ໃນເວລາປະມານ 14:20 ໂມງຂອງວັນທີ 10 ເມສາ 2023 ຜ່ານມາ, ເກີດເຫດມີປະຊາຊົນກຳລັງຈະໂດດຂົວປາກເຊ-ໂພນທອງ ແຂວງຈຳປາສັກ ແຕ່ໂຊກດີທີ່ເຈົ້າໜ້າທີ່ ແລະ ປະຊາຊົນຜູ້ເຫັນເຫດການໄດ້ຮ່ວມມືກັນ ກັກໂຕຜູ້ກ່ຽວໄວ້ໄດ້ທັນ.

ແລະເວລາຕໍ່ປະມານ 18:50 ໂມງຂອງວັນດຽວກັນກໍ່ເກີດເຫດຄົນຈະໂດດຂົວ ປາກເຊ-ໂພນທອງ ອີກແຕ່ເຈົ້າໜ້າທີ່  ແລະ ປະຊາຊົນກໍຊ່ວຍໄວ້ໄດ້ທັນທັງ 2 ກໍລະນີ ເຊິ່ງທັງ 2 ແມ່ນຜູ້ຊາຍ.

ເຊິ່ງກ່ອນໜ້ານີ້ໄດ້ມີພິທີທາງສາສະໜາ ສູດປະລິຕະມຸງຄຸນ ສູດຖອນສິ່ງຊົ່ຮ້າຍບໍ່ດີບໍ່ງາມອອກຈາກ ຂົວຂ້າມນໍ້າຂອງປາກເຊ – ໂພນທອງ ແຂວງຈຳປາສັກ ແລະ ທຳບຸນເພື່ອຄວາມປັນສີລິມຸງຄຸນ ຢູ່ເຢັນເປັນສຸກໃຫ້ແກ່ປະຊາຊົນຊາວ ນະຄອນປາກເຊ ກໍຄືແຂວງຈຳປາສັກ.

ເຂົ້າຮ່ວມ ປະທານຝ່າຍສົງໂດຍມີພຣະອາຈານ ມະຫາ ສຸວັນ ຈັນທະຣາຊ ຜູ້ຊ່ວຍວຽກສູນກາງອົງການພຸດທະສາສະໜາສຳພັນລາວ ຊີ້ນຳ 4 ແຂວງພາກໃຕ້, ປະທານອົງການພຸດທະສາສະໜາສຳພັນລາວ ແຂວງ ຈຳປາສັກ ພ້ອມດ້ວຍຄະນະ ແລະ ພຣະອາຈານໃຫຍ່ ຈຳນວນ 18 ອົງ,ຈາກນີ້ພາຍນອກ ມີທ່ານ ບົວລີ ເພັດສົງຄາມ ເຈົ້ານະຄອນປາກເຊ ພ້ອມຄະນະ,ທ່ານ ນາງ ວາດສະໜາ ສີລິມາ ປະທານແນວລາວສ້າງຊາດແຂວງ,ມີເຖົ້າແກ່ແນວໂຮມ,ອອກຕົນຍາດຍົມເຂົ້າຮ່ວມ.