ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ ແຂວງສາລະວັນອອກແຈ້ງການກ່ຽວກັບການຄາດຄະເນຈະມີຝົນຕົກ ໃນລະຫວ່າງວັນທີ 1 – 6 ສິງຫາ 2023.
ສະພາບອາກາດ ໃນລະຫວ່າງວັນທີ 1 – 6 ສິງຫາ 2023, ຮ່ອງຄວາມກົດດັນຂອງ ອາກາດຕໍ່າ ຈະພາດຜ່ານຢູ່ທົ່ວທຸກເຂດ ຂອງແຂວງສາລະວັນ ສົມທົບກັບລົມມໍລະສຸມຕາເວັນຕົກສ່ຽງໃຕ້ພັດປົກ ຄຸມດ້ວຍກໍາລັງປານກາງ ຫາ ແຮງ ເຊິ່ງລັກສະນະດັ່ງກ່າວ ຈະເຮັດໃຫ້ມີຝົນຕົກ, ຟ້າຮ້ອງ, ຟ້າເຫຼື້ອມ ໃນລະດັບປານກາງ ຫາ ຕົກໜັກ ພ້ອມທັງມີລົມພັດແຮງຢູ່ບາງເມືອງຂອງແຂວງສາລະວັນ ແລະ ອາດຈະມີນໍ້າຖ້ວມຂັງ, ນ້ຳຖ້ວມຊຸ ແລະ ດິນເຈື່ອນ ໂດຍສະເພາະແມ່ນ ພໍ່ແມ່ປະຊາຊົນທີ່ອາໄສຢູ່ລຽບຕາມແຄມແມ່ນ້ຳເຊໂດນ, ເຊເສັດ, ເຊລະນອງ, ເຊໂປນ ຫຼື ໃກ້ຫ້ວຍຮ່ອງຕ່າງໆ ຈົ່ງມີສະຕິລະມັດລະວັງ.
