ພົບສົບສາວເກົາຫຼີ ຖືກຄາຕະກຳ ໃນປະເທດກຳປູເຈຍ

0
12559

ອີງຕາມສຳນັກຂ່າວ Allkpop ລາຍງານໃນວັນທີ 10 ມິຖຸນາ 2023 ຜ່ານມາ, ພົບສົບຜູ້ຍິງໃນແອ່ງນ້ຳ ຢູ່ນະຄອນພະນົມເປນ ເມືອງຫຼວງຂອງກຳປູເຈຍ ເຊິ່ງສົບຖືກພົບເຫັນໃນວັນທີ 6 ມິຖຸນາ 2023, ສະພາບສົບຖືກຫໍ່ດ້ວຍຜ້າຫົ່ມ ແລະ ຖືກຖິ້ມລົງໃນແອ່ງນ້ຳໃນແຂວງກັນດານ.

ເຈົ້າໜ້າທີ່ຕຳຫຼວດກຳປູເຈຍໄດ້ກວດສອບພົບວ່າ: ຜູ້ເສຍຊີວິດມີຊື່ວ່າ Bj Ah Young ສາວເກົາຫຼີ ທີ່ມີຊື່ສຽງໂດ່ງດັງ ເຊິ່ງມີຜູ້ຕິດຕາມ 250,000 ຄົນໃນສື່ສັງຄົມອອນລາຍ ກ່ອນປະກາດອອກຈາກວົງການສະຕຮີມມິ່ງເມື່ອປີທີ່ຜ່ານມາ ເພື່ອໄປໃຊ້ຊີວິດໃໝ່ໃນຖານະຄົນທຳມະດາ.

ຫຼັງເກີດເຫດທາງການກຳປູເຈຍໄດ້ຈັບກຸມຄູ່ຮັກຊາວຈີນ ທີ່ເປັນເຈົ້າຂອງຄີນິກເສີມຄວາມງາມ ທີ່ຕົກເປັນຜູ້ຕ້ອງສົງໄສໃນການຄາຕະກຳຄັ້ງນີ້ໂດຍທັງຄູ່ໃຫ້ການວ່າ: ຜູ້ເສຍຊີວິດໄດ້ຮັບການຮັກສາດ້ານຄວາມງາມ ທີ່ຄີນິກໃນວັນທີ 4 ມິຖຸນາ 2023, ເຊິ່ງຜູ້ເສຍຊີວິດເກີດອາການວູບ, ຊັກ ແລະ ໝົົດສະຕີໄປໃນທີ່ສຸດ ກ່ອນທີ່ທາງເຈົ້າຂອງຄີນິກຢ້ານຄວາມຜິດ ຈຶ່ງເຮັດການຫໍ່ສົບ ແລະ ນຳໄປຖິ້ມໃນແອ່ງນ້ຳດັ່ງກ່າວ.

ສ່ວນສາເຫດການເສຍຊີວິດຄັ້ງນີ້ ທາງເຈົ້າໜ້າທີ່ຕຳຫຼວດຍັງຄົງຖ້າຜົນຂອງການພິສູດສົບ, ຢ່າງໃດກໍຕາມການລະບຸໂຕຕົນຂອງຜູ້ເສຍຊີວິດຍັງບໍ່ຊັດເຈນ ແຕ່ຜູ້ຄົນທີ່ໃຊ້ສື່ສັງຄົມອອນລາຍຕ່າງຄາດວ່າ: ຜູ້ຕາຍຄື Bj Ah Young ເຊິ່ງເປັນສະຕຮີມເມີຍອດນິຍົມໃນ AfeecaTV ເຊິ່ງເປັນໜຶ່ງເພຣດຟອມ ບໍລິການສະຕຮີມທີ່ໃຫຍ່ທີ່ສຸດຂອງເກົາຫຼີ.

ທີ່ມາ: Allkpop