ໃນເມື່ອບໍ່ດົນທີ່ຜ່ານມາ ທີ່ປະເທດໄທ ມີການໂພສພາບຕຸກນ້ຳກະທ່ອມທີ່ໃຊ້ເຈ້ຍກັ້ນຕອງໄວ້ ກໍ ພົບວ່າມັນມີຮອຍເປື້ອນຕິດຢູ່ກັບເຈ້ຍກອງເປັນຈຳນວນຫຼາຍ ພ້ອມລະບຸວ່າ “ຊື່ນໃຈ ໝາກໄຂ່ຫຼັງລຳບາກ ເຕືອນ! ແຈ້ງຈາກໂຮງໝໍ ຕອນນີ້ເລີ່ມມີໄວລຸ່ນເຂົ້າມາໂຮງໝໍດ້ວຍອາການໝາກໄຂ່ຫຼັງ ຈົນໄດ້ຟອກໝາກໄຂ່ຫຼັງແລະ ພົບວ່າດື່ມນ້ຳກະທ່ອມ, ໂຮງໝໍຈະຕ້ອງພົບກັບຜູ້ປ່ວຍໝາກໄຂ່ຫຼັງຫຼາຍຂຶ້ນ”.
ກ່ຽວກັບເລື່ອງນີ້ ທ່ານໝໍຂອງໄທ ກໍໄດ້ມາໂພສຜ່ານເຟສບຸກຕື່ມວ່າ ການດື່ມນ້ຳກະທ່ອມໃນປະລິມານຫຼາຍເປັນເວລາດົນ ອາດເປັນອັນຕະລາຍຕໍ່ຕັບ ແລະ ໝາກໄຂ່ຫຼັງ ໂດຍມີສັນຍານເຕືອນທີ່ສຳຄັນຄື ຍ່ຽວສີເຂັ້ມຂຶ້ນ ແລະ ຜິວເຫຼືອງ ເຊິ່ງເມື່ອຕັບຖືກທຳລາຍ ໝາກໄຂ່ຫຼັງຈະເຮັດໜ້າທີ່ພິເສດໃນການກັ້ນຕອງສານພິດອອກຈາກຮ່າງກາຍແທນ ສົ່ງຜົນໃຫ້ໝາກໄຂ່ຫຼັງຕ້ອງເຮັດວຽກໜັກຂຶ້ນ ທີ່ອາດນຳໄປສູ່ພາວະໝາກໄຂ່ຫຼັງວາຍ ໃນຜູ້ທີ່ມີຄວາມເສຍຫາຍຂອງຕັບ.
ດັ່ງນັ້ນ ຖ້າທ່ານໃດດື່ມນ້ຳກະທ່ອມມາດົນ ແລ້ວພົບວ່າຍ່ຽມມີສີເຂັ້ມ ແລະ ຜິວເຫຼືອງ ຄວນຢຸດດື່ມ ແລະ ຮີບໄປພົບແພດໝໍ.
ແຫຼ່ງຂ່າວ Thairath