ກອງບັນຊາການ ປກສ ແຂວງຊຽງຂວາງ ສົມທົບກັບ ກໍາລັງປ້ອງກັນຊາດແຂວງຊຽງຂວາງ ອອກກວດກາລາດຕະເວນ ບໍລິເວນພູແຮ້ ເມືອງແປກ ແຂວງຊຽງຂວາງ ວັນທີ 12 ມິຖຸນາ 2023 ຜ່ານມາ, ພົບເຫັນປະຊາຊົນລັກລອບ ຂຸດຄົ້ນແຮ່ທາດທໍາມະຊາດ ໂດຍບໍ່ຖືກຕ້ອງຕາມກົດໝາຍ 40 ຄົນ ໃນນັ້ນມີຍິງ 15 ຄົນ ແລະ ລົດຈັກ 47 ຄັນ, ພ້ອມມີແຮ່ທາດ 36 ເປົາ ແລະ ມີອຸປະກອນຈໍານວນໜຶ່ງ.
ດັ່ງນັ້ນເຈົ້າໜ້າທີ່ຈຶ່ງກັກຕົວມາສອບສວນ ຜ່ານການສອບສວນປະຊາຊົນຈໍານວນໜຶ່ງຮັບສາລະພາບວ່າ: ໄດ້ຂຶ້ນໄປຂຸດຄົ້ນແຮ່ທາດຢູ່ບໍລິເວນດັ່ງກ່າວແທ້ ແຕ່ອີກຈໍານວນໜຶ່ງໃຫ້ການວ່າອອກໄປວຽກສ່ວນຕົວ, ສະນັ້ນ ເຈົ້າໜ້າທີ່ຈຶ່ງສົມທົບກັບພາກສ່ວນກ່ຽວຂ້ອງເກັບກໍາຂໍ້ມູນຢ່າງລະອຽດ ເພື່ອຊອກວ່າຜູ້ໃດລັກລອບຂຸດຄົ້ນແຮ່ທາດແທ້ ແມ່ນຈະໄດ້ປະຕິບັດລະບຽບກົດໝາຍຕາມຂັ້ນຕອນຕໍ່ໄປ ສ່ວນຜູ້ທີ່ບໍ່ກ່ຽວຂ້ອງແມ່ນຈະສຶກສາອົບຮົມ ເຮັດບົດບັນທຶກກ່າວເຕືອນ ແລະ ປ່ອຍຕົວໄປ. ສໍາລັບລົດຈັກ 47 ຄົນ ເຈົ້າໜ້າທີ່ຈະເກັບຮັກສາໄວ້ໃຫ້ປະຊາຊົນ ນໍາເອົາເອກະສານຖືກຕ້ອງມາຢັ້ງຢືນເອົາ.
ນອກນີ້, ເຈົ້າໜ້າທີ່ໄດ້ຮຽກຮ້ອງໃຫ້ປະຊາຊົນທຸກຄົນໃນທົ່ວສັງຄົມ ສຶກສາອົບຮົບລູກຫຼານຂອງຕົນບໍ່ໃຫ້ໄປລັກລອບຂຸດຄົ້ນແຮ່ທາດທໍາມະຊາດຢ່າງຊະຊາຍ ຫຼື ຜູ້ທີ່ກໍາລັງຂຸດຄົ້ນຢູ່ແມ່ນໃຫ້ຢຸດເຊົາ ຖ້າຫາກພົບເຫັນຈະໄດ້ນໍາມາລົງໂທດຕາມລະບຽບກົດໝາຍ.
ແຫຼ່ງຂ່າວ ປກສ ແຂວງຊຽງຂວາງ