ນັກສຶກສາລາວຈໍານວນ 350 ຄົນສົກຮຽນ 2023-2024 ໄດ້ທຶນລັດຖະບານຈີນ ເພື່ອໄປສຶກສາຕໍ່ຢູ່ສປ ຈີນ, ງານລ້ຽງສົ່ງນັກສຶກສາລາວ ໄດ້ຈັດຂຶ້ນໃນວັນທີ 24 ສິງຫານີ້ ທີ່ນະຄອນຫຼວງວຽງຈັນ ເຊິ່ງຈັດໂດຍສະຖານທູດສປ ຈີນ ປະຈໍາສປປ ລາວ, ໂດຍມີ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ຫວາງສາງ (Wang Chang) ອຸປະທູດສະຖານເອກອັກຄະລັດຖະທູດສປ ຈີນ ປະຈໍາ ສປປ ລາວ, ພ້ອມດ້ວຍແຂກຖືກເຊີນ, ພາກສ່ວນກ່ຽວຂ້ອງສອງຝ່າຍລາວ-ຈີນ, ແລະ ນັກສຶກສາທີ່ໄດ້ທຶນເຂົ້າຮ່ວມ.
ໃນໂອກາດນີ້, ທ່ານ ຫວາງສາງ ອຸປະທູດສະຖານເອກອັກຄະລັດຖະທູດສປ ຈີນ ປະຈໍາສປປ ລາວ ໄດ້ກ່າວສະແດງຄວາມຍິນດີຕໍ່ນັກສຶກສາລາວທີ່ໄດ້ຮັບທຶນການສຶກສາຄັ້ງນີ້ວ່າ: ພັກ-ລັດຈີນເອົາໃຈໃສ່ສູງຕໍ່ການພັດທະນາພາລະກິດການສຶກສາ ໃນການສົ່ງເສີມວຽກງານການສຶກສາຂອງຕົນ ພ້ອມທັງຮ່ວມມືດ້ານການສຶກສາຢ່າງຕັ້ງໜ້າກັບນັກສຶກສາຂອງປະເທດທີ່ຢູ່ລຽບຕາມໜຶ່ງແລວໜຶ່ງເສັ້ນທາງປະກອບມີ ສປປ ລາວ, ໂດຍສະເພາະຊາວໜຸ່ມລາວ. ປັດຈຸບັນ, ນັກສຶກສາລາວທີ່ໄປຮຽນຕໍ່ຕ່າງປະເທດກາຍເປັນອັນດັບ 2 ແລະ ລາວຍັງເປັນປະເທດເພື່ອນບ້ານທີ່ໄດ້ຮັບທຶນການສຶກສາຈາກຈີນຫຼາຍທີ່ສຸດ. ຂ້າພະເຈົ້າເຊື່ອໝັ້ນວ່ານັກສຶກສາດັ່ງກ່າວຈະກາຍເປັນຂົວຕໍ່ໃນການຮັດແໜ້ນສາຍພົວພັນລະຫວ່າງ ສອງພັກສອງລັດ ແລະ ປະຊາຊົນສອງຊາດລາວ-ຈີນ, ຈີນ-ລາວ.
ສປ ຈີນ ຍິນດີສ້າງບຸກຄະລາກອນທີ່ດີໃຫ້ຫຼາຍກວ່າເກົ່າແກ່ປະເທດລາວ, ສ້າງຜູ້ສືບທອດໄມຕີຈິດມິດຕະພາບຈີນ-ລາວທີ່ໂດດເດັ່ນໃຫ້ຫຼາຍກວ່າເກົ່າ, ເພື່ອກາຍເປັນຜູ້ສືບທອດຄວາມສີວິໄລໃນຕໍ່ໜ້າ.
ປັດຈຸບັນມີນັກສຶກສາລາວທີ່ໄດ້ທຶນຈາກລັດຖະບານຈີນ ກໍາລັງເຂົ້າຮຽນຢູ່ມະຫາວິທະຍາໄລແຫ່ງຕ່າງໆຂອງປະເທດຈີນ ຈໍານວນ 350 ທຶນຕໍ່ປີ, ໃນລະດັບຊັ້ນສູງ, ປະລິນຍາຕີ, ປະລິນຍາໂທ, ປະລິນຍາເອກ. ນອກຈາກນີ້ຍັງມີການແລກປ່ຽນບຸກຄະລາກອນໄປຝຶກອົບຮົມໄລຍະສັ້ນ-ຍາວຮ່ວມກັນ.
ແຫຼ່ງຂ່າວ CRI