ໃນຕອນເຊົ້າວັນທີ 21 ກໍລະກົດ 2023 ຫ້ອງການການເງິນ ນະຄອນ ໄກສອນ ພົມວິຫານ ໄດ້ຈັດກອງປະຊຸມສະຫຼຸບວຽກງານ ການງົບປະມານ 6 ເດືອນຕົ້ນປີ ແລະ ຄາດຄະເນ 6 ເດືອນທ້າຍປີ 2023 ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ປະສົງສິນ ຈະເລີນສຸກ ກຳມະການປະຈຳພັກແຂວງ ເລຂາພັກນະຄອນ ເຈົ້ານະຄອນໄກສອນ ພົມວິຫານ.

ທ່ານ ຄຳພຽນ ມາດນີວົງ ກຳມະການພັກນະຄອນ ຫົວໜ້າຫ້ອງການ-ການເງິນ ນະຄອນ ໄດ້ຍົກໃຫ້ຮູ້ວ່າ: ຜ່ານການຈັດຕັ້ງ ປະຕິບັດວຽກງານງົບປະມານ ຂອງນະຄອນໃນໄລຍະ 6 ເດືອນຜ່ານມາ ສາມາດເກັບລາຍ ຮັບເຂົ້າງົບປະມານໄດ້ 8 ຕື້ 612 ລ້ານກວ່າກີບ ເທົ່າກັບ 58,23% ຂອງແຜນການປີ, ຖ້າທຽບໃສ່ ປີ 2022 ຫຼຸດລົງ 17,69% ໃນນັ້ນ ໄດ້ຈາກອາກອນ 4 ຕື້ 242 ລ້ານກວ່າກີບ ເທົ່າກັບ 63,69%, ຄ່າທໍານຽມປະຕິບັດໄດ້ 2 ຕື້ 401 ລ້ານກວ່າກີບ ເທົ່າກັບ 187,58%, ຄ່າບໍລິການ ປະຕິບັດໄດ້ 254 ລ້ານກວ່າກີບ ເທົ່າກັບ 32,26%, ພາສີທີ່ດິນ ບັນລຸໄດ້ 1ຕື້ 342ລ້ານກວ່າກີບ ເທົ່າກັບ 25,51%, ຊັບສິນລັດປະຕິບັດໄດ້ 371 ລ້ານກວ່າກີບ ເທົ່າກັບ 46,46%, ສ່ວນການປະຕິບັດລາຍຈ່າຍງົບປະມານ 6 ເດືອນ ມີຈຳນວນ 2 ຕື້ 338 ລ້ານກວ່າກີບ ເທົ່າກັບ 69,952% ຂອງແຜນການ.

ສຳລັບແຜນຈັດເກັບລາຍຮັບ ງົບປະມານໃນ 6ເດືອນທ້າຍ ປີ 2023 ນະຄອນ ຈະໃຫ້ໄດ້ບັນລຸຕາມແຜນການ 100% ຫຼື ລື່ນແຜນການປີ.

ແຫຼ່ງຂ່າວ ຫ້ອງການ ຖະແຫລ່ງຂ່າວ,ວັດທະນະທຳ ແລະ ທ່ອງທ່ຽວ ນະຄອນ ໄກສອນ ພົມວິຫານ