ເກີດເຫດໄຟໄໝ້ໂຮງໝໍໃນກຸງປັກກິ່ງ ປະເທດຈີນ ເຈົ້າໜ້າທີ່ຕ້ອງໄດ້ເລັ່ງອົບພະຍົບຄົນຫຼາຍຮ້ອຍຄົນ ແຕ່ມີຫຼາຍຄົນທີ່ອົບພະຍົບບໍ່ທັນແລ້ວໂດດໜີຕາຍຜ່ານປ້ອງຢ້ຽມ ເຮັດໃຫ້ມີຄົນເສຍຊີວິດ 21 ຄົນ.
ໃນວັນທີ 18 ເມສາ 2023 ເວລາປະມານ 13:00 ໂມງ ຕາມເວລາທ້ອງຖິ່ນ ເກີດເຫດໄຟໄໝ້ທີ່ໂຮງໝໍປັກກິ່ງ ສາງເຟິງ ໄດ້ມີຄວັນສີດຳອອກມາຈາກປ້ອງຢ້ຽມ ມີຫຼາຍຄົນທີ່ປີນອອກມາຈາກປ້ອງຢ້ຽມ ແລ້ວໄປນັ່ງຢູ່ເທິງຕູ້ແອ ເພື່ອຖ້າການຊ່ວຍເຫຼືອ ແລະ ມີຫຼາຍຄົນທີ່ໃຊ້ຜ້າປູນອນມາເຮັດເປັນເຊືອກມັດໄວ້ແລ້ວປີນລົງມາ.
ຕໍ່ມາເວລາ 18:00 ໂມງ ເຈົ້າໜ້າທີ່ຈຶ່ງສາມາດດັບໄຟໄດ້ ໂດຍອົບພະຍົບຜູ້ປ່ວຍອອກມາໄດ້ 71 ຄົນ ແລະ ພົບຜູ້ເສຍຊີວິດ 21 ຄົນ ນັບເປັນໜຶ່ງໃນເຫດໄຟໄໝ້ທີ່ຮຸນແຮງທີ່ສຸດ ຂະນະທີ່ສາເຫດຂອງໄຟໄໝ້ຍັງຢູ່ໃນຂະບວນການສືບສວນສອບສວນ.
ແຫຼ່ງຂ່າວ CNN