ຈາກເສດຖະກິດໃນປັດຈຸບັນເຮົາສາມາດເຫັນໄດ້ວ່າ ລາຍຮັບທີ່ໄດ້ ບໍ່ສອດຄ່ອງກັບເສດຖະກິດໃນປັດຈຸບັນ ໂດຍສະເພາະແມ່ນ ຄ່າຫໍພັກ ນໍ້າມັນເຊື້ອໄຟ ແລະ ສິນຄ້າຕ່າງໆ ທີ່ມີລາຄາອີງຕາມອັດຕາແລກປ່ຽນທີ່ເພີ່ມຂຶ້ນສູງເລື່ອຍໆ.
ໃນຕອນບ່າຍຂອງວາລະດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 26 ມິຖຸນາ 2023, ບັນດາສະມາຊິກສະພາແຫ່ງຊາດ (ສສຊ) ໄດ້ສຸມໃສ່ປະກອບຄຳເຫັນໃສ່ບົດລາຍງານຂອງລັດຖະບານໃນຫລາຍບັນຫາສຳຄັນ, ໃນນັ້ນ ທ່ານ ໄຊຍະເດດ ຜຸຍຍະວົງ ສສຊ ປະຈຳເຂດເລືອກຕັ້ງທີ 13, ແຂວງສະຫວັນນະເຂດ ໄດ້ມີຄຳເຫັນແລກປ່ຽນ ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ເຊິ່ງໂດຍລວມ ແມ່ນເຫັນດີເປັນເອກະພາບ ແລະ ຍ້ອງຍໍຊົມເຊີຍ ຕໍ່ລັດຖະບານ ທີ່ໄດ້ບຸກບືນສູ້ຊົນແກ້ໄຂບັນ ຫາຄວາມຫຍຸ້ງຍາກທາງດ້ານເສດຖະກິດ-ການເງິນ ທີ່ ສປປ ລາວ ກຳລັງປະເຊີນໜ້າໃນປັດຈຸບັນ.
ພ້ອມນັ້ນ ຍັງໄດ້ສະເໜີ ໃຫ້ລັດຖະບານ ແກ້ໄຂບັນຫາຄ່າຈ້າງງານຂອງກຳມະກອນ ຊາວຜູ້ອອກແຮງງານ ຕາມໂຮງຈັກໂຮງງານ ໂດຍເລີ່ມຈາກ ບັນດາບໍລິສັດທຳການຜະລິດເພື່ອສົ່ງອອກ ແລະ ສ້າງລາຍໄດ້ໃຫ້ບໍລິສັດເປັນສະກຸນເງິນຕ່າງປະເທດ, ສະເໜີໃຫ້ພາກລັດກະຕຸກຊຸກຍູ້ໃຫ້ບໍລິສັດຄິດໄລ່ເງິນເດືອນ ໂດຍທຽບຖານການຄິດໄລ່ ເງິນເດືອນພະນັກງານ ໃສ່ເງິນຕາຕ່າງປະເທດ ຕາມອັດຕາແລກປ່ຽນ ເພື່ອເຮັດໃຫ້ແຮງງານລາວ ທີ່ອອກແຮງງານຕາມບໍລິສັດຕ່າງໆ ມີເງິນເດືອນກຸ້ມກິນ ແລະ ສາມາດສືບຕໍ່ເຮັດວຽກໄດ້ ແນໃສ່ສະກັດກັ້ນການຫລັ່ງໄຫລອອກນອກປະເທດຂອງແຮງງານລາວຊຶ່ງສົ່ງຜົນກະທົບຕໍ່ແຜນພັດທະນາເສດຖະກິດ-ສັງຄົມຂອງ ສປປ ລາວ.
ທ່ານ ໄຊຍະເດດ ຜຸຍຍະວົງ ກ່າວອີກວ່າ: ຕໍ່ກັບແຮງ ງານລາວ ທີ່ໄປເຮັດວຽກຢູ່ປະເທດເພື່ອນບ້ານ, ສະເໜີ ໃຫ້ກະຊວງ ການຕ່າງປະເທດ ປະສານສົມທົບກັບກະຊວງແຮງງານ ແລະ ສະຫວັດດີການສັງຄົມ ແຕ່ງຕັ້ງທີ່ປຶກສາແຮງງານ (ທູດແຮງງານ) ໄປປະຈໍາຢູ່ບັນດາປະເທດ ທີ່ແຮງງານລາວໄປເຮັດວຽກຫລາຍ ແນໃສ່ປົກປ້ອງບໍ່ໃຫ້ແຮງງານຂອງພວກເຮົາຕົກ ຢູ່ໃນເຄືອຂ່າຍການຄ້າມະນຸດບໍ່ວ່າທາງດ້ານການຂູດຮີດແຮງງານ ກໍຄື ການຄ້າມະນຸດ.
ທ່ານ ໄຊຍະເດດ ຜຸຍຍະວົງ ກ່າວເນັ້ນອີກວ່າ: ຄວາມເຂົ້າໃຈຂອງບໍລິສັດ ແລະ ພະນັກງານ-ສາມະຊິກພັກ ທີ່ເຮັດວຽກຄຸ້ມຄອງໂຮງຈັກໂຮງງານ ກໍຄືເຂດເສດຖະກິດພິເສດ ຕ້ອງເຂົ້າໃຈວ່າ ເງິນເດືອນພື້ນຖານ 1 ລ້ານ 3 ແສນກີບແມ່ນເປັນເງິນເດືອນຂັ້ນຕໍ່າສຸດຢູ່ ສປປ ລາວ ບໍ່ແມ່ນລະດັບເງິນເດືອນຜູກຂາດ. ຄ່າຈ້າງງານ ແມ່ນອີງໃສ່ຄວາມອາດສາມາດຂອງບໍລິສັດ ແລະຄວາມເພີ່ງພໍໃຈ ຂອງຜູ້ຮັບຈ້າງງານ, ຫາກເງິນເດືອນບໍ່ກຸ້ມກິນ ບໍ່ສົມຄູ່ກັບການຂະຫຍາຍຕົວຂອງເສດຖະກິດໄລຍະໃໝ່ ແນ່ນອນກຳມະກອນ- ຊາວຜູ້ອອກແຮງງານ ຍ່ອມລາອອກໄປເຮັດອັນອື່ນ ເພາະສະພາບປັດຈຸບັນ ເງິນເດືອນ 1.300.000 ກີບທີ່ເຂົາເຄີຍໄດ້ຮັບໃນເມື່ອກ່ອນມີຄ່າເທົ່າກັບ 150 ໂດລາສະຫະລັດແຕ່ວ່າ ຄ່າຂອງເງິນເດືອນ ຂອງພວກເຂົາໄດ້ຮັບໃນປັດຈຸບັນ ຍັງເຫລືອພຽງ 68 ໂດລາ. ໃນຂະນະດຽວກັນຄ່າຫໍພັກ, ນໍ້າມັນເຊື້ອໄຟ ແລະ ສິນຄ້າຕ່າງໆ ທີ່ເຂົາບໍລິໂພກຂາຍ ແມ່ນຄິດໄລ່ທຽບຖານໃສ່ເງິນຕາຕ່າງປະເທດໝົດ ເຮັດໃຫ້ພວກເຂົາບໍ່ສາມາດອອກແຮງງານຕໍ່ໄປໄດ້. ຖ້າພວກເຮົາສາມາດແກ້ໄຂປັນຫາຄ່າແຮງງານໄດ້ ພວກເຮົາຈະສາມາດຮັກສາຖານການຜະລິດ ໄວ້ໄດ້ ແລະ ໃນໄລຍະຍາວ ເສດຖະກິດ ຈະດັດສົມຕົວມັນເອງເຂົ້າສູ່ສະພາວະປົກກະຕິ ສັງຄົມກໍຈະມີເງິນເດືອນກຸ້ມກິນຄືກັບເມື່ອກ່ອນ.
ແຫຼ່ງຂ່າວ ປະເທດລາວ