ໃນວັນທີ 13 ມິຖຸນາ 2023 ທີ່ຜ່ານມາ, ໂດຍການເປັນປະທານຂອງ ສະຫາຍ ສຸລິວັດ ສຸວັນນະຈູມຄໍາ ກໍາມະການພັກກະຊວງ, ເລຂາໜ່ວຍພັກຮາກຖານ, ຫົວໜ້າກົມຄຸ້ມຄອງໜີ້ສິນສາທາລະນະ ໂດຍເປັນກຽດເຂົ້າຮ່ວມໂອ້ລົມຂອງ ສະຫາຍ ສັນຕິພາບ ພົມວິຫານ ກໍາມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການເງິນ, ສະຫາຍ ກົງຄໍາ ສິດທິວໍລະດາ ກໍາມະການພັກກະຊວງ, ເລຂາໜ່ວຍພັກຮາກຖານກົມຈັດຕັ້ງ ແລະ ພະນັກງານ, ຕາງໜ້າໜ່ວຍພັກຮາກຖານກົມກວດກາຄະນະຮັບຜິດຊອບຕິດຕາມກອງປະຊຸມ, ພ້ອມດ້ວຍສະມາຊິກພັກເຂົ້າຮ່ວມ.
ກອງປະຊຸມຄັ້ງນີ້, ໄດ້ຜ່ານມະຕິຕົກລົງວ່າດ້ວຍການອະນຸມັດ ເປີດກອງປະຊຸມກາງສະໄໝ, ຜ່ານມາດຕະຖານພະນັກງານນຳພາ-ຄຸ້ມຄອງ ສະບັບເລກທີ 030/ກມສພ, ລົງວັນທີ 03 ມັງກອນ 2018, ຜ່ານມາດຕະຖານສະມາຊິກພັກ, ຂໍ້ຫ້າມຂອງສະມາຊິກພັກ, ສິດ ແລະ ໜ້າທີ່ຂອງຄະນະພັກແຕ່ລະຂັ້ນ, ພ້ອມທັງທາບທາມຢັ່ງຫາງສຽງຄວາມເຊື່ອໝັ້ນໄວ້ວາງໄຈ ແລະ ໄດ້ພ້ອມກັນລົງຄະແນນສຽງຕໍ່ການນໍາພາລວມ, ບຸກຄົນໃນຄະນະໜ່ວຍພັກຕໍ່ການນໍາພາ-ຊີ້ນໍາ ການຈັດຕັ້ງປະຕິບັດວຽກງານຮອບດ້ານໄລຍະຜ່ານມາ.
ໃນວາລະກອງປະຊຸມ, ສະຫາຍ ສຸລິວັດ ສຸວັນນະຈູມຄໍາ ໄດ້ໃຫ້ຮູ້ວ່າ: ຕະຫລອດໄລຍະປີ 2021-2023 ຜ່ານມາ, ຄະນະໜ່ວຍພັກ ໄດ້ຖືເປັນບັນຫາສຳຄັນໃນວຽກງານສຶກສາອົບຮົມການ ເມືອງ-ແນວຄິດ ໃຫ້ແກ່ສະມາຊິກພັກ-ພະນັກງານ, ໄປພ້ອມໆກັບການເຊື່ອມຊຶມ, ເຜີຍແຜ່ບັນດາມະຕິຄຳສັ່ງ, ເອກະສານສຳຄັນຕ່າງໆຂອງພັກ ແລະ ລັດຄຽງຄູກັບວຽກງານກໍ່ສ້າງພັກ ແລະ ວຽກງານປັບປຸງກົງຈັກການຈັດຕັ້ງ, ແບບແຜນວິທີການນຳພາລວມທັງດ້ານວຽກວິຊາສະເພາະ ຕາມພາລະບົດ ບາດ, ສິດ ແລະ ໜ້າທີ່ຂອງຕົນຢ່າງຕັ້ງໜ້າ, ສ້າງ ແລະ ປະຕິບັດແຜນກຳນົດພະນັກງານນຳພາຄຸ້ມຄອງ ແລະ ວຽກງານອື່ນໆໄດ້ມີການເຕີບໃຫຍ່ ແລະ ມີຜົນສຳເລັດຢ່າງໜັກແໜ້ນເຂັ້ມແຂງຂຶ້ນເປັນກ້າວໆຢ່າງມີຄຸນນະພາບ.
ພ້ອມນີ້, ຍັງໄດ້ຜ່ານບົດສໍາຫຼວດ ນໍາພາລວມຂອງຄະນະພັກກາງສະໄໝ ແລະ ວິທີແກ້ໄຂໃນຕໍ່ໜ້າ, ຜ່ານບົດສະຫຼຸບຕີລາ ຄາການຈັດຕັ້ງປະຕິບັດແຜນດໍາເນີນງານຂອງກົມ ແລະ ທິດທາງການຈັດຕັ້ງປະຕິບັດໃນຕໍ່ໜ້າ ຈາກນັ້ນ, ຜູ້ເຂົ້າຮ່ວມຍັງໄດ້ປະກອບຄໍາເຫັນ ຕໍ່ບົດສະຫຼຸບຕີລາຄາການນໍາພາ-ຊີ້ນໍາວຽກງານຮອບດ້ານກາງສະໄໝ (2021-2023) ແລະ ທິດທາງແຜນການທ້າຍສະໄໝ 2023-2025 ຂອງໜ່ວຍພັກກົມຄຸ້ມຄອງໜີ້ສິນສາທາລະນະນ ຕື່ມອີກ.
ໂອກາດນີ້, ສະຫາຍ ສັນຕິພາບ ພົມວິຫານ ໄດ້ມີຄຳເຫັນໂອ້ລົມບາງຕອນສຳຄັນວ່າ: ກອງປະຊຸມກາງສະໄໝນີ້, ເປັນການສະຫຼຸບວຽກງານຮອບດ້ານຂອງຄະນະພັກ, ສືບຕໍ່ກໍ່ສ້າງວຽກງານທາງດ້ານການເມືອງໃຫ້ມີຄວາມໜັ້ກແໜ້ນເຂັ້ມແຂງ ແລະ ໄດ້ເນັ້ນໃຫ້ຄະນະໜ່ວຍພັກເພີ່ມທະວີໃນວຽກງານການຂະຫຍາຍສະມາຊິກພັກ ໃຫ້ຮັບປະກັນຄຸນນະພາບ, ເຂັ້ມງວດຕາມລະບຽບຂອງພັກ, ເອົາໃຈໃສ່ຕາມເນື້ອໃຈຈິດໃຈຫຼັກຂອງກອງປະຊຸມໃຫຍ່ຂອງສູນກາງພັກ ໃຫ້ສາມາດບຸກທະລຸໄດ້ໃນການສ້າງການຫັນປ່ຽນຢ່າງແທ້ຈິງ. ພ້ອມທັງມີການການສຳຫຼວດກວດກາ, ຕຳນິສົ່ງຂ່າວ ເພື່ອໃຫ້ມີການປັບປຸງ ແລະ ເຊີດຄວາມຮັບຜິດຊອບໃຫ້ສູງຂຶ້ນກວ່າເກົ່າ.
—–
Cr.ປະເທດລາວ