ທ່ານ ທອງເບີຍ ສິງຂາວເພັດ ຫົວໜ້າຫ້ອງການຜູ້ປະສານງານ ໂຄງການເກັບກູ້ລະເບີດແຫ່ງຊາດລາວປະຈໍາແຂວງສາລະວັນ ໄດ້ໃຫ້ສໍາພາດວ່າ: ໃນໄລຍະ 1 ປີຜ່ານມາ ໂຄງການເກັບກູ້ລະເບີດປະຈໍາແຂວງໄດ້ເອົາໃຈໃສ່ໂຄສະນາສຶກສາຄວາມສ່ຽງ ແລະ ວຽກງານທຳລາຍເຄື່ອນທີ່ໄດ້ມີຜົນສຳເລັດຫຼາຍດ້ານ ເປັນຕົ້ນວຽກງານການໂຄສະນາສຶກສາຄວາມສ່ຽງຕາມແຜນແມ່ນ 60 ບ້ານໃນນັ້ນມີ: ເມືອງສາລະວັນ ຕາມແຜນ 10 ບ້ານສໍາເລັດ 100%, ເມືອງຕະໂອ້ຍ 10 ບ້ານສໍາເລັດ 7 ບ້ານປະຕິບັດໄດ້ 70%, ເມືອງຕຸ້ມລານ 8 ບ້ານ, ເມືອງວາປີ 7 ບ້ານ, ເລົ່າງາມ 8 ບ້ານ, ຄົງເຊໂດນ 7 ບ້ານ ແລະ ເມືອງສະໝ້ວຍ 10 ບ້ານປະຕິບັດໄດ້ 100%, ວຽກງານສໍາຫຼວດນອກວິຊາການ ຕາມແຜນເຄື່ອນໄຫວມີ 12 ບ້ານ ປະຕິບັດໄດ້ 100%.

ວຽກງານສໍາຫຼວດດ້ານວິຊາການຕາມແຜນແມ່ນ 625 ເຮັກຕາ ຕົວຈິງປະຕິບັດໄດ້ເກີນແຜນໄດ້ 639 ເຮັກຕາ, ວຽກງານກວດກູ້ ຫຼື ເກັບກູ້ລະເບີດອອກຈາກພື້ນທີ່ຕາມແຜນເຄື່ອນໄຫວໃນເນື້ອທີ່ 337 ເຮັກຕາ ປະຕິບັດໄດ້ 333 ເຮັກຕາ ເທົ່າກັບ 93,33%, ໄດ້ເຄື່ອນໄຫວທໍາລາຍລະເບີດຕາມແຜນ. ຕາມການລາຍງານສຸກເສີນຂອງປະຊາຊົນ ຕາມແຜນມີ 61 ບ້ານ ປະຕິບັດໄດ້ 100%; ຜ່ານການປະຕິບັດວຽກງານຂອງໂຄງການໃນໄລຍະ 1 ປີຜ່ານມາ ດ້ານຕັ້ງໜ້າໄດ້ຮັບທຶນສະໜັບສະໜູນຈາກລັດຖະບານອາເມຣິກາ ແລະ ລັດຖະບານຂອງປະເທດຍີ່ປຸ່ນ.

ທ່ານໃຫ້ຮູ້ຕື່ມອີກວ່າ: ສຳລັບການເຄື່ອນໄຫວ ແມ່ນປະຕິບັດຕາມແຜນພັດທະນາເສດຖະກິດ-ສັງຄົມ, ອຳນາດການປົກຄອງ ແລະ ປະຊາຊົນ, ຜູ້ທີ່ຂາດເນື້ອທີ່ທຳການຜະລິດ, ຄອບຄົວຜູ້ທຸກຍາກ, ໃນນີ້ແມ່ນເລັ່ງໃສ່ກວດກູ້ເນື້ອທີ່ ທີ່ຜ່ານການຢັ້ງຢືນວ່າມີລະເບີດບົ່ມວ່ານ.

ພ້ອມນັ້ນ ຍັງໄດ້ຮຽກຮ້ອງວ່າ ຖ້າຫາກພົບເຫັນລະເບີດຢູ່ຕາມເນື້ອທີ່ທຳການຜະລິດໃຫ້ແຈ້ງອຳນາດການປົກຄອງ ແລະ ສະເໜີມາຍັງຫ້ອງການແຮງງານ ແລະ ສະຫວັດດີການ-ສັງຄົມເມືອງຂອງຕົນ ເພື່ອແຈ້ງມາຍັງໂຄງການເກັບກູ້ລະເບີດໄປເກັບກູ້ ແລະ ທຳລາຍ.

ແຫຼ່ງຂ່າວຈາກ ປະເທດລາວ