ໃນວາລະດຳເນີນກອງປະຊຸມ ສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 28 ມິຖຸນາ 2023 ນີ້, ທ່ານ ນາງ ວາລີ ເວດສະພົງ ສສຊ ເຂດເລືອກຕັ້ງທີ 1 ນະຄອນຫຼວງວຽງຈັນ ປະກອບຄຳເຫັນກ່ຽວກັບການປະເມີນການອອກພັນທະບັດ ມີປະສິດທິຜົນແລ້ວບໍ ພ້ອມຢືນຢັນວ່າ ເງິນຕາຕ່າງປະເທດ ຢູ່ນອກລະບົບມີຫຼາຍ.
ການອອກພັນທະບັດນີ້ຍັງບໍ່ສາມາດມັນຕອບໂຈດເລື່ອງບັນຫາເງິນເຟີ້ ເນື່ອງຈາກປະຊາຊົນລາວສ່ວນຫຼາຍແມ່ນນຳໃຊ້ເງິນ 3-4 ສະກຸນ ເມື່ອອອກພັນທະບັດມາກໍພຽງແຕ່ດູດເງິນກີບເຂົ້າໄປ ແລະ ເຮັດໃຫ້ລະບົບທະນາຄານບໍ່ມີເງິນກີບ ແຕ່ເງິນກີບກໍຍັງອ່ອນຄ່າຄືເກົ່າ ເນື່ອງຈາກປະຊາຊົນຍັງໃຊ້ເງິນສະກຸນອື່ນ ເພາະບໍ່ໄດ້ຜິດກົດໝາຍ.
ອີກບັນຫາໜຶ່ງທີ່ເປັນການອ່ອນຄ່າເງິນກີບນັ້ນກໍຄື ຍິ່ງມີແຈ້ງການຊຳລະຄ່າໄຟຟ້າເປັນເງິນຕາ ຍິ່ງເປັນການເຮັດໃຫ້ເງິນກີບອ່ອນຄ່າລົງ.
ພ້ອມນີ້ ທ່ານ ນາງ ວາລີ ເວດສະພົງ ຍັງສະເໜີວິທີການດູດເງິນຕາເຂົ້າລະບົບ ເຖິງວ່າປະຊາຊົນ ແລະ ທະນາຄານທຸລະກິດຈະໄດ້ຮັບຜົນກະທົບເລື່ອງຄວາມຫຍຸ້ງຍາກກໍຕາມ ແຕ່ມັນເປັນຜົນດີໃນອະນາຄົດດກ່ຽວກັບຄ່າຂອງເງິນກີບ ແລະ ຮຽກຮ້ອງໃຫ້ລັດຖະບານອອກມາແກ້ໄຂກໍຄື ຂ່າວກ່ຽວກັບປະເທດລາວຫັນມາໃຊ້ເງິນຢວນ ເຊິ່ງມັນສ້າງຄວາມເສຍຫາຍ ແລະ ສ້າງຄວາມບໍ່ເຊື່ອໝັ້ນໃຫ້ແກ່ສະກຸນເງິນກີບ.
ສະເໜີໃຫ້ລັດຖະບານ ຊຸກຍູ້ນະໂຍບາຍກ່ຽວກັບລົດໄຟຟ້າ ເນື່ອງຈາກສປປ ລາວ ເປັນແຫຼ່ງຜະລິດໄຟຟ້າຂະໜາດໃຫຍ່ໃນອາຊີ ທັ້ງນີ້ກໍເພື່ອເປັນການຫຼຸດຜ່ອນການນຳເຂົ້ານ້ຳມັນ ເພາະເປັນການກົດດັນເລື່ອງການໃຊ້ເງິນຕາອີກດ້ວຍ ແລະ ຢາກໃຫ້ທາງລັດຖະບານເຈລະຈາແກ້ໄຂໃນການຊື້-ຂາຍແຮ່ທາດ ໃຫ້ນຳໃຊ້ເປັນກີບ ເພາະເປັນສິ່ງທີ່ເຮົາໄດ້ປຽບ.