ໃນວັນທີ 24 ສິງຫາ 2023 ລັດວິສາຫະກິດໄຟຟ້າລາວ ໄດ້ອອກແຈ້ງການ ໂຈະຮັບເອກະສານຄໍາຮ້ອງສະເໜີຂໍຊົມໃຊ້ໄຟຟ້າ ເຂົ້າໃນໂຄງການຂຸດຄົ້ນຊັບສິນດິຈິຕອນ.
ເນື່ອງຈາກໃນໄລຍະ 6 ເດືອນຕົ້ນ ປີ 2023, ສປປ ລາວ ໄດ້ພົບສະພາບໄພແຫ້ງແລ້ງ, ເປັນຊ່ວງທີ່ອາກາດຮ້ອນອົບເອົ້າ ເຮັດໃຫ້ມີຄວາມຕ້ອງການ ຊົມໃຊ້ໄຟຟ້າສູງທີ່ສຸດຂອງປີ; ປະລິມານນໍ້າທໍາມະຊາດທີ່ໄຫຼເຂົ້າອ່າງຕົວຈິງຂອງແຕ່ລະເຂື່ອນ ແມ່ນຫຼຸດຈາກແຜນຄາດຄະເນຈໍານວນຫຼາຍ ແລະ ອີງຕາມການພະຍາກອນຂອງ ກົມອຸຕຸນິຍົມສາກົນ ແມ່ນຄາດຄະເນວ່າ ຈະເປັນປີ El Nino (ເປັນປີທີ່ແຫ້ງແລ້ງ) ອາດມີການແກ່ຍາວເປັນເວລາ 2 ປີ ຕິດຕໍ່ກັນ. ແຫຼ່ງຜະລິດພະລັງງານໄຟຟ້າພາຍ ໃນປະເທດ ສ່ວນໃຫຍ່ທີ່ມີສັນຍາຂາຍໄຟຟ້າເຂົ້າລະບົບ ຂອງ ຟຟລ ແມ່ນເປັນພະລັງງານນໍ້າ ກວມເອົາ 95% ຂອງ ສັດສ່ວນທັງໝົດ.
ສະນັ້ນ, ຕໍ່ກັບສະພາບການທີ່ກ່າວມານັ້ນ ເພື່ອເປັນການວາງແຜນຮັບມືໃນການບໍລິຫານຈັດການ ພະລັງງານ ບໍ່ໃຫ້ຕິດລົບກັບສັນຍາແລກປ່ຽນພະລັງງານລາວ-ໄທ ກັບການໄຟຟ້າຝ່າຍຜະລິດ ແຫ່ງ ປະເທດໄທ (EGAT) ແລະ ເພື່ອໃຫ້ສາມາດສະໜອງພະລັງງານໄຟຟ້າຮັບໃຊ້ແກ່ສັງຄົມພຽງພໍ ໃນຊ່ວງປີ 2023 ແລະ ລະດູແລ້ງ ປີ 2024 ທີ່ຈະມາເຖິງນີ້; ຟຟລ ຈຶ່ງແຈ້ງຂໍໂຈະຮັບເອກະສານ ຄໍາຮ້ອງສະເຫນີຂໍຊົມໃຊ້ໄຟຟ້າ ເຂົ້າໃນໂຄງການຂຸດຄົ້ນຊັບສິນດິຈິຕອນໄວ້ກ່ອນ, ນັບຕັ້ງແຕ່ວັນທີ 28/8/2023 ເປັນຕົ້ນໄປ ຈົນກວ່າ ຟຟລ ຈະມີຄວາມ ພ້ອມໃນການສະໜອງພະລັງງານໄຟຟ້າ ແລະ ມີແຈ້ງການປ່ຽນແທນສະເພາະຕື່ມ.
