ໂຕໂນ່ ນຳທີມ One man and the river ສົ່ງມອບອຸປະກອນການແພດໃຫ້ແກ່ໂຮງໝໍແຂວງຄຳມ່ວນ

0
4497

ໃນວັນທີ 19 ມິຖຸນາ 2023 ທີ່ໂຮງໝໍແຂວງຄຳມ່ວນ ທ້າວ ພາຄິນ ຄຳວິໄລສັກ ຫຼື ໂຕໂນ່ ນັກຮ້ອງນັກສະແດງຈາກປະເທດໄທ ໄດ້ນຳຄະນະທີມ One man and the river ໜຶ່ງຄົນລອຍນ້ຳ ຫຼາຍຄົນໃຫ້ ຮ່ວມສົ່ງມອບອຸປະກອນ ແລະ ເຄື່ອງມືການແພດ ຄັ້ງທີ 2 ໃຫ້ກັບໂຮງໝໍໃນແຂວງຄຳມ່ວນ ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມກັບຄະນະແພດໝໍ ທີ່ໄດ້ໃຫ້ການຕ້ອນຮັບ.

ໂດຍການສົ່ງມອບມີ 2 ຄັ້ງທັງໃນແຂວງຄຳມ່ວນ ແລະ ນະຄອນພະຍົມ ປະເທດໄທ ມີອຸປະກອນ ແລະ ເຄື່ອງມືທາງການແພດ ລວມມູນຄ່າ 100 ກວ່າລ້ານບາດ ຫຼື 53,047 ຕື້ກິບ ໂດຍຈະສົ່ງມອບໃຫ້ລາວ ລວມມູນຄ່າ 20 ກວ່າລ້ານບາດ ຫຼື 17,1 ຕື້ກີບ ປະກອບມີ ເຄື່ອງຊ່ວຍຫາຍໃຈສຳລັບເດັກນ້ອຍ 2 ເຄື່ອງ, ເຄື່ອງເຝົ້າຕິດຕາມສັນຍານຊີບ 5 ເຄື່ອງ, ເຄື່ອງກະຕຸ້ນຫົວໃຈ 3 ເຄື່ອງ, ເຄື່ອງວັດແທກຄວາມດັນເລືອດ 12 ເຄື່ອງ, ເຄື່ອງວັດແທກຄວາມດັນຊະນິດສອດແຂນ 3 ເຄື່ອງ, ເຄື່ອງດຶງຄໍ/ດຶງຫຼັງ 1 ເຄື່ອງ, ເຄື່ອງສະແກນສຳລັບກາຍະພາບ 2 ເຄື່ອງ, ໝໍ້ຕົ້ມແຜ່ນປະຄົບຮ້ອນ 1 ເຄື່ອງ ແລະ ອຸປະກອນອື່ນໆອີກຈຳນວນຫຼາຍ.

ໃນໂອກາດນີ້ ໂຕໂນ່ ກໍສະແດງຄວາມຮູ້ສຶກດີໃຈ ແລະ ຂອບໃຈແກ່ບັນດາແພດໝໍທີ່ໃສ່ໃຈ ແລະ ຊ່ວຍກັນຄັດເລືອກຫາເຄື່ອງມືທີ່ດີທີ່ສຸດໃຫ້ແກ່ປະຊາຊົນລາວ ການໄດ້ເຄື່ອງມືຄັ້ງນີ້ ຖືເປັນຂອງຂັວນ ແລະ ກຳລັງໃຈໃຫ້ແພດໝໍ ເຮັດວຽກໄດ້ໄວຂຶ້ນ.

ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ກໍໄດ້ກ່າວຄຳຂອບໃຈແກ່ ໂຕໂນ່ ທີ່ໄດ້ຈັດຫາອຸປະກອນທາງແພດທີ່ສຳຄັນ ແລະ ມີຄວາມຈຳເປັນຕໍ່ໂຮງໝໍແຂວງຄຳມ່ວນ ເຮັດໃຫ້ຄະນະແພດໝໍສາມາດຊ່ວຍເຫຼືອຄົນເຈັບໄຂ້ໄດ້ປ່ວຍທີ່ມາຮັບການຮັກສາຢູ່ໂຮງໝໍໄດ້ດີຂຶ້ນ ໂດຍຂະນະນີ້ ກໍຢູ່ໃນລະຫວ່າງການກຽມນຳສະເໜີຕໍ່ລັດຖະບານລາວ ເພື່ອມອບຫຼຽນແທນຄຸນງາມຄວາມດີໃຫ້ແກ່ ໂຕໂນ່ ພ້ອມຄະນະ.

ແຫຼ່ງຂ່າວ thainews