ໃນວັນທີ 5 ພຶດສະພາ 2023 ນີ້ ທີ່ດ່ານສາກົນຂົວມິດຕະພາບລາວ-ໄທ ແຫ່ງທີ 1 ເຈົ້າໜ້າທີ່ກົມຕຳຫຼວດສືບສວນ – ສອບສວນ ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ ແຫ່ງ ສປປ ລາວ ໄດ້ມອບຜູ້ຖືກຫາ 2 ຄົນຄື: ທ້າວ ທົງໄຊ ພະນິນທອນ ອາຍຸ 42 ປີ, ສັນຊາດໄທ ແລະ ທ້າວ ສະກາດ ພັນທຸລີ, ອາຍຸ 31 ປີ, ສັນຊາດໄທ ໃຫ້ແກ່ເຈົ້າໜ້າທີ່ຕຳຫຼວດ ລາຊະອານາຈັກໄທ ໂດຍເຊິ່ງຝ່າຍລາວນຳໂດຍ ພັທ ສິງແກ້ວ ວົງພະຈັນ ຮອງຫົວໜ້າກົມຕຳຫຼວດສືບສວນ-ສອບສວນ ຝ່າຍລາຊະອານາຈັກໄທ ນຳໂດຍ ພັນຕຳຫຼວດເອກ ກິດມົງຄົນ ບູລະນະພັກດີ ຜູ້ກຳກັບການຕຳຫຼວດກວດຄົນເຂົ້າ-ອອກ ເມືອງໜອງຄາຍ ແຂວງໜອງຄາຍ ລາຊະອານາຈັກໄທ ພ້ອມດ້ວຍຄະນະທັງ 2 ຝ່າຍເຂົ້າຮ່ວມ ເປັນສັກຂີພິຍານ.
ພັທ ສິງແກ້ວ ວົງພະຈັນ ຮອງຫົວໜ້າກົມຕຳຫຼວດສືບສວນ-ສອບສວນໃຫ້ຮູ້ວ່າ: ໃນຄັ້ງວັນທີ 27 ກຸມພາ 2023 ກົມຕໍາຫຼວດສືບສວນ-ສອບສວນ ໄດ້ຮັບໜັງສືຂໍຄວາມຮ່ວມມື ຂອງເຈົ້າໜ້າທີ່ຕໍາຫຼວດ ໜອງຄາຍ ລາຊະອານາຈັກໄທ ກ່ຽວກັບເລື່ອງ ຂໍຄວາມຮ່ວມມືສືບສວນ-ສອບສວນ ຕິດຕາມຈັບຕົວຜູ້ຖືກຫາ ຄົນສັນຊາດໄທ ທີ່ກະທຳຜິດແລ້ວເອົາຕົວຫຼົບໜີເຂົ້າມາລີ້ເຊື່ອງຢູ່ ສປປ ລາວ ຈຳນວນ 2 ຄົນຄື: ທ້າວ ທົງໄຊ ພະນິນທອນ ອາຍຸ 42 ປີ ສັນຊາດໄທ ຕາມຄໍາສັ່ງຈັບຕົວຂອງສານສະລະບູລີ, ໃນຂໍ້ຫາ ຮ່ວມກັນກະທຳຄວາມຜິດຖານການຟອກເງິນ ແລະ ທ້າວ ສະກາດ ພັນທຸລີ ອາຍຸ 31 ປີ ສັນຊາດໄທ ຂໍ້ຫາມີຢາເສບຕິດໄວ້ໃນຄອບຄອງ ຈາກນັ້ນເຈົ້າໜ້າທີ່ວິຊາສະເພາະ ຈຶ່ງໄດ້ຕິດຕາມ ຄົ້ນຫາ ຈົນສາມາດກັກຕົວທັງ 2 ໄດ້.
ໂອກາດນີ້ ເຈົ້າຫນ້າທີ່ທັງ 2 ຝ່າຍ ກໍ່ໄດ້ລົງນາມໃນບົດບັນທຶກ ມອບ – ຮັບ ຜູ້ຖືກຫາ ໂດຍມີ ເຈົ້າຫນ້າທີ່ທັງສອງຝ່າຍເຂົ້າຮ່ວມ.
ທີ່ມາ ວິທະຍຸປ້ອງກັນຄວາມສະຫງົບ