ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ໄດ້ລາຍງານກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານໄລຍະກາງສະໄໝ ປີ 2021-2023, ທິດທາງແຜນການທ້າຍສະໄໝ ປີ 2023-2025 ແລະ ໄລຍະ 6 ເດືອນຕົ້ນປີ, ທິດທາງ 6 ເດືອນທ້າຍປີ 2023.
ຕໍ່ກອງປະຊຸມສະໄໝສາມັນ ເທື່ອທີ່ 5 ຂອງສະພາປະຊາຊົນແຂວງຄໍາມ່ວນ ຊຸດທີ II ໃນວັນທີ 22 ສິງຫາ 2023 ນີ້ວ່າ: ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂອງແຂວງ ໃນໄລຍະ 2 ປີເຄິ່ງຜ່ານມາ ແມ່ນຢູ່ໃນສະພາບການທີ່ທົ່ວປະເທດ ເວົ້າລວມ, ເວົ້າສະເພາະພາຍໃນແຂວງຄຳມ່ວນ ມີທັງກາລະໂອກາດ, ອຸປະສັກ ແລະ ສິ່ງທ້າທາຍຫຼາຍດ້ານ ເປັນຕົ້ນ: ການປະເຊີນກັບຄວາມຫຍຸ້ງຍາກທາງດ້ານເສດຖະກິດ-ການເງິນ, ເງິນກີບອ່ອນຄ່າ, ລາຄານໍ້າມັນເຊື້ອໄຟ-ລາຄາສິນຄ້າເໜັງຕີງສູງຂຶ້ນ, ບັນຫາຢາເສບຕິດ, ບັນຫາປະກົດການຫຍໍ້ທໍ້ໃນສັງຄົມ, ຜົນກະທົບຈາກການລະບາດຂອງພະຍາດ ໂຄວິດ-19 ເຊິ່ງໄດ້ສົ່ງຜົນກະທົບທາງກົງ ແລະ ທາງອ້ອມ ຕໍ່ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ. ແຕ່ພາຍໃຕ້ການນຳພາ-ຊີ້ນໍາ ຂອງຄະນະພັກ, ອົງການປົກຄອງແຂວງ, ເມືອງ ແລະ ຮາກຖານ ກໍຄືການຊຸກຍູ້, ຕິດຕາມ, ກວດກາ ຂອງສະພາປະຊາຊົນແຂວງ ປະຕິບັດບັນດາຄາດໝາຍ ແລະ ວຽກຈຸດສຸມຕ່າງໆ ມີຜົນສຳເລັດ.
ເຊິ່ງໃນໄລຍະ 2 ປີເຄິ່ງ ຜ່ານມາ ເສດຖະກິດຂອງແຂວງຍັງສືບຕໍ່ຂະຫຍາຍຕົວຢ່າງຕໍ່ເນື່ອງ, ໃນປີ 2021 ເສດຖະກິດຂະຫຍາຍຕົວຢູ່ໃນລະດັບ 5,73% ເທົ່າກັບ 9.328 ຕື້ກີບ, ປີ 2022 ຂະຫຍາຍຕົວ 5,85% ເທົ່າກັບ 14.016 ຕື້ກີບ, ໄລຍະ 6 ເດືອນຕົ້ນປີ 2023 ຂະຫຍາຍຕົວຢູ່ໃນລະດັບ 5,34% ຄິດເປັນມູນຄ່າຕາມລາຄາໃນປີ ເທົ່າກັບ 14.891 ຕື້ກີບ ຫຼື ເທົ່າກັບ 98,93% ຂອງແຜນກາງປີ ລວມຍອດຜະລິດຕະພັນພາຍໃນ GDP ຕົວເລກສະສົມ 2 ປີເຄີ່ງ (2021-2023) ບັນລຸ 38.235 ຕື້ກີບ ກວມ 67,47% ຂອງລວມຍອດຜະລິດຕະພັນພາຍໃນ GDP ໃນປີ 2025, ລາຍໄດ້ຕໍ່ຫົວຄົນບັນລຸ 32,72 ລ້ານກີບ ເທົ່າກັບ 112,87% (ແຜນຮອດປີ 2025 ໃຫ້ໄດ້ 28,99 ລ້ານກີບ) ຫຼື ເທົ່າກັບ 1.850 ໂດລາສະຫະລັດ (ແຜນ 3.284 ໂດລາສະຫາລັດ, ອັດຕາແລກປ່ຽນ 8.828 ກີບ/ໂດລາສະຫະລັດ).
ທ່ານເຈົ້າແຂວງຄຳມ່ວນ ກ່າວຕື່ມວ່າ: ເຖິງວ່າເສດຖະກິດຂອງແຂວງ ຈະມີການຂະຫຍາຍຕົວຢ່າງຕໍ່ເນື່ອງ ແຕ່ຍັງມີບາງວຽກງານຈຸດສຸມຈຳນວນໜຶ່ງ ທີ່ອົງການປົກຄອງແຂວງຈະຕ້ອງໄດ້ສຸມໃສ່ ເປັນຕົ້ນ:
- ເພີ່ມທະວີປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານໃນທົ່ວແຂວງໃຫ້ແຂງແຮງຂຶ້ນກວ່າເກົ່າ
- ປັບປຸງແກ້ໄຂສິ່ງທີ່ຍັງອຸດຕັນ ກີດຂວາງ ໃຫ້ແກ່ການລົງທຶນຂອງເອກະຊົນ ທັງພາຍໃນ ແລະ ຕ່າງປະເທດ
- ສຸມໃສ່ການຈັດເກັບລາຍຮັບເຂົ້າງົບປະມານໃຫ້ບັນລຸ ແລະ ລື່ນແຜນການ
- ຊຸກຍູ້ ສົ່ງເສີມການຜະລິດພາຍໃນ ເພື່ອທົດແທນການນຳເຂົ້າໃຫ້ແຂງແຮງ ແລະ ແທດເຖິງ
- ຕິດຕາມ ເຝົ້າລະວັງການປ່ຽນແປງຂອງດິນຟ້າອາກາດ ລະດັບນໍ້າ ໃຫ້ທັນກັບສະພາບການ ເພື່ອກຽມຄວາມພ້ອມຮັບມືຕ້ານແລ້ງ, ຕ້ານຖ້ວມ ທີ່ອາດຈະເກີດຂຶ້ນ
- ເພີ່ມທະວີການຄຸ້ມຄອງລາຄາສິນຄ້າ ທີ່ສົ່ງຜົນກະທົບໂດຍກົງຕໍ່ການດຳລົງຊີວິດຂອງປະຊາຊົນ
- ເພີ່ມທະວີການຄຸ້ມຄອງ, ຕິດຕາມ, ກວດກາ ການຂຸດຄົ້ນ-ສົ່ງອອກແຮ່ທາດຕ່າງໆ ໃຫ້ປະຕິບັດຕາມສັນຍາ ແລະ ລະບຽບກົດໝາຍຢ່າງເຂັ້ມງວດ.
ແຫຼ່ງຂ່າວ ແຂວງຄຳມ່ວນ