ເກີດເຫດໄຟໄໝ້ເທິງເຮືອບັນທຸກລົດ ບໍລິເວນນອກແຄມຝັ່ງປະເທດເນເທີແລນ ເຊິ່ງເຮືອດັ່ງກ່າວບັນທຸກລົດເກືອບ 3,000 ຄັນ ເຮັດໃຫ້ເສຍຫາຍ ພ້ອມມີຜູ້ບາດເຈັບຈຳນວນຫຼາຍ ແລະ ຍັງມີຜູ້ເສຍຊີວິດ 1 ຄົນ ໃນເຫດການນີ້.
ພະນັກງານເທິງເຮືອໄດ້ເອົາໂຕຫຼອດໂດຍການໂດດລົງນໍ້າ ຫຼັງຈາກເກີດໄຟໄໝ້ ໃນຕອນກາງຄືນຂອງວັນອັງຄານ ທີ່ຜ່ານມາ, ເທິງເຮືອຂົນສົ່ງຟຣີແມນເທີ ໄຮເວ ຂະໜາດ 199 ແມັດ ທີ່ຈົດທະບຽນໃນປະເທດປານາມາ ໃນຂະນະທີ່ເດີນທາງຈາກອີຢີບເພື່ອໄປເຢຍລະມັນ.
ເຮືອກູ້ໄພໄດ້ເຂົ້າໄປສີດນໍ້າພໍປະມານເພື່ອໃຫ້ເຮືອເກີດເຫດເຢັນລົງ ຖ້າຫາກສີດນໍ້າຫຼາຍເກີນໄປ ຈະເຮັດໃຫ້ເຮືອຈົ່ມໄດ້ ດັ່ງນັ້ນ ຈິ່ງໄດ້ມັດເຮືອໄວ້ກັບເຮືອກູ້ໄພ, ເນື່ອງຈາກຍັງສາມາດມອດໄຟໄດ້ ເຮັດໃຫ້ໄຟຍັງຈະໄໝ້ ພ້ອມສົ່ງຄວັນໄຟກະຈາຍອອກໄປອີກຫຼາຍມື້. ທັງນີ້, ເຈົ້າໜ້າທີ່ໄດ້ຕິດຕໍ່ຫາຄອບຄົວຜູ້ບາດເຈັບ ແລະ ຜູ້ເສຍຊີວິດຮຽບຮ້ອຍແລ້ວ.
ປັດຈຸບັນ, ຍັງບໍ່ຮູ້ສາເຫດຂອງເຫດໄຟໄໝ້ເຮືອໃນຄັ້ງນີ້ ແຕ່ກ່ອນໜ້າທີ່ເຈົ້າໜ້າທີ່ລາດຕະເວນແຄມຝັ່ງໄດ້ແຈ້ງວ່າ ຕົ້ນເພີງມາຈາກບໍລິເວນໃກ້ກັບລົດໄຟຟ້າທີ່ຂົນສົ່ງມາ ເຊິ່ງເຮືອມີລົດໄຟຟ້າ 25 ຄັນ, ຈາກ 2,867 ຄັນ ທັງໝົດ.