ໃນເວລາ 13:50 ໂມງ,ຂອງວັນທີ 15 ສິງຫາ 2023 ຜ່ານມາ, ທາງເຈົ້າໜ້າທີ່ພະແນກຕຳຫຼວດສະກັດກັ້ນແລະ ຕ້ານຢາເສບຕິດ ປກສ ແຂວງຄຳມ່ວນ, ໄດ້ຮັບການລາຍງານຈາກພົນລະເມືອງດີວ່າ: ມີກຸ່ມໄວລຸ້ມຈຳນນວນໜຶ່ງພາກັນມົ້ວສຸມຄ້າ-ຂາຍໃບກະທ້ອມຢູ່ໃນຫໍພັກ ກຳມະກອນ ຂອງບໍລິສັດຊີໂນ-ອາກຣີໂປຕາສ ເຂດບ້ານດົງໃຕ້ ເມືອງທ່າແຂກ, ແຂວງຄຳມ່ວນ.
ຈາກການລົງກວດຄົ້ນຫໍພັກກຳມະກອນຂອງໂຮງງານດັ່ງກ່າວ, ເຈົ້າໜ້າທີ່ພົບເຫັນແກັດໂຟມທີ່ບັນຈຸໃບກະທ້ອມ ຈຳນວນ 37 ຖົງ, ນໍ້າຢາແກ້ໄອ ຈຳນວນ 12 ແກ້ວ ແລະ ສາມາດກັກຕົວຜູ້ຖືກຫາໄດ້ 01 ຄົນມາດຳເນີນຄະດີ.
ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດ ຈຶ່ງຮູ້ໄດ້ວ່າ ຜູ້ຖືກຫາຊື່: ທ້າວແຂກ ແສງອ່ອນສາ ອາຍຸ 22 ປີ, ອາຊີບກຳມະກອນ, ຢູ່ບ້ານ ປ່າກ້ວຍໜອງບອນ, ເມືອງໄຊບົວທອງ ແຂວງຄຳມ່ວນ, ຜູ້ກ່ຽວຍັງຮັບສາລະພາບຕື່ມອີກວ່າໃບກະທ໋ອມຈຳນວນດັ່ງກ່າວແມ່ນເປັນຂອງຕົນແທ້ ໄດ້ຊື້ມາຈາກກຸ່ມແກ໋ງດຽວກັນ ແລ້ວນຳມາຂ່າຍຕໍ່ ໃຫ້ກຳມະກ່ອນຢູ່ໂຮງານດັ່ງກ່າວ ຊຸດລະ 70.000ກີບ. ຕໍ່ກັບຄະດີດັ່ງກ່າວທາງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ ພວມກຳລັງດຳເນີນຄະດີຕາມຂັ້ນຕອນຂອງກົດໝາຍ ແລະ ຂະຫຍາຍຜົນຫາກຸ່ມແກ໋ງທີ່ຮ່ວມຂະບວນການກະທຳຜິດ ຄ້າຂາຍພືດທີ່ໃຫ້ສານເສບຕິດ ມາດຳເນີນຄະດີຕໍ່ໃປ.
ອ້າງອີງ: ຄວາມສະຫງົບແຂວງຄຳມ່ວນ