ສຳນັກຂ່າວ ABC Australia ໄດ້ລາຍງານວ່າ: ໃນວັນທີ 16 ພຶດສະພາ ທີ່ຜ່ານມາ ຢູເຄຣນເປີດເຜີຍວ່າ ກອງທັບຢູເຄຣນຍິງ ລູກສອນໄຟຄວາມໄວກວ່າສຽງຂອງຣັດເຊຍ ຕົກ 6 ລູກພາຍໃນຄືນດຽວ ຖືວ່າເປັນການທຳລາຍອາວຸດທີ່ຣັດເຊຍເຄີຍເວົ້າວ່າບໍ່ມີໃຜສາມາດຢຸດໄດ້.
ນັບເປັນຄັ້ງທຳອິດ ທີ່ຢູເຄຣນກ່າວວ່າ ສາມາດທຳລາຍລູກສອນໄຟຄວາມໄວກວ່າສຽງໄດ້ຈຳນວນຫຼາຍ ເຊິ່ງຖ້າວ່າໄດ້ຮັບການຢືນຢັນກໍຈະຖືວ່າ ຢູເຄຣນມີລະບົບປ້ອງກັນການໂຈມຕີທາງອາກາດທີ່ດີ ເຊິ່ງຢູເຄຣນໄດ້ມາຈາກປະເທດຕາເວັນຕົກ.
ລູກສອນໄຟນີ້ ຊື່ລູກສອນໄຟຄິນຊານ (Kinzhal) ເດີນທາງດ້ວຍຄວາມໄວກວ່າສຽງປະມານ 10 ເທົ່າ ເປັນສ່ວນໜຶ່ງຂອງລູກສອນໄຟ 18 ລູກທີ່ຣັດເຊຍຍິງໃສ່ຢູເຄຣນໃນໄລຍະທີ່ຜ່ານມານີ້.
ທາງດ້ານກະຊວງປ້ອງກັນປະເທດຂອງຣັດເຊຍ ເປີດເຜີຍວ່າ ລູກສອນໄຟຄິນຊານ ສາມາດທຳລາຍລະບົບປ້ອງກັນລູກສອນໄຟ ໜຶ່ງຊຸດທີ່ອາເມຣິກາໄດ້ຈັດສົ່ງໃຫ້ຢູເຄຣນ ແຕ່ທາງຜູ້ບັນຊາການທະຫານຢູເຄຣນ ວາເລຣີ ຊາລຸສ໌ນີ ຢືນຢັນວ່າ ຢູເຄຣນສາມາດສະກັດກັ້ນລູກສອນໄຟຂອງຣັດເຊຍໄວ້ໄດ້ທັງໝົດ ເຊິ່ງປະກອບດ້ວຍ ລູກສອນໄຟຄວາມໄວກວ່າສຽງ 6 ລູກທີ່ຖືກຍິງຈາກເຮືອບິນ, ລູກສອນໄຟຣອນຄາລິບ 9 ລູກ ທີ່ຖືກຍິງຈາກເຮືອດຳນ້ຳ ແລະ ລູກສອນໄຟພາກພື້ນດິນ 3 ລູກ.
ເຈົ້າໜ້າທີ່ຈາກກຸງຄີຟກ່າວວ່າ ມີປະຊາຊົນ 3 ຄົນ ໄດ້ຮັບບາດເຈັບຈາກເສດສ່ວນລູກສອນໄຟທີ່ຕົກລົງມາຈາກຟ້າ.