບໍລິສັດທ່ອງທ່ຽວສາມາດໃຊ້ໂອກາດນີ້ ເປັນປະໂຫຍດໃຫ້ແກ່ການຊື້-ຂາຍ ແລະ ການທ່ອງທ່ຽວ.
ທ່ານ ຄົມ ດວງຈັນທາ ຫົວໜ້າກົມໂຄສະນາການທ່ອງທ່ຽວ, ກະຊວງຖະແຫລງຂ່າວ, ວັດທະ ນະທໍາ ແລະ ທ່ອງທ່ຽວລາວ ໄດ້ໃຫ້ຮູ້ກ່ຽວກັບການກະກຽມຄວາມພ້ອມຮອບດ້ານ ໃນງານດັ່ງກ່າວ ໂດຍສະເພາະ ງານວາງສະແດງການທ່ອງທ່ຽວ, ວາງແດງຜະລິດຕະພັນການທ່ອງທ່ຽວ, ການພົບປະ, ຊື້-ຂາຍ ລາຍການທ່ອງທ່ຽວ (Buyers meet Sellers) ຂອງຜູ້ປະກອບການທຸລະກິດທ່ອງທ່ຽວອາຊຽນ ແລະ ສາກົນ. ປັດຈຸບັນ ແມ່ນໄດ້ເປີດເວັບໄຊ ເອທີເອັບ(ATF) ເຊິ່ງຜູ້ແທນທີ່ສົນໃຈຢາກເຂົ້າມາຮ່ວມງານວາງສະແດງ ສາມາດເຂົ້າເຖິງຂໍ້ມູນ ແລະ ເຂົ້າລົງທະບຽນຜ່ານເວັບໄຊ, ງານວາງສະແດງດັ່ງກ່າວ ເປັນງານກ່ຽວກັບທຸລະກິດ ບໍລິສັດທ່ອງທ່ຽວທົ່ວໂລກ ຈະເດີນທາງເຂົ້າມາຊື້-ຂາຍລາຍ ການທ່ອງທ່ຽວນໍາບັນດາປະເທດສະມາຊິກ ແລະ ປະເທດຕ່າງໆທີ່ສົນໃຈເຂົ້າມາ.
ວາງສະແດງການທ່ອງທ່ຽວ ຈະຈັດທີ່ສູນການຄ້າລາວ-ໄອເຕັກ ນະຄອນຫລວງວຽງຈັນ ຄາດວ່າຈະມີຮ້ານວາງສະແດງປະທານ 300-350 ຮ້ານ, ສິນຄ້າທີ່ຈະນຳໄປວາງສະແດງສ່ວນໃຫຍ່ ຈະແມ່ນການຊຶ້-ຂາຍລາຍການທ່ອງທ່ຽວເຊິ່ງກັນ ແລະ ກັນ. ນອກຈາກນີ້, ບັນດາ ກິດຈະການທີ່ຕິດພັນກັບການທ່ອງທ່ຽວ ເປັນຕົ້ນ ບໍລິສັດທ່ອງທ່ຽວ, ບັນດາໂຮງແຮມ, ຮີສອດ ທີ່ເປັນເຂື່ອຄາຍການທ່ອງ ທ່ຽວ ກໍສາມາດມາຮ່ວມໃນງານນີ້ໄດ້. ສະນັ້ນ, ສປປ ລາວ ຈະຖືໂອກາດນີ້, ໂຄສະນາຢ່າງແຂງແຮງ ບັນດາແຫລ່ງທ່ອງທ່ຽວທີ່ເຮົາມີ, ການຕ້ອນຮັບທີ່ອົບອຸ່ນ, ຍິ້ມແຍ້ມແຈ່ມໃສ່ ແລະ ການອຳນວຍຄວາມສະດວກຕ່າງໆ ເພື່ອສ້າງຄວາມປະທົບໃຈໃຫ້ແກ່ສາກົນ ເພື່ອດຶງດູດນັກທ່ອງທ່ຽວເຂົ້າມາທ່ອງທ່ຽວ ສປປ ລາວ ນັບມື້ຫລາຍຂຶ້ນ.
ທີ່ມາ: ຂປລ