ໃນວັນສຸກ ທີ 28 ກໍລະກົດ 2023 ທີ່ຜ່ານມາ ສະຖາບັນ ລາວ-ຍີ່ປຸ່ນ (LJI) ແລະ ອົງການ JICA ໄດ້ຮ່ວມກັນເປັນເຈົ້າພາບຈັດງານພົບປະແລກປ່ຽນ ເພື່ອຂະຫຍາຍເຄືອຂ່າຍທຸລະກິດ ເພື່ອຮັດແໜ້ນສາຍພົວພັນພາຍໃນເຄືອຂ່າຍນັກທຸລະກິດໃນລາວ. ໂອກາດດັ່ງກ່າວ ເປັນການສະເຫຼີມສະຫຼອງຄວາມສຳເລັດຂອງ ຫຼັກສູດສຳລັບຜູ້ບໍລິຫານລະດັບສູງຂອງບໍລິສັດ ຮຸ່ນທີ 6 (Keiei Juku-6th batch), ເຊິ່ງເປັນຫຼັກສູດບໍລິຫານ ໄລຍະ 6 ເດືອນ ທີ່ມີປະສິດທິພາບສູງ ສຳລັບຜູ້ປະກອບການໃນລາວ.
ການຈັດຂຶ້ນໃນຄັ້ງນີ້ ໄດ້ຮັບທຶນສະໜັບສະໜູນຈາກ ນັກຮຽນທີ່ຮຽນຈົບຫຼັກສູດສຳລັບຜູ້ບໍລິຫານລະດັບສູງຂອງບໍລິສັດ, ສະແດງໃຫ້ເຫັນຄວາມມຸ່ງໝັ້ນ ໃນການຊຸກຍູ້ການຂະຫຍາຍຕົວຂອງທຸລະກິດພາຍໃນປະເທດລາວ.
ເຊິ່ງເປັນກຽດຮ່ວມງານໂດຍມີ ທ່ານ ຮສ. ປອ. ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານສະມາຄົມມິດຕະພາບ ລາວ-ຍີ່ປຸ່ນ, ທ່ານ ຮສ. ປອ. ອຸດົມ ພອນຄໍາເພັງ ອະທິການບໍດີ ມະຫາວິທະຍາໄລແຫ່ງຊາດ, ທ່ານ ປະທານສະມາຄົມ SME ລາວ, ຄະນະສະມາຄົມມິດຕະພາບ ລາວ-ຍີ່ປຸ່ນ, ຄະນະນໍາ ສະຖາບັນ ລາວ-ຍີ່ປຸ່ນ; ສ່ວນຝ່າຍຍີ່ປຸ່ນ ມີ ທ່ານ KOBAYASHI Kenichi ເອກອັກຄະລັດຖະທູດຍີ່ປຸ່ນ ປະຈໍາ ສປປ ລາວ, ທ່ານ NAGASE Toshio ຫົວໜ້າອົງການ JICA ປະຈໍາລາວ, ທ່ານຜູ້ຕາງໜ້າອົງການການຄ້າສາກົນຍີ່ປຸ່ນ ປະຈໍາລາວ, ຄະນະນໍາ Keiei Juku Lao ແລະ ນັກທຸລະກິດຈາກຫຼາຍຂະແໜງການກໍ່ໄດ້ເຂົ້າຮ່ວມພົບປະແລກປ່ຽນໃນງານຄັ້ງນີ້ ທັງຝ່າຍລາວ ແລະ ຍີ່ປຸ່ນລວມທັງໝົດ 100 ກວ່າທ່ານ.
ຈຸດປະສົງຫຼັກຂອງງານຄັ້ງນີ້ ແມ່ນເພື່ອສ້າງເວທີໃຫ້ກັບຜູ້ເຂົ້າຮ່ວມ ຫຼັກສູດສຳລັບຜູ້ບໍລິຫານລະດັບສູງຂອງບໍລິສັດ ໃນການແບ່ງປັນຄວາມເຂົ້າໃຈ ແລະ ປະສົບການທີ່ເກັບກ່ຽວໃນລະຫວ່າງເວລາຂອງພວກເຂົາຢູ່ໃນປະເທດຍີ່ປຸ່ນ. ນອກຈາກນັ້ນ, ແມ່ນເພື່ອແນໃສ່ການສົ່ງເສີມກາລະໂອກາດໃນການສ້າງເຄືອຂ່າຍ ແລະ ສົ່ງເສີມການຮ່ວມມືລະຫວ່າງນັກທຸລະກິດລາວໃຫ້ເພີ່ມຂຶ້ນ.
ທ່ານເອກອັກຄະລັດຖະທູດ Kobayashi ກ່າວເນັ້ນໜັກວ່າ: “ການພັດທະນາເສດຖະກິດແບບຍືນຍົງແມ່ນສຳຄັນ ແລະ ຕ້ອງການການລົງທຶນຈາກພາກເອກະຊົນຢ່າງບໍ່ຢຸດຢັ້ງ ແລະ ມີຄຸນນະພາບສູງ, ຄຽງຄູ່ກັບການສ້າງແຫຼ່ງຊັບພະຍາກອນມະນຸດລະດັບສູງ.”
ໜຶ່ງຈຸດເດັ່ນຂອງງານ ແມ່ນການນຳສະເໜີໂດຍຜູ້ຕາງໜ້າຈາກບໍລິສັດ Jetro, ຜູ້ທີ່ສະແດງໃຫ້ເຫັນເຖິງໂອກາດທາງການຄ້າ ຂອງທຸລະກິດລະດັບທ້ອງຖິ່ນ, ທັງການນຳເຂົ້າສິນຄ້າເຂົ້າມາລາວ ແລະ ການສົ່ງອອກສິນຄ້າໄປຍີ່ປຸ່ນ.
ພາຍໃນງານເຕັມໄປດ້ວຍຄວາມອົບອຸ່ນ ເປັນກັນເອງ ຟົດຟື້ນມ່ວນຊື່ນ ເພາະເປັນໂອກາດທີ່ດີໃຫ້ແກ່ບັນດາຜູ້ເຂົ້າຮ່ວມໄດ້ພົບປະ ແລະ ປຶກສາຫາລືການຮ່ວມມືທາງດ້ານທຸລະກິດເຊິ່ງກັນ ແລະ ກັນ.
ຫຼັກສູດສຳລັບຜູ້ບໍລິຫານລະດັບສູງຂອງບໍລິສັດ ໄດ້ຮັບການສະໜັບສະໜູນຈາກອົງການ JICA ຜ່ານສະຖາບັນ ລາວ-ຍີ່ປຸ່ນ, ມີເນື້ອໃນກວມເອົາວິຊາສຳຄັນຕ່າງໆ ເຊັ່ນ ຍຸດທະສາດທາງທຸລະກິດ, ການຕະຫຼາດ, ການຄຸ້ມຄອງຊັບພະຍາກອນມະນຸດ, ການເງິນ ແລະ ການຈັດການ ການດຳເນີນງານ. ນອກຈາກນັ້ນ, ຜູ້ເຂົ້າຮ່ວມຍັງໄດ້ໄປທັດສະນະທາງດ້ານທຸລະກິດ 2 ອາທິດ ທີ່ປະເທດຍີ່ປຸ່ນ.
ປັດຈຸບັນ, ສະຖາບັນ ລາວ-ຍີ່ປຸ່ນ ກຳລັງເປີດຮັບສະໝັກຫາຜູ້ເຂົ້າຮ່ວມ ຫຼັກສູດສຳລັບຜູ້ບໍລິຫານລະດັບສູງຂອງບໍລິສັດ (Keiei Juku) ຄັ້ງທີ 7, ສຳລັບ ທ່ານໃດສົນໃຈ ສາມາດຕິດຕໍ່ ເພື່ອສອບຖາມຂໍ້ມູນເພີ່ມເຕີມໄດ້ທີ່ ສະຖາບັນ ລາວ-ຍີ່ປຸ່ນ.
ຄວາມລິເລີ່ມຂອງສະຖາບັນ ລາວ-ຍີ່ປຸ່ນ ຄັ້ງນີ້ ຊີ້ໃຫ້ເຫັນເຖິງຄວາມຕັ້ງໃຈ ໃນການຊຸກຍູ້ການແລກປ່ຽນດ້ານການສຶກສາ ແລະ ທຸລະກິດພາຍໃນລາວ, ເປັນການຊຸກຍູ້ການຮ່ວມມື ແລະ ການຂະຫຍາຍຕົວທາງດ້ານເສດຖະກິດພາຍໃນປະເທດ.
