ເມືອງວຽງໄຊ ລົງກວດກາ ພ້ອມກັບທຳລາຍສິນຄ້າໝົດອາຍຸ ເສື່ອມຄຸນນະພາບ ທີ່ຢຶດໄດ້ຕາມຮ້ານຄ້າພາຍໃນເມືອງ.
ແຫຼ່ງຂ່າວ ເມືອງວຽງໄຊ ລາຍງານວ່າ: ວັນທີ 30 ມີນາ 2023 ຄະນະຮັບຜິດຊອບກວດກາຮ້ານອາຫານ, ຮ້ານຂາຍເຄື່ອງຍົກ-ຂາຍຍ່ອຍ ຢູ່ພາຍໃນເທສະບານເມືອງວຽງໄຊ ແຂວງຫົວພັນ ໄດ້ສົມທົບກັບພາກສ່ວນກ່ຽວຂ້ອງຂອງເມືອງລົງກວດກາສິນຄ້າໝົດອາຍຸ ແລະ ເຊື່ອມຄຸນນະພາບ ຢູ່ຕາມຮ້ານໃນຕົວເມືອງວຽງໄຊ.
ຜ່ານການລົງກວດກາໃນຄັ້ງນີ້ ສາມາດກວດຍຶດອາຫານທີ່ເສື່ອມຄຸນນະພາບ ແລະ ໝົດອາຍຸແລ້ວ ເປັນປະເພດເຂົ້າໜົມ, ຮອດດັອກ ແລະ ສິນຄ້າຫລາຍປະເພດ ລວມມູນຄ່າທັງໝົດ 2 ລ້ານກວ່າກີບ ຈາກນັ້ນຈຶ່ງພ້ອມກັນທຳລາຍຖິ້ມ.
ເພື່ອເຮັດໃຫ້ຜູ້ບໍລິໂພກໄດ້ບໍລິໂພກອາຫານທີ່ໄດ້ມາດຕະຖານດ້ານຄຸນນະພາບ, ສະອາດ, ມີຄວາມປອດໄພ ຍ້ອນຜົນຮ້າຍຂອງອາຫານທີ່ເສື່ອມຄຸນນະພາບ ແລະ ອາຫານໝົດອາຍຸການນຳໃຊ້ມີຢ່າງຫຼວງຫຼາຍຕໍ່ສຸຂະພາບຮ່າງກາຍຂອງຄົນເຮົາ.