ກະຊວງແຜນການ ແລະ ການລົງທຶນ ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ ອອກແຈ້ງການແຈ້ງການເຖິງ: ບັນດາພໍ່ຄ້າຊາວຂາຍ, ພາຍໃນ ແລະ ນອກເຂດເສດຖະກິດພິເສດ ສາມຫຼ່ຽມ. ເລື່ອງ: ຫ້າມພໍ່ຄ້າຊາວຂາຍ ຜູ້ທີ່ບໍ່ໄດ້ຖືທະບຽນວິສາຫະກິດ ຢູ່ພາຍໃນເຂດເສດຖະກິດພິເສດ ສາມຫຼ່ຽມ ຄໍາ ນໍາເອົາເຄື່ອງເຂົ້າມາສົ່ງ ແລະ ຂາຍ.
– ອີງຕາມ ດໍາລັດ ວ່າດ້ວຍ ເຂດເສດຖະກິດພິເສດ ສະບັບເລກທີ 188/ລບ; ລົງວັນທີ 07 ມິຖຸນາ 2018; – ອີງຕາມ ຂໍ້ຕົກລົງ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງຄະນະຄຸ້ມຄອງເຂດເສດຖະກິດພິເສດແຂວງ ແລະ ນະຄອນຫຼວງ ສະບັບເລກທີ 1971/ກຜທ, ລົງວັນທີ 15 ສິງຫາ 2018;
– ອີຕາມ ການສະເຫນີ ຂອງສະພາບໍລິຫານເຂດ ແລະ ກຸ່ມບໍລິສັດດອກງິ້ວຄໍາ ຈໍາກັດ.
ຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ ຂໍຖືເປັນກຽດແຈ້ງມາຍັງ ພໍ່ຄ້າຊາວຂາຍພາຍໃນ ແລະ ນອກເຂດເສດຖະກິດພິເສດ ສາມຫຼ່ຽມ ຮັບຊາບວ່າ: ຫ້າມບໍ່ໃຫ້ພໍ່ຄ້າຊາວຂາຍ ຜູ້ທີ່ບໍ່ໄດ້ຖືທະບຽນວິສາຫະກິດ ຢູ່ພາຍ ໃນເຂດເສດຖະກິດພິເສດ ສາມຫຼ່ຽມຄໍາ ນໍາເອົາປະເພດເຄື່ອງຍ່ອຍ, ອາຫານ ແລະ ເຄື່ອງດຶ່ມຕ່າງໆ ເຂົ້າມາສົ່ງ ແລະ ຂາຍ ດ້ວຍການນໍາໃຊ້ພາຫະນະລົດຈັກ; ລົດສາມລໍ້, ລົດໄຟຟ້າ ເພາະມີຜົນກະທົບຕໍ່ຜູ້ປະກອບການດໍາເນີນທຸລະກິດ ພາຍໃນເຂດເສດຖະກິດພິເສດ ສາມຫຼ່ຽມຄໍາ, ໃນກໍລະນີຝ່າຝືນຖ້າຫາກເຈົ້າຫນ້າທີ່ກ່ຽວຂ້ອງພົບເຫັນຈະປະຕິບັດຕາມ ລະບຽບການ ແລະ ກົດຫມາຍທີ່ວາງອອກຢ່າງເຂັ້ມງວດ.
ດັ່ງນັ້ນ, ຈຶ່ງແຈ້ງມາຍັງເພື່ອຊາບ ແລະ ໃຫ້ຄວາມຮ່ວມດ້ວຍ.