ກອງປະຊຸມກາງສະໄໝ ຄັ້ງທີ I ຂອງຄະນະພັກຮາກຖານ ພະແນກພະລັງງານແລະບໍ່ແຮ່ (ພບ) ແຂວງເຊກອງ ໄດ້ໄຂຂຶ້ນໃນວັນທີ 18 ພຶດສະພາ 2023 ແລະສໍາເລັດລົງໃນວັນດຽວກັນ ທີ່ຫ້ອງປະຊຸມພະແນກສາທາລະນະສຸກແຂວງ, ເຂົ້າຮ່ວມເປັນປະທານໂດຍ ສະຫາຍ ນ.ຈັນຫອມ ມະຫາໄຊ ຮອງເລຂາພັກແຂວງ ຜູ້ຊີ້ນຳວຽກງານການເມືອງ-ແນວຄິດ ແລະ ວຽກພັກ-ພະນັກງານ, ສະຫາຍ ສົມນິດ ສິລິບຸນລ້ຽງ ຄະນະປະຈຳພັກແຂວງ ປະທານກວດກາພັກ-ລັດແຂວງ ຄະນະພັກຮາກຖານ ພບ ພ້ອມດ້ວຍສະມາຊິກພັກ, ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ຄໍາປະສົງ ທະນົງສິນ ຄະນະພັກຮາກຖານ ພບ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດມະຕິກອງປະຊຸມກາງສະໄໝ ຂອງຄະນະພັກຮາກຖານ ຕະຫຼອດໄລຍະ 2 ປີເຄິ່ງຜ່ານມາ ແລະ ທິດທາງແຜນການ ວຽກງານຈຸດສຸມໃນຊຸມປີຕໍ່ຫນ້າ, ຊຶ່ງຄະນະພັກຮາກຖານ ພບ ໄດ້ຖືເອົາການສຶກສາອົບຮົມການເມືອງ-ນໍາພາແນວຄິດໃຫ້ສະມາຊິກພັກ, ພະນັກງານ-ລັດຖະກອນເປັນກົກ ໂດຍຕິດພັນກັບການປັບປຸງ, ຂະຫຍາຍການຈັດຕັ້ງພັກ, ອົງການຈັດຕັ້ງມະຫາຊົນ ໃຫ້ເຂັ້ມແຂງ ແລະນໍາພາ-ຊີ້ນໍາວຽກງານວິຊາສະເພາະ ເປັນຕົ້ນ ການຂະຫຍາຍແຫຼ່ງຜະລິດພະລັງງານ ມີໂຄງການກໍ່ສ້າງເຂື່ອນໄຟຟ້າພາກເອກະຊົນພາຍໃນ ແລະ ຕ່າງປະເທດລົງທຶນທີ່ສຳເລັດ ແລະ ເປີດຜະລິດ-ຈຳໜ່າຍແລ້ວໃນ ປີ 2022 ມີ 3 ເຂື່ອນ(ສົມທຽບໃສ່ປີ 2020 ເພີ້ມຂຶ້ນ 1 ເຂື່ອນ)ຄື: ເຂື່ອນໄຟຟ້າຫ້ວຍລຳພັນໃຫຍ່, ມີກໍາລັງຕິດຕັ້ງ 88 ເມກາວັດ(MW), ຜະລິດກະແສໄຟຟ້າແຕ່ປີ 2020-2022 ຜະລິດໄດ້ 1.195.464.030 ກິໂລວັດໂມງ(KWh) ເປັນເງິນ 674.915.709.264 ກີບ, ຄ່າພາກຫຼວງ 1% ເປັນເງິນ 6.749 157,093 ກີບ, ເຂື່ອນໄຟຟ້າເຊຂະໝານ3 ມີກຳລັງຕິດຕັ້ງ 250 MW, ເລີ່ມແລ່ນທົດລອງໄລຍະ 6 ເດືອນທ້າຍປີ 2022 ຜະລິດກະແສໄຟຟ້າໄດ້ 947.860.000 KWh ຈຳໜ່າຍຂາຍອອກໃຫ້ປະເທດ ສສ ຫວຽດນາມ ໄດ້ 52.113.450 ໂດລາ, ເຂື່ອນໄຟຟ້າຫ້ວຍລໍາພັນຕອນລຸ່ມ ມີກໍາລັງຕິດຕັ້ງ 15 MW, ເລີ່ມຜະລິດກະແສໄຟຟ້າໃນປີ 2021-2022 ຜະລິດໄດ້ 95.285.175 KWh ຍັງຢູ່ໃນຂັ້ນຕອນການເຈລະຈາຄ່າກະແສໄຟຟ້າ ກັບ ໄຟຟ້າລາວ; ໃນທົ່ວແຂວງ ມີ 4 ເມືອງ ໄດ້ນໍາໄຊ້ໄຟຟ້າຖາວອນ ເທົ່າກັບ 100%, ບ້ານມີທັງໝົດ 199 ບ້ານ ໄດ້ນຳໃຊ້ໄຟຟ້າຖາວອນ 162 ບ້ານ ເທົ່າກັບ 81,4%, ທຽບໃນປີ 2020 ເພີ່ມຂຶ້ນ 27 ບ້ານ ເທົ່າກັບ 12,41%, ຈໍານວນຫຼັງຄາເຮືອນທົ່ວແຂວງ ມີທັງໝົດ 21,461 ຫຼັງຄາເຮືອນ ໄດ້ຊົມໃຊ້ໄຟຟ້າທັງໝົດ 18,512 ຫຼັງຄາເຮືອນ, ທຽບໃສ່ແຜນພັດທະນາເສດຖະກິດ-ສັງຄົມຂອງຂະແໜງພະລັງງານ ແລະ ບໍ່ແຮ່ 5 ປີ(2020-2025) ສາມາດປະຕິບັດໄດ້ 86,24%.
ທ່ານ ຄໍາປະສົງ ທະນົງສິນ ໃຫ້ຮູ້ຕື່ມວ່າ: ສໍາລັບແຜນການໃນຊຸມປີຕໍ່ຫນ້າ ຈະສືບຕໍ່ຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ, ເອົາໃຈໃສ່ຢ່າງຕັ້ງໜ້າສຶກສາອົບຮົມການເມືອງແນວຄິດໃຫ້ສະມາຊິກພັກ, ພະນັກງານໃນຂະແໜງການຕົນໃຫ້ມີຄວາມອຸ່ນອ່ຽງທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ, ປັບປຸງກໍ່ສ້າງ ແລະ ຂະຫນາຍການຈັດຕັ້ງພັກ, ປັບປຸງແບບແຜນການນໍາພາ-ວິທີເຮັດວຽກຂອງພະແນກ ແລະ ຂະແຫນງການໃຫ້ດີຂຶ້ນ, ສືບຕໍ່ຊຸກຍູ້ໂຄງການຂະຫຍາຍຕາຂ່າຍໄຟຟ້າອອກສູ່ຊົນນະບົດເຂດຫ່າງໄກສອກຫຼີກ ໃຫ້ປະຊາຊົນທົ່ວແຂວງໄດ້ນໍາໃຊ້ໄຟຟ້າຖາວອນ 90%ໃນປີ 2025, ຂະຫຍາຍໄຟເຍືອງທາງໃນເທສະບານແຂວງໃຫ້ມີປະສິດທິຜົນດີກວ່າເກົ່າ.
ທີ່ມາ: mediaLAOS