ໃນຕອນເຊົ້າຂອງວັນທີ 31 ພຶດສະພາ 2023 ນີ້ ບໍລິສັດ ພິກັດ ທີ່ປຶກສາ ຈໍາກັດຜູ້ດຽວ ໄດ້ເຂົ້າມາຜ່ານບົດລາຍງານການຄັດເລືອກແລວທາງ ຂອງໂຄງການທາງດ່ວນ ແຕ່ເມືອງວັງວຽງ ແຂວງວຽງຈັນ ຫາ ເມືອງລ້ອງແຈ້ງ, ເມືອງອະນຸວົງ ແຂວງໄຊສົມບູນ ໂດຍການເປັນປະທານ ຂອງທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ, ມີຮອງເລຂາພັກແຂວງ, ຮອງເຈົ້າແຂວງ ພ້ອມດ້ວຍ ເຈົ້າເມືອງ ແລະ ພະແນກການທີ່ກ່ຽວຂ້ອງ ຂອງແຂວງໄຊສົມບູນ, ມີຕາງໜ້າຈາກກົມຂົວທາງ ກະຊວງໂຍທາທິການ ແລະ ຂົນສົ່ງ, ຕາງໜ້າຈາກພະແນກໂຍທາທິການ ແລະ ຂົນສົ່ງ ແຂວງວຽງຈັນ ພ້ອມດ້ວຍທ່ານ ນາງ ປະທຸມພອນ ເພັດວົງສາ ຮອງປະທານບໍລິສັດ ວຽງຈັນ ໂອໂຕເມຊັນ ແອນໂຊລູຊັນ ເອັນຈີເນຍຣິງ ຈໍາກັດ ຊຶ່ງເປັນບໍລິສັດທີ່ລົງທຶນ ແລະ ທ່ານ ປະກາສິດ ຊຸມພົນພັກດີ ປະທານບໍລິສັດ ພິກັດ ທີ່ປຶກສາ ຈໍາກັດຜູ້ດຽວ ຕະຫຼອດຮອດພາກສ່ວນທີ່ກ່ຽວຂ້ອງ ເຂົ້າຮ່ວມ.

ກອງປະຊຸມ ໄດ້ຮັບຝັງການນໍາສະເໜີບົດລາຍງານ ການຄັດເລືອກແລວທາງ ຂອງໂຄງການທາງດ່ວນ ແຕ່ເມືອງວັງວຽງ ແຂວງວຽງຈັນ ຫາ ເມືອງລ້ອງແຈ້ງ ແລະ ເມືອງອະນຸວົງ ແຂວງໄຊສົມບູນ. ໂດຍປັດຈຸບັນ ບໍລິສັດໄດ້ເຊັນບົດບັນທຶກຄວາມເຂົ້າໃຈ MOU ກັບ ລັດຖະບານແຫ່ງ ສປປລາວ ຊຶ່ງຕາງໜ້າໂດຍກະຊວງແຜນການ ແລະ ການລົງທຶນ ເພື່ອດໍາເນີນການສໍາຫຼວດ, ເກັບກໍາຂໍ້ມູນ ແລະ ສຶກສາຄວາມເປັນໄປໄດ້ ຂອງໂຄງການ ຕາມຂັ້ນຕອນ ແລະ ໜ້າວຽກ ທີ່ໄດ້ກໍານົດໄວ້ ໃນ 2 ຊ່ວງທາງຄື: ຊ່ວງທີ1 ແມ່ນແຕ່ເມືອງວັງວຽງ ແຂວງວຽງຈັນ ຫາ ເມືອງອະນຸວົງ ແຂວງໄຊສົມບູນ ແລະ ຊ່ວງທີ 2 ແຕ່ເມືືອງອະນຸວົງ ຫາ ເມືອງລ້ອງແຈ້ງ ແຂວງໄຊສົມບູນ ໂດຍໄດ້ກໍານົດ 3 ແລວທາງເລືອກ ທີ່ປະກອບດ້ວຍຈຸດເຊື່ອມຕໍ່, ຈຸດຂຶ້ນ-ລົງ ແລະ ໄລຍະທາງ ທີ່ແຕກຕ່າງກັນ ເພື່ອໃຫ້ແຂວງໄຊສົມບູນ ພິຈາລະນາຮັບຮອງ. ຈາກນັ້ນ ຄະນະນໍາແຂວງໄຊສົມບູນ ໄດ້ພ້ອມກັນປະກອບຄໍາຄິດເຫັນ ແລະ ຕົກລົງເປັນເອກະພາບ ຮັບຮອງເອົາແລວທາງເລືອກທີ 2 ຊຶ່ງເປັນແລວທາງທີ່ມີໄລຍະສັ້ນກວ່າໝູ່, ມີຈຸດທີ່ຕັ້ງທີ່ຢູ່ໃກ້ຄຽງກັບຊຸມຊົນ ແລະ ມີຜົນກະທົບຕໍ່ສິ່ງແວດລ້ອມ-ສັງຄົມ ໜ້ອຍທີ່ສຸດ. ໂດຍແຂວງໄຊສົມບູນ ໄດ້ສະເໜີໃຫ້ບໍລິສັດເພີ່ມບາງຈຸດທາງແຍກຂື້ນ-ລົງ ລະຫວ່າງ ເມືອງວັງວຽງ ຫາ ເມືອງອະນຸວົງ, ແກ້ໄຂບາງຈຸດເຊື່ອມຕໍ່ ລະຫວ່າງ ເມືອງອະນຸວົງ ຫາ ເມືອງລ້ອງແຈ້ງ ໃຫ້ມີຄວາມເໝາະສົມ ແລະ ສອດຄ່ອງເກົ່າກ່ວາ ເພື່ອຮັບປະກັນໃຫ້ການພັດທະນາເສດຖະກິດ-ສັງຄົມ ແຂວງໄຊສົມບູນ ເປັນຕົ້ນແມ່ນການຂົນສົ່ງສິນຄ້າ, ການທ່ອງທ່ຽວ ແລະ ການສັນຈອນໄປມາ ມີຄວາມສະດວກສະບາຍ ພາຍຫຼັງທີ່ໂຄງການດັ່ງກ່າວ ສໍາເລັດ.

ພາບ-ຂ່າວ: Lao National Radio