ວັນທີ 12 ພຶດສະພາ 2023 ຜ່ານມາ, ຢູ່ທີ່ເດີ່ນພະແນກອຸດສາຫະກໍາ ແລະ ການຄ້າ ແຂວງຫຼວນໍ້າທາ ໄດ້ຈັດທໍາລາຍຜະລິດຕະພັນແປ້ງນົວກາຈອງ ປອມ ທີ່ນໍາເຂົ້າມາຈໍາໜ່າຍບໍ່ຖືກຕ້ອງ ໂດຍການເປັນປະທານ ຂອງທ່ານ ຫຸມເພັງ ວຽງທອງໄຊ ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ, ມີພະແນກການກ່ຽວຂ້ອງ, ຫົວໜ້າ-ຮອງຫົວໜ້າຂະແໜງ, ຕ່າງໜ້າ ປກສ ແຂວງ, ພະນັກງານວິຊາການ ເຂົ້າຮ່ວມ.
ທ່ານ ພອນທິບ ບຸນໄຊທິບ ຫົວໜ້າຂະແໜງ ຊັບສິນທາງປັນຍາ-ມາດຕະຖານ ແລະ ວັດແທກ ໄດ້ລາຍງານຫຍໍ້ກ່ຽວກັບການເຄື່ອນໄຫວຈັດຕັ້ງປະຕິບັດຕາມພາລະບົດບາດ, ສິດ ແລະ ໜ້າາທີ ເປັນເຈົ້າການເອົາໃຈໃສ່ປະສານສົມທົບ ກັບ ບັນດາຂະແໜງການທີ່ກ່ຽວຂ້ອງ, ຫ້ອງການອຸດສາຫະກໍາ ແລະ ການຄ້າເມືອງ, ພະນັກງານ ບໍລິສັດ ພູວຽງ ທີ່ປຶກສາການຄ້າ ແລະ ການລົງທຶນ ພ້ອມກັນເປັນເຈົ້າການລົງຊຸກຍູ້, ຕິດຕາມ ແລະ ກວດກາແປ້ງນົວ ກາຈອງ ປອມ ຢູ່ຕາມຕະຫຼາດ ແລະ ຫ້າງຮ້ານຕ່າງໆ ພາຍໃນ 3 ເມືອງຄື: ເມືອງ ຫຼວງນໍ້າທາ, ເມືອງ ສິງ ແລະ ເມືອງ ວຽງພູຄາ ປະຈໍາປີ 2018, 2020 ແລະ ປີ 2022 ສາມາດຢຶດ ແລະ ຮິບໂຮມສິນຄ້າໄວ້ເປັນຂອງກາງ ເພື່ອນໍາມາທໍາລາຍໃນຄັ້ງນີ້ ລວມມີແປ້ງນົວ ປອມ 600 ຖົງ, ນໍ້າໜັກ 200 ກິໂລກຼາມ ມູນຄາປະມານ 10.000.000 ກວ່າກີບ. ທັງນີ້ ກໍ່ເພື່ອເປັນການປົກປ້ອງຜູ້ຊົມໃຊ້, ຜູ້ບໍລິໂພກໃນສັງຄົມໃຫ້ໄດ້ຊົມໃຊ້ສິນຄ້າທີ່ຖືກຕ້ອງ ແລະ ມີຄຸນນະພາບທີ່ດີ ແລະທັງເປັນການສຶກສາອົບຮົມ ຜູ້ທີ່ນໍາສິນຄ້າດັ່ງກ່າວ ບໍ່ໃຫ້ນຳສິນຄ້າ ປອມ ທຸກຊະນິດ ນໍາມາຈໍາໜ່າຍຢູ່ໃນສັງຄົມ ຢ່າງເດັດຂາດ.
ໂອກາດດັ່ງກ່າວ ຜູ້ເຂົາຮ່ວມໄດ້ພ້ອມກັນທໍາລາຍຜະລິດຕະພັນແປ້ງນົວ ກາຈອງ ປອມ ທີນໍາເຂົ້າມາຈໍາໜ່າຍບໍ່ຖືກຕ້ອງຕາມລະບຽບກົດໝາຍ ແລະ ລອກຮຽນແບບ ຢ່າງເປັນທາງການ.
ສອ ສົມພະນິດ ໂຊມີໄຊ