ອີງຕາມ ໜ່ວຍກູ້ໄພສຸກເສີນອົງການກາແດງແຂວງອຸດົມໄຊ ລາຍງານໃນວັນທີ 7 ມິຖຸນາ 2023 ຜ່ານມານີ້ວ່າ: ເຈົ້າໜ້າທີ່ກູ້ໄພໄດ້ຮັບແຈ້ງເຫດຟ້າຜ່າ ເວລາ 16:35 ນາທີ ທີ່ບ້ານກອນແກ່ນ ເມືອງໄຊ ແຂວງອຸດົມໄຊ ເມື່ອເຖິງຈຸດເກີດເຫດພົບວ່າມີ ຜູ້ບາດເຈັບ 2 ຄົນ, ໃນເວລາຕໍ່ມາຈຶ່ງພົບຕື່ມອີກວ່າມີຜູ້ເສຍຊີວິດ 1 ຄົນຈາກເຫດການດັ່ງກ່າວ.
1. ຜູ້ບາດເຈັບ1: ເພດຊາຍ ອາຍຸ 35ປີ ໂດຍມີອາການປວດຕົນໂຕເບື້ອງຂວາ.
2. ຜູ້ບາດເຈັບ2: ເພດຊາຍ ອາຍຸ 16ປີ ມີອາການເຈັບຂາເບື້ອງຂວາ.
3. ຜູ້ເສຍຊີວິດ: ເພດຍິງ ອາຍຸ 38ປີ (ຜູ້ເປັນເມຍ ແລະ ແມ່ ຂອງຜູ້ບາດເຈັບ).
ຈາກການບອກເລົ່າຂອງຜູ້ເປັນຜົວຂອງຜູ້ເສຍຊີວິດໄດ້ເລົ່າວ່າ: ໃນຕອນແລງປະມານ 15:00 ນາທີ ຂອງວັນທີ 7 ມິຖຸນາ ທັງ 3 ຄົນແມ່ນໄດ້ໄປໄຮ່ຕາມປົກກະຕິ ແລ້ວເກີດມີຝົນຕົກ ຈຶ່ງໄດ້ພາກັນເຂົ້າໄປລົບຝົນຢູ່ທີ່ຖຽງໄຮ່ດັ່ງກ່າວ ເວລາຕໍ່ມາຈຶ່ງເກີດມີຟ້າຜ່າລົງກາງຖຽງເຮັດໃຫ້ຜູ້ເປັນເມຍເສຍຊີວິດລົງ.
Cr. ໜ່ວຍກູ້ໄພສຸກເສີນອົງການກາແດງແຂວງອຸດົມໄຊ