ອິນເດຍກຳລັງກ້າວໜ້າທີ່ສຸດ ພາຍຫຼັງສ້າງຜູ້ປະກາດຂ່າວປັນຍາປະດິດ AI ຈຶ່ງເຮັດໃຫ້ເກີດຄວາມໜ້າສົນໃຈຕໍ່ມວນຊົນ ແລະ ຄວາມກັງວົນ ທີ່ອາດສົ່ງຜົນກະທົບຕໍ່ສາຍອະຊີບນັກຂ່າວ.
ຜູ້ປະກາດຂ່າວ AI ຄົນທຳອິດຂອງ Odisha TV ຊື່ Lisa ເຮັດໃຫ້ສັງຄົມມີສອງຄວາມຄິດເຫັນເຊັ່ນ ກຸ່ມໜຶ່ງກໍຕື່ນເຕັ້ນໃນການນຳໃຊ້ລະບົບເຕັກໂນໂລຊີທີ່ຈະມາແທນທີ່ນັກຂ່າວ ສ່ວນຄົນອີກກຸ່ມໜຶ່ງກໍເຫັນວ່າ ການໃຊ້ AI ມາແທນຄົນໃນການອ່ານຂ່າວ ເຮັດໃຫ້ການເບິ່ງຂ່າວນັ້ນໜ້າເບື່ອ ຍ້ອນໂຕ AI ນັ້ນບໍ່ມີອາລົມ ບໍ່ສາມາດສະແດງຄວາມຮູ້ສຶກໄດ້ຄືກັບຄົນ ເຊິ່ງຕ່າງຈາກການອ່ານຂ່າວແບບເກົ່າ.
ຢ່າງໃດກໍຕາມ AI ຊ່ວຍຫຼຸດຄ່າໃຊ້ຈ່າຍລົງຫຼາຍ ເຮັດໃຫ້ຂະບວນການອອກອາກາດມີປະສິດທິພາບຫຼາຍຂຶ້ນ ນອກນີ້ຍັງບໍ່ມີການໃຊ້ອາລົມສ່ວນໂຕລົງໄປໃນຂ່າວ ແລະ AI ຍັງສາມາດປະມວນຂໍ້ມູນຈຳນວນຫຼາຍໄດ້ໄວ ສົ່ງຂ່າວສານເປັນພາສາຕ່າງໆ.
ຕອນນີ້ ກໍຍັງມີທ່າອ່ຽງທີ່ຈະເນັ້ນການໃຊ້ AI ຫຼາຍຂຶ້ນໃນຫ້ອງຂ່າວ ເຊິ່ງການສຳຫຼວດຫຼ້າສຸດພົບວ່າ ເກືອບເຄິ່ງໜຶ່ງຂອງສຳນັກຂ່າວທົ່ວໂລກໃຊ້ເຄື່ອງມື AI ຢູ່ແລ້ວ ແລະ ຄາດວ່າຍັງມີເພີ່ມຂຶ້ນອີກ.
ແຫຼ່ງຂ່າວ Nikkei Asia