ກົມນະໂຍບາຍ ແລະ ແຜນພະລັງງານກະຊວງພະລັງງານ ແລະ ບໍ່ແຮ່, ໄດ້ຈັດກອງປະຊຸມຖອດຖອນ ແລະ ແລກ
ປ່ຽນບົດຮຽນກັບສາກົນກ່ຽວກັບການພັດທະນາພະລັງງານແບບຍືນຍົງເພື່ອສ້າງຄວາມເຂັ້ມແຂງກ່ຽວກັບວິໄສ
ທັດ, ນະໂຍບາຍ, ການຄຸ້ມຄອງ, ການຜະລິດ, ການຈຳໜ່າຍ, ການນຳໃຊ້ ແລະ ການຂົນສົ່ງ ເພື່ອຮ່ວມກັນແກ້ໄຂ
ແລະ ເອົາໃຈໃສ່ຕໍ່ບັນດາສິ່ງທ້າທາຍ ແລະ ຂໍ້ຫຍຸ້ງຍາກດ້ານພະລັງງານ ທີ່ຫລາຍປະເທດພວມຜະເຊີນໃນປັດຈຸ
ບັນ ໂດຍສະເພາະການນຳໃຊ້ກາລະໂອກາດ ແລະ ຄວາມສາມາດບົ່ມຊ້ອນຂອງປະເທດໃຫ້ໄດ້ຮັບຜົນດີ.
ທ່ານ ດຣ. ບຸນທະວີ ສີສຸພັນທອງ ລັດຖະມົນຕີຊ່ວຍວ່າການກະຊວງແຜນການ ແລະ ການ ລົງທຶນໄດ້ກ່າວເປີດ
ກອງປະຊຸມດັ່ງກ່າວວ່າ: ກອງປະຊຸມຄັ້ງນີ້ ມີຄວາມໝາຍສຳຄັນຢ່າງຍິ່ງ ຕໍ່ຫລາຍຂະແໜງການຂອງລາວ ເຊິ່ງ
ບັນດາຜູ້ເຂົ້າຮ່ວມ ຈະໄດ້ຮັບຟັງບົດຮຽນ ແລະ ປະສົບປະການຕ່າງໆ, ສະພາບຄວາມເປັນຈິງ, ຂໍ້ສະດວກ ແລະ
ຂໍ້ຫຍຸ້ງຍາກທີ່ສາມາດຖອດຖອນໄດ້ຈາກການນຳສະເໜີ ແລະ ແລກປ່ຽນຄຳຄິດຄຳເຫັນຈາກ ບັນດາຜູ້ມີປະສົບ
ການຈາກຕ່າງປະເທດ ເຊິ່ງລ້ວນແລ້ວຈະເປັນບົດຮຽນອັນລ້ຳຄ່າມະຫາສານ ທີ່ສາມາດນຳໄປຈັດຕັ້ງປະຕິບັດ
ໃຫ້ເກີດດອກອອກຜົນ ແລະ ເປັນຈິງໃນຕໍ່ໜ້າ.
ທ່ານລັດຖະມົນຕີຊ່ວຍວ່າການ ກະຊວງແຜນການ ແລະ ການລົງທຶນກ່າວຕື່ມວ່າ: ສປປ ລາວ ເຫັນໄດ້ເຖິງ
ຄວາມສຳຄັນໃນການສ້າງ ແລະ ສົ່ງເສີມຄວາມຮູ້, ຄວາມສາມາດໃນທຸກຂະແໜງການໃຫ້ມີຄວາມຮູ້, ຄວາມ
ເຂົ້າໃຈກ່ຽວກັບວຽກງານດ້ານພະລັງງານ ກໍຄືຍຸດທະສາດ ແລະ ການພັດທະນາພະລັງງານແບບຍືນຍົງ ຍ້ອນ
ພະລັງງານເປັນປັດໄຈພື້ນຖານ ໃນການຊຸກຍູ້ບັນດາຂະແໜງການທີ່ປິ່ນອ້ອມອື່ນໆໃຫ້ມີການຂະຫຍາຍຕົວ
ໄປຕາມກົນໄກຂອງການພັດທະນາຕາມຍຸກສະໄໝ.
ແຫລ່ງຂ່າວ: ລາວພັດທະນາ