ເມື່ອບໍ່ດົນມານີ້ ຫ້ອງການອຸດສາຫະກຳ ແລະ ການຄ້າເມືອງບົວລະພາ ແຂວງຄໍາມ່ວນ ໄດ້ຈັດກອງປະຊຸມເພື່ອປຶກສາຫາລືກ່ຽວກັບການຂຶ້ນລາຄາສິນຄ້າປະເພດ ຊີ້ນງົວ, ຊີ້ນຄວາຍ ແລະ ຊີ້ນໝູ ໂດຍການເປັນປະທານຂອງທ່ານ ພູວຽງ ສີສູນທອນ ຮອງເຈົ້າເມືອງ ເມືອງບົວລະພາ, ມີບັນດາທ່ານຄະນະຊີ້ນໍາກອງເລຂາຄຸ້ມຄອງລາຄາ, ຂະແໜງການທີ່ກ່ຽວຂ້ອງ, ນາຍບ້ານ ແລະ ສະມາຄົມຕະຫຼາດ ເຂົ້າຮ່ວມ.
ໃນກອງປະຊຸມຄັ້ງນີ້ ປະກອບມີຄຳຮ້ອງຂໍຂຶ້ນລາຄາຊີ້ນຂອງໜ່ວຍບໍລິການຊື້ສັດ ຂາຍຊີ້ນ ແລະ ບົດລາຍງານການບໍລິການຂອງໜ່ວຍບໍລິການຊື້ສັດ-ຂາຍຊີ້ນນຳອີກດ້ວຍ.
ເຊິ່ງກອງປະຊຸມກໍໄດ້ພ້ອມກັນຄົ້ນຄວ້າ ປະກອບຄໍາຄິດເຫັນ ແລະ ໄດ້ເຫັນດີເປັນເອກະພາບກັນຄື: ເຫັນດີປັບລາຄາຊີ້ນງົວ, ຄວາຍ ຂຶ້ນຈາກປົກກະຕິ 80.000 ກີບ/ໂລ ປັບຂຶ້ນເປັນ 90.000 ກີບ/ໂລ, ເຫັນດີປັບລາຄາ ຊີ້ນໝູ ຈາກລາຄາປົກກະຕິ 65.000 ກີບ/ໂລ ປັບຂຶ້ນເປັນ 70.000 ກີບ/ໂລ.
ຫຼັງຈາກນັ້ນ ທ່ານ ພູວຽງ ສີສູນທອນ ຮອງເຈົ້າເມືອງບົວລະພາ ທ່ານໄດ້ໂອລົມໃຫ້ເນັ້ນໜັກ ທາງດ້ານຄຸນນະພາບຂອງສັດ ກໍຄື ງົວ, ຄວາຍ ແລະ ໝູ ກ່ອນຈະນຳເຂົ້າໂຮງຂ້າສັດເພື່ອນຳໄປຈຳໜ່າຍ ເພື່ອເຮັດໃຫ້ຊີ້ນດັ່ງກ່າວ ມີຄຸນນະພາບ ແລະ ຖືກຫຼັກອະນາໄມ ພ້ອມກັນນັ້ນ ທ່ານຍັງໄດ້ເນັ້ນໜັກຕື່ມ ກ່ຽວກັບການຈັດບຸກຄະລາກອນເຂົ້າໃນວຽກງານດັ່ງກ່າວຕ້ອງໃຫ້ຖືກຕ້ອງ ແລະ ສອດຄ່ອງກັບຄວາມເປັນຈິງ ເພື່ອເຮັດໃຫ້ວຽກງານດັ່ງກ່າວໄດ້ຮັບຜົນສຳເລັດຕາມຄາດໝາຍ.
ແຫຼ່ງຂ່າວ Khammouane KhammouaneTv