ກະຊວງການເງິນອອກແຈ້ງການ ເຖິງບຸກຄົນ, ນິຕິບຸກຄົນ ແລະ ການຈັດຕັ້ງ ຜູ້ໃຊ້ ຫລື ນໍາໃຊ້ທີ່ດິນ ຢູ່ ສປປ ລາວ ກ່ຽວກັບການເສຍພາສີທີ່ດິນ ປະຈຳປີ 2023. ທັງນີ້ ກໍເພື່ອເຮັດໃຫ້ການເສຍຄ່າພາສີທີ່ດິນ ປະຈຳປີ ໄດ້ຈັດຕັ້ງປະຕິບັດທັນຕາມກຳນົດເວລາ ແລະ ມີຄວາມເປັນເອກະພາບກັນໃນຂອບເຂດທົ່ວປະເທດ, ຖ້າພາກສ່ວນໃດຫາກບໍ່ຊໍາລະຕາມກຳນົດ ແມ່ນຈະຖືກປັບໃໝ.
ໄລຍະຂອງການເສຍຄ່າພາສີທີ່ດິນ ປີ 2003 ຈະສິ້ນສຸດໃນວັນທີ 31 ທັນວາ 2023 ຊຶ່ງບຸກຄົນ, ນິຕິບຸກຄົນ ແລະ ການຈັດຕັ້ງ ເປັນເຈົ້າຂອງຕອນດິນ ຫລື ນໍາໃຊ້ຕອນດິນ ໃນຂອບເຂດທົ່ວປະເທດ ມີພັນທະເສຍຄ່າພາສີທີ່ດິນປະຈຳປີ, ຖ້າບໍ່ຊຳລະຕາມໄລຍະເວລາດັ່ງກ່າວ ຈະຖືກປັບໃໝເປັນແຕ່ລະກໍ ລະນີ ທີ່ໄດ້ກຳນົດໄວ້ໃນ ມາດຕາ 10 ຂອງລັດຖະບັນຍັດຂອງປະທານປະເທດ ສະບັບເລກທີ 01/ສປປ, ລົງວັນທີ 08 ພຶດສະພາ 2007 ວ່າດ້ວຍພາສີທີ່ດິນ. ການຊໍາລະມີ 2 ຮູບແບບຄື: ຊຳລະຜ່ານລະບົບທະນາຄານ ໂດຍນໍາໃຊ້ ແອັບພິເຄຊັນ (Application) ຂອງບັນດາທະນາຄານທີ່ເຂົ້າຮ່ວມໃນໂຄງການ ແລະ ຊຳລະຜ່ານປ່ອງບໍລິການຂອງຫ້ອງການສ່ວຍສາອາກອນປະຈຳ ນະຄອນ, ເມືອງ, ເທສະບານ ແລະ ຫ້ອງການປົກຄອງບ້ານ ບ່ອນຕອນດິນຕັ້ງຢູ່. ການຊຳລະຜ່ານລະບົບແອັບພິເຄຊັນ ຂອງບັນດາທະນາຄານ ຜູ້ຊຳລະຕ້ອງມີບັນຊີເງິນຝາກຢູ່ໃນທະນາຄານ, ດາວໂຫລດແອັບພິເຄຊັນຂອງທະນາຄານ ທີ່ຕົນເອງມີເງິນຝາກ, ດຳເນີນການຊຳລະຜ່ານ ແອັບພິເຄຊັນດັ່ງກ່າວ ຕາມຂັ້ນຕອນທີ່ໄດ້ກໍານົດໄວ້.
ມອບໃຫ້ກົມສ່ວຍສາອາກອນ ອອກຄໍາແນະນໍາ ລະອຽດ ໃນການຈັດຕັ້ງປະຕິບັດ ການຈັດເກັບຄ່າພາສີທີ່ດິນໃນປີ 2023 ການປ້ອນຖານຂໍ້ມູນທີ່ດິນລົງໃນລະບົບ TaxRIS ແລະ ຈັດຕັ້ງເຜີຍແຜ່ແນະນຳ ພ້ອມທັງ ຕິດຕາມ, ກວດກາ ແລະ ແກ້ໄຂບັນຫາ ໃຫ້ທັນຕາມສະພາບການ; ມອບໃຫ້ພະແນກການເງິນ, ສ່ວຍສາອາກອນ ປະຈຳນະຄອນຫລວງ, ແຂວງ, ນະຄອນ, ເມືອງ ແລະເທສະບານປະສານສົມທົບກັບ ອຳນາດການປົກຄອງທ້ອງຖິ່ນ ແລະ ທຸກພາກສ່ວນທີ່ກ່ຽວຂ້ອງ ເພື່ອຊຸກຍູ້, ເຜີຍແຜ່ ການຈັດຕັ້ງປະຕິບັດການເສຍຄ່າພາສີທີ່ດິນ ປະຈຳປີ 2023 ໃຫ້ມີປະສິດທິຜົນ, ໂປ່ງໃສ ແລະ ຮັບປະກັນການເກັບລາຍຮັບດັ່ງກ່າວ ເຂົ້າງົບປະມານແຫ່ງລັດໃຫ້ຄົບຖ້ວນ.
