ໃນວັນທີ 30 ມີນາ 2023 ຜ່ານມານີ້ ເກີດອຸບັດຕິເຫດລົດໃຫຍ່ຕໍາກັບລົດຈັກ ຢູ່ເສັ້ນທາງບ້ານຊໍາເກດ ເມືອງສີໂຄດ ຕະບອງ ນະຄອນຫຼວງວຽງຈັນ ເຮັດໃຫ້ຜູ້ຂັບຂີ່ລົດຈັກເສຍຊີວິດຄາທີ່ 1 ຄົນ ສ່ວນຜູ້ຂັບຂີ່ລົດໃຫຍ່ໄດ້ເອົາຕົວໜີ ໄປ.
ຫຼ້າສຸດ ໃນວັນທີ 4 ເມສາ 2023 ທ່ານ ພັທ ເດດລືຊາ ໄຊຍະສານ ຮອງຫົວຫນ້າພະແນກຕໍາຫລວດຈະລາຈອນ ນະຄອນຫລວງວຽງຈັນ ໄດ້ສໍາພາດຜ່ານລາຍການຂັບຂີ່ປອດໄພ ວ່າ: ຕໍ່ກັບເຫດການດັ່ງກ່າວ ພາຍຫຼັງທີ່ ເຈົ້າໜ້າທີ່ໄດ້ລົງໄປວັດແທກ ແລະ ເກັບກໍາຂໍ້ມູນຢູ່ຈຸດເກີດເຫດ, ພົບເຫັນຜູ້ເສຍຊີວິດ 1 ຄົນ ເພດຍິງ ແລະ ພາຫະນະລົດຈັກເປ່ເພ, ສ່ວນຜູ້ຂັບຂີ່ລົດໃຫຍ່ແມ່ນຂັບອອກໄປອອກໄປຈາກຈຸດເກີດເຫດປະມານ 3 ກິໂລແມັດ ແຕ່ລົດເປ່ເພຫຼາຍບໍ່ສາມາດແລ່ນເຄື່ອນໄຫວໄປໄດ້ ຈຶ່ງຈອດລົດປະໄວ້ ແລ້ວເອົາຕົວລົບໜີໄປ.
ຕໍ່ມາວັນທີ 31 ມີນາ 2023 ເຈົ້າຫນ້າທີ່ໄດ້ນໍາເອົາຂໍ້ມູນລົດຄັນດັ່ງກ່າວມາກວດສອບ ແລ້ວປະສານຫາເຈົ້າຂອງ ລົດ ແລະ ເຈົ້າຂອງລົດໄດ້ແຈ້ງຕໍ່ເຈົ້າໜ້າທີ່ວ່າ: ຕົນບໍ່ແມ່ນຜູ້ຂັບຂີ່ລົດຄັນດັ່ງກ່າວໃນຄືນເກີດເຫດ ດັ່ງນັ້ນ ເຈົ້າຂອງລົດຈຶ່ງໄດ້ໃຫ້ຄວາມຮ່ວມມື ພ້ອມນໍາຕົວບຸກຄົນທີ່ຂັບຂີ່ລົດຄັນດັ່ງກ່າວ ເປັນເພດຊາຍ ເຂົ້າມອບຕົວກັບ ເຈົ້າໜ້າທີ່ ເພື່ອດໍາເນີນການສືບສວນ-ສອບສວນ ແລະ ດໍາເນີນຄະດີຕາມລະບຽບກົດໝາຍ.