ໃນວັນທີ 29 ມິຖຸນາ 2023, ເກີດເຫດຜູ້ໂດຍສານຖືກທາງເລື່ອນດູດຂາຂາດ ບໍລິເວນອາຄານຜູ້ໂດຍສານຂາເຂົ້າ ທີ່ສະໜາມບິນດອນເມືອງ ປະເທດໄທ ເບື້ອງຕົ້ນເຈົ້າໜ້າທີ່ໄດ້ນຳຕົວຜູ້ບາດເຈັບສົ່ງໂຮງໝໍເປັນທີ່ຮຽບຮ້ອຍແລ້ວ.
ຫຼ້າສຸດ ທ່ານ ກາຣັນ ທົນກຸນຈີລຣະພັດ ຜູ້ອຳນວຍການສະໜາມບິນດອນເມືອງໄດ້ເປີດເຜີຍວ່າ: ເຫດການທີ່ເກີດຂຶ້ນ ທີ່ອາຄານຜູ້ໂດຍສານພາຍໃນປະເທດຂາເຂົ້າ ບໍລິເວນ Pier4 ເກີດຍຸບໂຕລົງໃນຂະນະທີ່ມີຜູ້ໂດຍສານໃຊ້ງານ, ຈາກການກວດສອບກ້ອງວົງຈອນປິດ ທີ່ເຫັນພາບໃນໄລຍະໄກ ຜູ້ບາດເຈັບເປັນຜູ້ຍິງ ເຊິ່ງກຳລັງຈະເດີນທາງໄປ ແຂວງນະຄອນສີທຳມະຣາດ ທາງຍ່າງ south Corridor ລະຫວ່າງ Pier4-Pier5 ອາຄານຜູ້ໂດຍສານພາຍໃນປະເທດອາຄານ 2.
ໂດຍພາບຈາກກ້ອງວົງຈອນປິດເຫັນພາບ ກ່ອນເກີດເຫດ, ກະເປົາໄປກະທົບທີ່ຂາຊ້າຍຂອງຜູ້ໂດຍສານ ລະຫວ່າງຜູ້ໂດຍສານຢູ່ເທິງທາງເລື່ອນ ຈາກນັ້ນກໍລົ້ມລົງ ແລະ ຂາຊ້າຍຖືກດູດຈົນຂາດ ເຊິ່ງທາງເຈົ້າໜ້າທີ່ຫຼາຍພາກສ່ວນ ເລັ່ງກວດສອບເຫດການທີ່ເກີດຂຶ້ນ.
ທີ່ມາ: ໄທລັດ