ທໍ່ນ້ຳຕັນເຮັດໃຫ້ນ້ຳຖ້ວມໃນລະດູຝົນເນື່ອງຈາກຄອງນ້ຳບໍ່ສາມາດລະບາຍນ້ຳໄດ້ສະດວກ ເປັນບັນຫາທີ່ເຮົາພົບໃນທຸກໆປີ ບັນຫານີ້ອາດເປັນບັນຫາພຽງເລັກໜ້ອຍ ແຕ່ກໍບໍ່ສາມາດແກ້ໄຂໄດ້.
ໃນທຸກໆປີຂອງລະດູຝົນ ຫຼາຍເຂດທົ່ວປະເທດມັກພົບບັນຫານ້ຳຖ້ວມຍ້ອນທໍ່ນ້ຳບໍ່ສາມາດລະບາຍນ້ຳໄດ້ທັນ ສາເຫດທີ່ທໍ່ນ້ຳຕັນ ໜຶ່ງໃນນັ້ນກໍມາຈາກການຂາດການບຳລຸງຮັກສາທີ່ຖືກຕ້ອງ ແລະ ການອຸດຕັນຂອງຂີ້ເຫຍື້ອ ເມື່ອມີຝົນຕົກໜັກຫຼາຍກວ່າ 1 ຊົ່ວໂມງກໍເຮັດໃຫ້ນ້ຳຖ້ວມ.
ພາຍໃນນະຄອນຫຼວງ ຈຸດທີ່ນ້ຳຖ້ວມເປັນປະຈຳກໍແມ່ນ ສີ່ແຍກທາດຫຼວງ ແລະ ສີ່ແຍກດົງໂດກ-ເສັ້ນທາງ 450ປີ, ເຊິ່ງໃນວັນທີ 9 ກໍລະກົດ 2023 ທີ່ຜ່ານມາ ທີ່ເຂດເມືອງໄຊທານີ ນະຄອນຫຼວງວຽງຈັນ ໄດ້ມີຝົນຕົກໜັກຕັ້ງແຕ່ເວລາ 11:35 ໂມງ ຈົນເຖິງ 13:30 ໂມງ ເຮັດໃຫ້ບໍລິເວນສີ່ແຍກດົງໂດກ-ເສັ້ນທາງ 450ປີ ມີນ້ຳຖ້ວມຂັງ.
ດັ່ງນັ້ນ ຈຶ່ງຂໍໃຫ້ພໍ່ແມ່ປະຊາຊົນ ຈົ່ງພາກັນບໍ່ຖິ້ມຂີ້ເຫຍື້ອ ຫຼື ສິ່ງເສດເຫຼືອໃສ່ທໍ່ລະບາຍນ້ຳ ແລະ ຊ່ວຍກັນກຳຈັດສິ່ງທີ່ໄປອຸດຕັນທໍ່ລະບາຍນ້ຳ.
