ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ພ້ອມຄະນະ ລົງພົບປະໂອ້ລົມ, ຊຸກຍູ້-ຊີ້ນໍາວຽກງານຢູ່ພະແນກຖະແຫຼງຂ່າວ,ວັດທະນະທຳ ແລະ ທອງທ່ຽວ (ຖວທ) ແຂວງຈຳປາສັກ ເພື່ອໃຫ້ສືບຕໍ່ມີການພັດທະນາ ແລະຫັນປ່ຽນຕາມທິດທີ່ຕັ້ງໜ້າ ແລະ ທັນສະໄໝຕາມມະຕິຂອງພັກໄດ້ວາງອອກ ໃນວັນທີ 16 ມິຖຸນາ 2023 ຜ່ານມາ ໂດຍໃຫ້ກຽດຕ້ອນຮັບ ຂອງທ່ານ ນາງ ແສງສຸວັນ ຊຸຍພະສິດ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວແຂວງ ພ້ອມດ້ວຍຄະນະ.
ການຈັດຕັ້ງປະຕິບັດວຽກງານ ຖວທ ໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ໂດຍຍົກໃຫ້ເຫັນດ້ານການເມືອງແນວຄິດ, ການຈັດຕັ້ງ, ກໍ່ສ້າງພັກ-ພະນັກງານ, ວຽກງານຖະແຫຼງຂ່າວ-ສື່ມວນຊົນ, ວຽກງານວັດທະນະທໍາ ແລະ ວຽກງານທ່ອງທ່ຽວ ໂດຍສະເພາະວຽກງານຖະແຫຼງຂ່າວ-ສື່ມວນຊົນ, ຄະນະພັກ-ຄະນະພະແນກ ໄດ້ສຸມໃສ່ປັບປຸງ ແລະ ຫັນປ່ຽນພື້ນຖານເຕັກນິກ ຂອງວຽກງານສື່ມວນຊົນກ້າວໄປສູ່ທັນສະໄໝ ເຊັ່ນລະບົບດີຈິຕອນ ແລະ ລະບົບອອນລາຍ ໄດ້ຂະຫຍາຍຄື້ນວິທະຍຸກະຈາຍສຽງ ແລະ ໂທລະພາບ ໃຫ້ກວມພື້ນທີ່ເປັນສ່ວນຫຼາຍຂອງແຂວງ, ປັດຈຸບັນໃນທົ່ວແຂວງ ມີສະຖານີວິທະຍຸກະຈາຍສຽງ 5 ສະຖານີ, ເຊິ່ງສາຖານີວິທະຍຸ ໂທລະພາບສາມາດກະຈາຍຄື້ນສຽງ ພາບຜ່ານດາວທຽມໄດ້ກວມພື້ນທີ່ 100% ສາມາດຮັບຟັງ ແລະ ຊົມໄດ້ອີກ 26 ປະເທດທົ່ວໂລກ.
ສ່ວນວຽກງານທ່ອງທ່ຽວ ໄດ້ສຸມໃສ່ການປັບປຸງ ແລະ ສະໜອງຂໍ້ມູນຂ່າວສານການທ່ອງທ່ຽວ ໃຫ້ແກ່ນັກທ່ອງທ່ຽວທັງພາຍໃນ ແລະ ຕ່າງປະເທດ ສິ່ງທີ່ພົ້ນເດັ່ນໃນ 6 ເດືອນຜ່ານມາ ໄດ້ມີຈຳນວນນັກທ່ອງທ່ຽວເຂົ້າມາທ່ອງທ່ຽວແຂວງຈຳປາສັກ ທັງໝົດ 143.689 ເທື່ອຄົນ, ທຽບໃສ່ແຜນປີປະຕິບັດໄດ້ 63 ໃນນີ້ມີນັກທ່ອງທ່ຽວພາຍໃນ 11.455 ເທື່ອຄົນ, ສາມາດສ້າງລາຍຮັບໄດ້ 28.717.040 ໂດລາສະຫະລັດ, ທຽບໃສ່ແຜນການປີປະຕິບັດໄດ້ 205%.
ແຫຼ່ງຂ່າວ ປະເທດລາວ