ພະແນກສຶກສາທິການ ແລະ ກິລາແຂວງຄໍາມ່ວນ ໄດ້ຈັດການສອບເສັງຄັດເລືອກ ການຮັບ ແລະ ບັນຈຸເປັນລັດຖະກອນຄູໃໝ່ ປະຈໍາປີ 2023 ໂດຍການເປັນປະທານຂອງທ່ານ ປອ ຕຸດາວັນ ໜໍ່ເມືອງເດດ ຮອງຫົວໜ້າກົມຈັດຕັ້ງ ແລະ ພະນັກງານ, ທ່ານ ນັນຕະໄຊ ອິນທະສອນ ຫົວໜ້າພະແນກສຶກສາທິການ ແລະ ກິລາແຂວງ ເປັນປະທານຮ່ວມ. ໃນວັນທີ 24 ເມສາ 2023 ທີ່ຫ້ອງປະຊຸມໃຫຍ່ຂອງພະແນກ ສກຂ ໄດ້ມີການເຕົ້າໂຮມ ແລະ ຜ່ານກົດລະບຽບການສອບເສັງ ໃຫ້ແກ່ອານຸກໍາມະການຮັບຜິດຊອບການສອບເສັງ ແລະ ບັນດານັກສອບ ຈໍານວນທັງໝົດ 107 ຄົນ, ຍິງ 80 ຄົນ.
ໃນວັນທີ 25 ເມສາ 2023 ການສອບເສັງດັ່ງກ່າວແມ່ນຈັດຂື້ນທີ່ໂຮງຮຽນມິດຕະພາບຄໍາມ່ວນ-ກວາງບິ່ງ ໄດ້ມີການສອບເສັງ ພາກຄວາມຮູ້ທົ່ວໄປ, ສອບເສັງ ພາກວິຊາສະເພາະ ເຊັນ: ຄູອະນຸບານ, ປະຖົມ, ພາສາລາວ-ວັນນະຄະດີ, ວິທະຍາສາດສັງຄົມ, ປະຫວັດສາດ, ພູມສາດ, ICT, ພາສາອັງກິດ, ຄະນິດສາດ, ວິທະຍາສາດທໍາມະຊາດ, ຟີຊິກສາດ, ເຄມີສາດ ແລະ ຊີວະສາດ ແລະຍັງມີ ການສອບເສັງ ພາກປະຕິບັດຕົວຈິງ ແລະ ສໍາພາດ.
ທີ່ມາ ພະແນກສຶກສາທິການ ແລະ ກິລາແຂວງຄຳມ່ວນ