ຮູບເງົາສະຫຍອງຂວັນລາວ ເລື່ອງ “Dearest Sister” ຫຼື ນ້ອງຮັກ ໄດ້ປ່ອຍໃຫ້ຮັບຊົມແລ້ວຜ່ານ Netflix ເຊິ່ງເປັນຮູບເງົາທີ່ສອງ ທີ່ມາຈາກ Mattie Do ຜູ້ສ້າງຮູບເງົາຊາວອາເມຣິກາ ເຊື້ອສາຍລາວ.
ພາຍຫຼັງທີ່ຮູບເງົາ The Long Walk ບໍ່ມີວັນຈາກ ມີໃຫ້ຮັບຊົມໃນເດືອນສິງຫາ 2022 ແລ້ວ ຂະນະນີ້ຮູບເງົາລາວອີກເລື່ອງກໍຄື Dearest Sister ກໍຮັບຊົມໄດ້ແລ້ວທາງ Netflix ເຊັ່ນກັນ.
ຮູບເງົານີ້ເຂົ້າສາຍໃນໂຮງຮູບເງົາປະເທດລາວ ໃນເດືອນພຶດສະພາ ປີ 2017 ຄື Major Platinum Cineplex ແລະ ITECC Mall Cineplex ໃນນະຄອນຫຼວງວຽງຈັນ ລວມໄປເຖິງປະເທດໄທ.
ເຊິ່ງຮູບເງົານີ້ ບັນລະຍາຍເລື່ອງລາວຂອງນົກ ເດັກຍິງທີ່ຢູ່ຊົນນະບົດ ໄດ້ເຂົ້າມາເບິ່ງແຍງ ອະນາ ພີ່ນ້ອງຂອງລາວທີ່ກຳລັງເສຍ, ໃນທຸກໆມື້ເບິ່ງຄືຈະບໍ່ມີຫຍັງ ຈົນນົກ ໄດ້ຮູ້ວ່າ ອະນາ ສາມາດເຫັນວິນຍານໄດ້ ແລະ ຍິ່ງໄປກວ່ານັ້ນ ວິນຍານເຫຼົ່ານີ້ມາບອກເລກອີກ.
ໃນການໃຫ້ສຳພາດຂອງຜູ້ສ້າງຮູບເງົາ ກ່າວວ່າ: ການເລົ່າເລື່ອງໄດ້ຮັບແຮງບັນດານໃຈຈາກວັດທະນະທຳທີ່ມີຮ່ວມກັນຂອງ ລາວ, ໄທ, ຈີນ ແລະ ຍັງມີທາງພາກໃຕ້ຂອງອິຕາລີ, ທີ່ກ່ຽວກັບຜີບອກເລກ ລວມເຖິງປະສົບການສ່ວຕົວຂອງລາວທີ່ມັກຈະຖືກຖາມກ່ຽວກັບເລກ ພາຍຫຼັງທີ່ແມ່ເສຍຊີວິດ, ໂດຍຖືກຖາມວ່າ ແມ່ມາເຂົ້າຝັນບອກເລກບໍ.
ຮູບເງົາໄດ້ຖືກເລືອກໃຫ້ເຂົ້າຮ່ວມງານເທສະການເມືອງຄານ ປີ 2014 ໂດຍເປັນສ່ວນໜຶ່ງຂອງໂຄງການ La Fabrique des Cinémas du Monde ແລະ ເປັນຮູບເງົາທີ່ເຂົ້າຍາດລາງວັນອອດສ໌ກາຄັ້ງທຳອິດຂອງລາວ ໃນປີ 2016 ໃນປະເພດຮູບເງົາພາສາຕ່າງປະເທດທີ່ດີທີ່ສຸດ ໃນງານປະກາດລາງວັນ ຄັ້ງທີ 90.
Mattie Do ຜູ້ສ້າງຮູບເງົາຍິງຄົນທຳອິດຂອງລາວ ກຳລັງເຮັດວຽກໃນໂຄງການໃໝ່ ໂດຍຮ່ວມມືກັບຜູ້ກຳກັບ ແລະ ນັກດົນຕີນາໆຊາດຫຼາຍຄົນ.
ແຫຼ່ງຂ່າວ The Laotian Times